"მე ვარ ამ სასამართლო კორპუსის ნდობით აღჭურვილი პირი და სიამოვნებს თუ არა ხელისუფლებას ჩემთან ლაპარაკი, მაინც უნდა დამელაპარაკოს", _ ამის შესახებ "გურია ნიუსთან" ინტერვიუში იუსტიციის უმაღლესი საბჭოს მდივანმა, ლევან მურუსიძემ ისაუბრა.
მურუსიძის თქმით, სასამართლო სისტემა რომ არ დაზარალდეს ურთიერთობისას გარკვეულ კომპრომისებზე წასვლა უწევს.
"შესაძლებელია, ბევრ ადამიანთან კონტაქტი მეც არ მსიამოვნებდეს, მაგრამ სასამართლოს და ქვეყნის ინტერესებიდან გამომდინარე, მზად ვარ ანგარიში გავუწიო მის ფაქტორს, ძალას და ავტორიტეტს. იმის გამო, რომ სიკეთე მოხდეს ამ სისტემაში, იძულებული და ვალდებული ვარ, ვილაპარაკო ყველასთან. ქალბატონი ნინო გვენეტაძის თემა აიღეთ, ვერავინ იტყვის, რომ პიროვნულად კარგი დამოკიდებულება გვაქვს, ერთმანეთთან ყოველთვის დაძაბული ურთიერთობა გვქონდა, მაგრამ ყველა გარკვეულ ფაქტორებს ვუწევთ ანგარიშს. მე ვუწევ ანგარიშს, რომ ის თავმჯდომარე და სასამართლოს პირველი პირია, მის გარეშე ვიცი, რომ წინსვლა ვერ იქნება, ქალბატონი ნინოც უწევს ანგარიშს იმას, რომ მე საბჭოს მდივანი ვარ და მეორე პირი სასამართლოში, რომელსაც მხარს უჭერს მოსამართლეთა კორპუსის უმრავლესობა.
ჩვენ რომ ერთმანეთთან დაძაბული ურთიერთობა გვქონდეს, სასამართლო დაზარალდება, ამიტომ ვალდებულები ვართ სასამართლო კორპუსთან დაკავშირებულ თემებზე ვითანამშრომლოთ. ასევეა, აღმასრულებელ თუ საკანონმდებლო ხელისუფლებასთანაც. როცა 160 მოსამართლე მივიდა იუსტიციის მინისტრთან ერთსულოვანი პოზიციით, არ უნდა მომხდარიყო საკითხების გადალაგება და ანგარიშის გაწევა? ვერავინ იტყვის რომ მე და თეა წულუკიანს ერთმანეთთან კარგი დამოკიდებულება გვაქვს, ვერავინ იტყვის, რომ ერთმანეთთან ნორმალური ურთიერთობა გვქონდა, მაგრამ ის აღმასრულებელი ხელისუფლებს წარმომადგენელია და ერთმანეთთან კომპრომისებზე უნდა წავიდეთ. აქ არ არის საუბარი, რომ მაინცდამაინც შეთქმულებას აქვს ადგილი. როცა ორი ძალა არის, რაღაცაზე უნდა შეთანხმდნენ, რომ ქვეყანაში მოხდეს სიკეთე და გარკვეული წინსვლა", _ აღნიშნა ინტერვიუში მურუსიძემ.
რას ფიქრობს იუსტიციის უმაღლესი საბჭოს მდივანი სასამართლო სისტემაში მიმდინარე პროცესებზე, რატომ წყდება გული თბილისის საქალაქო სასამართლოს ყოფილ თავმჯდომარეზე და რომელ საქმეებზე იღებს პასუხისმგებლობას, _ ამ და სხვა საკითხებზე, ლევან მურუსიძის პოზიციას "გურია ნიუსი" მოგვიანებით შემოგთავაზებთ.
ამავე თემაზე:
რა იცის ლევან მურუსიძემ მოსამართლეების ოჯახის წევრებზე
იუსტიციის უმაღლესი საბჭო სასამართლო სისტემის მართლმსაჯულების სტრატეგიაზე მუშაობას იწყებს
