ჭინჭარი, როგორ მრავალმხრივ სასარგებლო და უნიკალური თვისებების მქონე მცენარე, ახლა უხვადაა ჩვენი ეზოების და ბაღების სიახლოვეს. მრავალი ცნობილი სამკურნალო თუ ფხალეული თვისებების მქონე ჭინჭარს, ჩვენ უფრო განსხვავებული თვისებებითაც წარმოგიდგენთ, რის შესახებაც ნაკლებად წერენ და იციან.
პირველ რიგში, ეს ეხება მეურნეებს, რომლებიც ბოსტნეული კულტურების მოყვანით არიან დაინტერესებულნი. ბოსტნეულის ხოჭოების და სხვა მავნებელი ბუგრების თუ მწერების წინააღმდეგ საუკეთესოა ხალხური მეთოდის გამოყენება ჭინჭრის დახმარებით.
ერთი კილო ახალმოკრეფილი ჭინჭარი ჩავყაროთ ცივ წყალში. ცოტა ხნის მერე ავადუღოთ, დავდგათ რამდენიმე წუთით და შემდეგ გავწუროთ. ეს სითხე შევურიოთ 200 ლიტრ წყალში (ერთი კილოგრამი ჭინჭრის ნახარში ირევს ამ რაოდენობის წყალს). ეს ხსნარი შევასხუროთ დილით, კარგ ამინდში, ბოსტნეულ მცენარეებს. შესხურება ნარგავებისთვის მეორე ფოთლის სტადიიდან შეიძლება, საღამოს, კარგ ამინდში ან დილით. ამავე ხსნარით ასევე ძალიან კარგია ნიადაგის გაჯერება. გათოხნილ, გასუფთავებულ ბოსტანში კარგად მოვასხუროთ. სამჯერ გავიმეოროთ ეს მეთდი. სხვადასხვა მავნებლები ადვილად მოისპობა.
ჭინჭარი აუცილებლად უნდა შევინახოთ ზამთრისთვის, რადგან ის ერთნაირად საჭირო და სასარგებლოა როგორც ნედლ, ისე გამხმარ-გამომშრალ მდგომარეობაში. როგორ და რა პერიოდში უნდა შევაგროვოთ ის? ჭინჭრის შეგროვება ხდება მაშინ, როცა მცენარე პირველ ყვავილოვან ამონაზარდებს გაიკეთებს. (მაისის შუა რიცხვებიდან-ივნისის ბოლომდე). სამკურნალოდ მისი მხოლოდ მიწისზედა ნაწილი გამოიყენება. ჭინჭარი მშრალ, მზიან ამინდში უნდა მოვკრიფოთ. გავახმოთ ჩრდილში.
ჭინჭრის ნახარში ამაგრებს თმის ძირებს და ქერტლს აშორებს. ავიღოთ ახალმოკრეფილი ჭინჭარი, 100-150 გრამს დავასხათ ერთი ლიტრი წყალი, დავუმატოთ ცოტა ძმარი და ვხარშოთ 20 წუთით. გავწუროთ და ერთი კვირის (მაქსიმუმ, 10 დღე) განმავლობაში, ყოველდღე, დაბანის შემდეგ კარგად გადავივლოთ, შევიზილოთ თმებში). შედეგს აუცილებლად იგრძნობთ. ქერტლის კვლავ მომძლავრების შემთხვევაში, ისევ გავიმეოროთ ეს პროცედურა.
