დღეს ქალაქ ოზურგეთში ოლიმპიური სახლი გაიხსნა. ღონისძიებას საქართველოს ოლიმპიური ჩემპიონები, ადგილობრივი ხელისუფლების წარმომადგენლები, ოზურგეთელი სპორსტმენები ესწრებოდნენ. ღონისძიებაზე მოწვეულმა სტუმრებმა ოლიმპიური კომპლექსი დაათვალიერეს და ახალგაზრდებს წარმატებები უსურვეს:
"გურია ნიუსმა" ოლიმპიური ჩემპიონები და ხელისუფლების წარმომადგენლები ჩაწერა.
მუხრან ვახტანგაძე, მსოფლიო ჩემპიონი, აჭარის სპორტისა და ახალგაზრდულ საქმეთა დეპარტამენტის ხელმძღვანელი:
"გურიის სპორტულ საზოგადოებას მინდა მივულოცო ეს ძალიან მნიშვნელოვანი დღე, ვფიქრობ, რომ სპორტის განვითარებისთვის კიდევ ერთი დიდი ნაბიჯია გადაგმული."
მამუკა ხაბარელი, ოლიმპიური კომიტეტის ვიცე-პრეზიდენტი:
"გურიაში გაიხსნა რეგიონალური ოლიმპიური კომიტეტი. ეს მისასალმებელია, შეიძლება ითქვას, რომ კომპლექსური შენობაა, მისი საცურაო დარბაზით, რომელიც ხელს შეუწყობს რეგიონში, კონკრეტულად ოზურგეთში, ახალგაზრდების ჩაბმას სპორტულ ცხოვრებაში და აქტივობების გაზრდას. ეს მხოლოდ და მხოლოდ მისასალმებელია. ჩვენ ჩამოვედით აქ, ვინაიდან რეგიონალური განვითარება ჩვენთვის ძალიან მნიშვნელოვანია."
ლერი ხაბელოვი, მსოფლიო ჩემპიონი "უპირველესად მე მინდა მივულოცო ყველას ეს დღე. ეს არის წინ გადადგმული ნაბიჯი, შთამბეჭდავი კომპლექსია. ის რომ გურიას ჰყავდა ოლიმპიური ჩემპიონები, ბევრს ნიშნავს. მივესალმები და კიდევ ერთხელ მივულოცავ ამ დარბაზში მსხდომთ, ოლიმპიური სახლის გახსნას."
გია სალუქვაძე, გურიის გუბერნატორი: "არაჩვეულებრივი, კარგი დღეა ჩემთვის, იმიტომ რომ ნებისმიერი სხვა დაწესებულების გახსნას, მირჩევნია ასეთი ლამაზი შენობები გაიხსნას, რადგან ეს არის ჩვენი ბავშვების მომავალი, ეს არის ის, რაც ყველაზე მეტად სჭირდება ჩვენს რეგიონს."
ლაშა ლომაძე, გურიის ოლიმპიური კომიტეტის თავმჯდომარე: " თბილისიდან ოლიმპიური კომიტეტის შემადგენლობაა ჩამოსული. დელეგაციაში არიან ოლიმპიური ჩემპიონებიც. ვფიქრობ, ოლიმპიური სახლის გახსნა ისტორიული მოვლენაა. ეს არის მუზეუმი. მას საქართველოში ანალოგი არ აქვს. ეს არის ოლიმპიური კომიტეტისა და ადგილობრიი ხელმძღვანელების დამსახურება. თავიდან იყო რაღაც გაუგებრობა, მაგრამ ყევლაფერი მოგვარდა, ყველაფერი ისე დასრულდა, როგორც უნდა დასრულებულიყო."
ბეგლარ სიორიძე, ქალაქ ოზურგეთის მუნიციპალიტეტის მერი: "გაისხნა სპორტული კომპლექსი, ოზურგეთელები განებივრებულები ვართ ამ მხრივ და სერიოზული წარმატებები გვაქვს, განსაკუთრებით ჭიდაობა მაქვს მხედვბელობაში, აღნიშნულ სპორტულ კომპლექსში განთავსდება პირველ სართულზე ქალაქ ოზურგეთის მუნიციპალიტეტის სპორტის ა(ა)ი.პ. მეორე სართულზე კი ოლიმპიური კომპლექსი, ვიმედოვნებ, რომ ძალიან ბევრი ჩემპიონი გაიზრდება.
