ოზურგეთის მუნიციპალიტეტის სოფელი ნატანები, საქართველოს ზოგ რაიონულ ცენტრზე ბევრად დიდია. აქაურები ასეც ხუმრობენ, "ჩვენი სოფლის შიდა გზების სიგრძე იმხელაა, რომ გაშალო, თბილისში ჩახვალო".
როგორც გამგებლის წარმომადგენელი ნატანებში ილია თავაძე გვეუბნება, ეს ხუმრობაც არაა, ადგილობრივი გზების სიგრძე ჯამში 480 კილომეტრს უდრის. სოფელში 2500 მოქმედი კომლია და თავისთავად, საქმეც ბევრი გვაქვსო. ბუნებრივია, დღის ნახევარში მთლიანად ვერც ჩვენ შევძლებთ სოფლის პრობლემებსა თუ იქ გაკეთებულ საქმეებზე საუბარს, თუმცა, საერთო სურათის დანახვა მაინც შესაძლებელია.
როგორაა ხვა-თესვის საქმე, აქვს თუ არა სოფელს გაზი, წყალი, გზა, რა დოზით წყდება დასაქმების პრობლემა და, ზოგადად, როგორია ინფრასტრუქტურული პროექტების გახორციელების ტენდენცია სოფელში? _ ამ კითხვებზე ადგილობრივები გვპასუხობენ.
სოფელ ნატანების მკვიდრი კობა მახარაძე პენსიონერია, თუმცა, თავს მხნედ გრძნობს და სასაუბროდაც განწყობილია: _ პრობლემები ადრეც იყო და ახლაც გვაქვს. ყველაზე კარგი საქმე სოფელში გაზის შემოყვანაა _ ზემო ნატანებში უკვე დასრულდა, მალე ქვედაშიც დამთავრდება. გამრიცხველიანებაც გვეღირსა და ამოვისუნთქეთ. ხვნა-თესვასაც ეშველება, კი დაიხნა და კაკალსაც ჩავაგდებთ მიწაში, მარა იცი, რას გეტყვი? ახლა არაა მანდარინის სეზონი, მარა მალე მოვა მაგიც და უთხარით ამ მთავრობას, რომ აქედანვე დაიკავონ თადარიგი და ნუ ჩაგვიყრიან წყალში ჩვენს ნაშრომს! ერთი კილო მანდარინით ხუთ კილო კარტოფილს ვყიდულობდი! ახლა პირიქითაა! ყველა ოჯახში მანქანა იდგა, ვის შიოდა? ჩვენმა მთავრობამ მეტად უნდა მოხედოს ხალხს. აჯობონ კომუნისტებს, დაუშალათ ვინმემ?! იმას ვხედავ, რომ ყველა ჩინოვნიკი და თანამდებობის პირი კარგადაა უზრუნველყოფილი ყველაფრით, უბრალო ხალხი კი _ გაჭირვებულია. ისე კი, ბევრი კარგი რამ გაკეთდა. ნატანები სპეციფიკური სოფელია _ ეს არის ციტრუსოვანთა "ქვეყანა". თუ მანდარინის ჩაბარების საქმე კარგად იქნება ორგანიზებული, ყველა კარგად ვიქნებით აქ. უმთავრესი პრობლემა ესაა და შემოდგომის საქმეზე ზაფხულში უნდა იფიქრონ. სხვა, ახლა კარგიც ბევრი მაქვს სათქმელი _ გზა გაკეთდა, იუსტიციის სახლი გაიხსნა, გაზი აგერ მზადაა, ისეთი სასტუმრო და საკონცერტო დარბაზი შენდება, ნატანები მალე სამოთხეს უნდა დაემსგავსოს. ამას ბიძინა ივანიშვილი აკეთებს და სხვას დავაბრალო? _ გვეუბნება კობა მახარაძე.
სოფლის ცენტრში მდებარე დიდი სპორტდარბაზი ავარიულ მდგომარეობაშია. კობა მახარაძე ამაზეც წუხს და გვეუბნება, რომ ამ შენობის რეაბილიტაცია სოფლის ახალგაზრდობას კი არა, სრულიად საქართველოს სპორტულ საზოგადოებას წაადგება. იხსენებს დროს, როცა ქართველი სპორტსმენები აქ ემზადებოდნენ მსოფლიო ოლიმპიადებისთვის და მერე საქართველოში ოქროს მედლები ჩამოჰქონდათ. თუმცა, ილია თავაძე ამბობს, რომ სპორტული დარბაზის რეაბილიტაცია დაგეგმილია და მომავალ წელს უნდა ჩატარდეს კაპიტალური რემონტი.
ნატანებელი როზა ჯალაბაძე უფულობაზე, დასაქმებასა და გასაჭირზე საუბრობს: _ 55 წლის ვარ. შეძლებაც მაქვს, მაგრამ სად ვიმუშაო? დასაქმებაზე უფრო დიდი პრობლემა ჩვენთვის არ არსებობს. მანდარინია ბევრი აქ და როგორმე, სეზონზე ხალხმა უნდა მოახერხოს მისი რეალურ ფასში გაყიდვა. რომ ვიანგარიშოთ, ხარისხიანი მანდარინის მოსავლის მოყვანა საკმაოდ ძვირი _ 50-60 თეთრი ჯდება. ამის შემდეგ ლარად თუ ვერ გაყიდე, რა გამოდის? ჩვენთვის ზამთარ-ზაფხულ სასაუბრო თემა მანდარინის გასაღებაა. ამით ცხოვრობდა ნატანები და თუ ვინმეს სახლ-კარი გააჩნია, მანდარინის ფულით აქვს. სანამ გაგვიძლებს? ასევე სოფელში საჭიროა ინტერნეტი. გვპირდებიან, მაგრამ არ ვიცი, როდის იქნება…
ნატანებლები უდიდეს საქმედ მიიჩნევენ სოფელში "საზოგადოებრივი ცენტრის" გახსნას. ამბობენ, რომ ნატანებმა ამოისუნთქა _ პენსიების, სხვადასხვა გზავნილების თუ დოკუმენტაციის მოსაგვარებლად, აღარ სჭირდებათ ოზურგეთში ჩასვლა.
ნატანების მკვიდრი მაია ნაკაიძე უგაზობის პრობლემებზე უკვე წარსულში საუბრობს:
_ დიდი ხანია, გაზს ვნატრობდით. გასულ წელს დაიწყო მაგისტრალის მშენებლობა და უკვე დასასრულს უახლოვდება. ასე თუ დააჩქარებდნენ, არ მეგონა. არადა, უფრო პატარა სოფლებში, დიდი ხანია, შეყვანილია გაზი და ამაზე ვდაობდით. ასევე აუცილებლად უნდა გაკეთდეს სპორტული დარბაზი _ ახალგაზრდობას ეს ჰაერივით სჭირდება. ძალიან გვიხარია იმ უდიდესი საკონცერტო დარბაზის მშენებლობა, რომელსაც ნატანებში ბიძინა ივანიშვილი აშენებს და რატომღაც იძახიან და წერენ, რომ ეს შეკვეთილში თუ ურეკში ხდება. ასევე, არაჩვეულებრივია იქვე, ახლოს, ამიერკავკასიაში ყველაზე საუკეთესო სასტუმროს მშენებლობა. ეს ყველაფერი ნატანებს მშვენიერ მომავალს უქადის. დასაქმებაზე აქ თუ საუბარს დაიწყებ, მაშინვე გეტყვიან, მანდარინი გამაყიდინონ დროზე და არ გთხოვთ მეტ დასაქმებასო, _ ასე დაგვემშვიდობა ჩვენი ახალგაზრდა რესპონდენტი.
გაზის შეყვანა სოფელში "სახელმწიფო გაზის კომპანიის" დაკვეთით დაიწყო 2015 წელს და დასასრულს უახლოვდება.
ილია თავაძე, მუნიციპალიტეტის გამგებლის წარმომადგენელი ნატანებში: "დღეისთვის, ნატანებში, უკვე 1200 ოჯახში ჭიშკართან მიყვანილია გაზის მილი. დანარჩენ ოჯახებთან მიყვანა აგვისტოს ბოლომდე დასრულდება. აღსანიშნავია, რომ ამ კომპანიას "ქართული სუბტროპიკული ხილის" ხელმძღვანელმა დავით სიხარულიძემ დროებით უსასყიდლოდ დაუთმო სასაწყობე მეურნეობის ტერიტორია, რომ მუშაობაში ხელი არ შეშლოდათ. შეკვეთილი-ურეკის წყლით მომარაგებისთვის "საქართველოს გაერთიანებული წყლის" კომპანია პროექტს ახორციელებს, რომელსაც აფინანსებს აზიის ფონდი. ეს უდიდეს პრობლემას მოხსნის _ ცენტრალური წყალმომარაგება შეკვეთილსა და ურეკს არასოდეს ჰქონია. შეკვეთილი ნატანების ტერიტორიაა და თავისთავად ეს პროექტი მთლიანად ნატანებსაც სასიკეთოდ წაადგება _ ჩაებმება ამ წყალსადენს. სოფელ მერიაში კეთდება არტეზიული აუზი, სადაც უზარმაზარ მილები შეიტუმბება და მერე აიქაჩება წვერმაღალაზე. აქედან კი მოხდება მთელი საკურორტო ზონის წყლით მომარაგება. ასეთი წყალმომარაგების სისტემა არსებობის ისტორიაში არ ჰქონია ურეკს, შეკვეთილსა და ნატანებს.
შეკვეთილი-ურეკის წყლით მომარაგების პროექტის მშენებლობა ერთ წელზე მეტია დაიწყო და 2018 წელს უნდა დასრულდეს."
