გურიის გუბერნატორის მოადგილის, სოსო ერქომაიშვილის ინფორმაციით, ოზურგეთში, სახელმწიფო თეატრის მიმდებარე ტერიტორიაზე სკოლის ბავშვები არიან შეკრებილი, რომლებიც დღეს ჩოხატაურში გიორგი ვაშაძისა და გურამ ჩალაგაშვილის დასახვედრად მიემგზავრებიან და შესაბამის უწყებებს, აღნიშნული ფაქტით დაინტერესებას სთხოვს.
"ერთი მშობლიდან შემომივიდა ინფორმაცია, რომ დღეს ახალი პოლიტიკური ძალის ლიდერი გრიგოლ ვაშაძე აკეთებს გურიის რეგიონის, სკოლის მოსწავლეების შეკრებას ჩოხატაურში და ბუნებრივია ჩნდება ეჭვი ხომ არ აპირებს ვაშაძე და ვაშაძის პოლიტიკური ორგანიზაცია ბავშვების პოლიტიკური მიზნებისთვის გამოყენებას. მივმართავ ადგილობრივ რესურსცენტრს და განათლების სამინისტროს, ასევე სამართალდამცავ ორგანიზაციებს დაინტერესდნენ ზემოთ აღნიშნული ფაქტით და საზოგადოებას მისცენ ზუსტი განმარტება.
მივმართავ მოსწავლეებს, მათ მშობლებს, გამოიჩინონ სიფრთხილე და წინდახედულობა, რადგან მათი რესურსი არ იქნას გამოყენებული გარკვეული პოლიტიკური ჯგუფების კონკრეტული პილიტიკური მიზნებისთვის და ინტერესებისთვის", _ ამბობს სოსო ერქომაიშვილი "გურია ნიუსთან".
"გურია ნიუსმა"აღნიშნული ფაქტი გადაამოწმა.
"სახელმწიფო სამი ნულის" წარმომადგენლის, გიორგი ელიაძის თქმით, სკოლის ბავშვები ჩოხატაურში მიემგზავრებიან "ვორკ კაფეს" ჩასატარებლად.
"ეს ინფორმაცია ტყუილია, რომ ჩვენ გიორგი ვაშაძის დასახვედრად მივდივართ. იკრიბება ნელ-ნელა საზოგადოების ნაწილი, აქ იქნებიან მშობლებიც, ბავშვებიც და ასევე ნებისმიერი ასაკის წარმომადგენლები. ჩვენ გარკვეულ საკითხებზე ვწერთ იდეებს, თუ რა შეიძლება გაკეთდეს ქალაქისთვის, რეგიონისთვის, რომ განვითარდეს, მაგალითად ჯანდაცვის კუთხით, ასევე სპორტის საკითხში. სულ იქნებიან 50 ბავშვი ოზურგეთიდან, ჩოხატაურში 250 დაგვხვდება და ლანჩხუთიდან კი 250 ბავშვი."_ განაცხადა ელიაძემ.
"გურია ნიუსი" ასევე დაუკავშირდა "ახალი საქართველოსთვის" დამფუძნებელს გიორგი ვაშაძეს, რომელმაც გუბერნატორის მოადგილის მიერ "გურია ნიუსთან" გაკეთებული განცხადება უარყო:
"ეს არის პროექტი, რომელიც მთელ საქართველოში იმართება. არანაირი კავშირი არ აქვს ამას პოლიტიკასთან და როგორც მე მაქვს ინფორმაცია ჩართულია უკვე გურიის სპეცსამსახურები, რომ ბავშვები არ მივიდნენ ამ ღონისძიებაზე", _ ამბობს ვაშაძე.
