გუშინ "ქართული ოცნების" ოფისში გამართულ ბრიფინგზე განაცხადეს, რომ "კორცხელში „ნაციონალური მოძრაობის“ წევრებმა მოაწყვეს პროვოკაცია".
ეს განცხადება პოლიტსაბჭოს ახალმა წევრმა მამუკა მდინარაძემ გააკეთა, რომელსაც ბევრი გამოუხმაურება მოჰყვა:
" ესე იგი ნაციონალური მოძრაობის ლიდერები, ხელკეტებით შეიარაღებულ ზონდერებთან ერთად მისულან საარჩევნო უბანზე, ბოკერიას დაწერილი სცენარის მიხედვით დაუწყიათ ჩხუბი და დასისხლიანებამდე უცემინებიათ თავი იქ შეკრებილი მშვიდობიანი მოქალაქეებისთვის.
აი, რა გინდა რომ თქვა? მხოლოდ ძველი საბჭოთა ანეკდოტი მახსენდება, მშვიდობიანი ვიეტნამური ტრაქტორი რომ თავისთვის ხნავდა ბრინჯის ყანაში, ამ დროს ამერიკული ბომბდამშენების ფლოტილია რომ დაესხა თავს და ტრაქტორმა საპასუხო ცეცხლით რომ გაანადგურა ყველა. გარბიან _ მივსდევთ და მოვიხედე _ გვეწევიან.
რა მაცინებს თორე კი," _ წერს "რესპუბლიკური პარტიის" ერთ-ერთი ლიდერი დავით ზურაბიშვილი ფეისბუქის საკუთარ გვერდზე.
შეგახსენებთ, რომ პარტია „ქართული ოცნების“ პოლიტიკური საბჭოს წევრმა მამუკა მდინარაძემ ზუგდიდის მუნიციპალიტეტ სოფელ კორცხელში მომხდარ დაპირისპირებაში, სადაც "ნაციონალური მოძრაობის" ლიდერები, ჟურნალისტები და რიგითი მოქალაქეები სასტიკად სცემეს, ბრალი "ნაციონალურ მოძრაობას" დასდო.
'„დღეს კიდევ ერთხელ გამოჩნდა, რომ „ნაციონალური მოძრაობა“ არის ბოკერიას პარტია. კიდევ ერთხელ გამოჩნდა მისი ხელწერა!
ბოკერიას კლანმა მიშას კლანზე რომ გაიმარჯვა, ეს ვაშაძის წასვლითაც დადასტურდა! ვაშაძე წარმოადგენდა მიშას მხარდამჭერთა ჯგუფს. ნაცების პირველი ათეულითაც გამოჩნდა, რომ ბოკერია არის იქ ერთადერთი გადაწყვეტილების მიმღები. მისმა კლანმა საბოლოოდ გაიმარჯვა ამ პარტიაში.
დღეს არჩევნები ტარდებოდა ბევრგან, მაგრამ დაპირისპირება მოხდა იქ, სადაც იყო ბოკერია და მისი ჯგუფი. ესაა მისი ხელწერა-პროვოკაციები, რაშიც აქვს დიდი გამოცდილება. მიშას პარტია გადაიქცა ბოკერიას პარტიად, თუმცა სტილი იგივეა.
სამწუხაროა, რომ „ნაციონალურმა მოძრაობამ“ სოფელ კორცხელში მაინც შეძლო პროვოკაციების მოწყობა. გიგა ბოკერიას ზონდერ ჯგუფებმა ფიზიკური შეურაცხყოფა მიაყენეს როგორც ჟურნალისტებს, ასე ადგილობრივ მოსახლეობას" _ აღნიშნა მდინარაძემ, რასაც ნაციონალურმა მოძრაობამ დეზინფორმაცია უწოდა.
