11 მაისს, ჩოხატაურში, საქართველოს საფეხბურთო ჩემპიონატის მეორე ლიგის მატჩი გაიმართა. ადგილობრივი „ბახმარო“ სენაკის „ეგრისს“ დაუპირისპირდა.
აღნიშნული შეხვედრა სატურნირო ცხრილიდან გამომდინარე ძალიან დაძაბული და სანახაობრივი გამოდგა. მასპინძლებს მხოლოდ მოგება სჭირდებოდათ რადგან „სენაკთან“ სხვაობა მატჩის დაწყებამდე 6 ქულას შეადგენდა და წაგების შემთხვევაში „ბახმარო“ მეხუთე ადგილისთვის ბრძოლას გამოეთიშებოდა.
მართალია ბურთს სტუმრები აკონტროლებდნენ მაგრამ საგოლე მომენტები „ბახმაროს’ უფრო მრავლად ქონდა. რამდენიმე ეპიზოდში სტუმრები სასწაულებრივად გადაურჩნენ გაშვებულ გოლს.
მატჩის 24-ე წუთზე, თენაძის პასის შემდეგ, „ბახმაროელთა“ თავდამსხმელი მიხეილ ჟღენტი მეკარესთან პირისპირ აღმოჩნდა, გამოცდილ ფეხბურთელს შანსის გამოყენება არ გასჭირვებია და თავისი გუნდი წინ გაიყვანა. 1:0 _ პირველი ტაიმი ამ ანგარიშით დასრულდა.
მეორე ტაიმიც ანალოგიურად წარიმართა, სტუმრები გამწვავებას ფლანგებიდან ცდილობდნენ, თუმცა „ბახმაროს“ დაცვა უშეცდომო იყო და საქმე საგოლე მომენტამდე ვერ მიდიოდა. პირიქით, თამაშის დასრულებამდე 20 წუთით ადრე კონტრშეტევაზე კვლავ „ბახმარომ“ გაიტანა, ამჯერად თავი ზურა კვარაცხელიამ გამოიჩინა და გოლიც საკმაოდ ეფექტური გამოუვიდა.
თითქოს მეორე გოლს ყველაფერი უნდა დაესრულებინაა, თუმცა სტუმრები დანებებას არ აპირებდნენ და ბოლო წუთებზე შტურმზე გადავიდნენ, „ბახმარო“ კი თავს იცავდა. „ეგრისის“ მცდელობას შედეგი მოყვა _ არახამიამ შორიდან ზუსტად დაარტყა და ანგარიშში სხვაობა მინიმუმამდე შეამცირა, თუმცა სტუმრებმა დარჩენილ დროში გათანაბრება ვეღარ მოახერხეს, პირიქით „ბახმარო“ უფრო ახლოს იყო მესამე გოლის გატანასთან.
2:1 საბოლოოდ მატჩი ამ ანგარიშით დასრულდა. “ბახმარომ“ თავის უშუალო კონკურენტთან სხვაობა სამ ქულამდე შეამცირა და დარჩენილ ორ ტურში ქულათა მაქსიმუმის აღებას შეეცდება. თავის მხრივ „ეგრისმაც“ ვერ უნდა მოახერხოს ორივე თამაშის მოგება და ჩოხატაურელთა გუნდი მეხუთე ადგილს დაიკავებს.
შეგახსენებთ, რომ „ბახმარო“ 17 მაისს სტუმრად ხობის „კოლხეთთან ითამაშებს, ხოლო 25 მაისს კი ჩხოროწყუს სამეგრელოს უმასპინძლებს.
