თბილისის საქალაქო სასამართლოს სამოქალაქო საქმეთა კოლეგიის მოსამართლის, თამაზ ურთმელიძის ოჯახის საკუთრებაში ორი მიწის ნაკვეთი, საცხოვრებელი სახლი და არასაცხოვრებელი ფართია.
ამის შესახებ ყოფილი მოსამართლის ქონებრივ დეკლარაციაშია აღნიშნული, რომელიც მან 2016 წლის 30 მაისს შეავსო.
დეკლარაციის თანახმად, ურთმელიძის საკუთრებაშია მიწის ნაკვეთი კასპის რაიონის სოფელ თელათგორში, რომლის ფართობი 700.00 კვ.მ-ია. ხოლო მისი მეუღლე, მირანდა გურგენიძე ფლობს 500.00 კვ.მ-ის ფართობის მიწის ნაკვეთს თბილისში, სოფელ დიღომში და ამავე მისამართზე არსებულ 270.00 კვ.მ-ის ფართობის საცხოვრებელ სახლს. ამასთანავე, გურგენიძის საკუთრებაშია 46.00 კვ.მ-ის ფართობის არასაცხოვრებელი ფართი თბილისში, წერეთლის 142 ნომერში.
რაც შეეხება ურთმელიძის ოჯახის წლიურ შემოსავალს, დეკლარაციის მიხედვით, თანხამ საერთო ჯამში 79 783 ლარი შეადგინა.
აქედან თამაზ ურთმელიძემ თბილისის საქალაქო სასამართლოს მოსამართლის თანამდებობისთვის 74 419.00 ლარის სარგო მიიღო; იუსტიციის სასწავლო ცენტრის ლექტორის პოსტისთვის კი, – 1340 ლარი;
მირანდა გურგენიძეს სსიპ გრიგოლ რობაქიძის უნივერსიტეტის ლექტორი თანამდებობიდან 624.00 ლარი; შპს "ინვეტის" იურისტობისთვის – 3200 ლარი; ხოლო სსიპ ადვოკატთა სასწავლო ცენტრი ლექტორობისთვის 200 ლარი აქვს მიღებული.
დეკლარაციის შევსების მომენტში, ურთმელიძეს ნაღდი ფულის სახით 5500.00 ლარი ჰქონდა; ხოლო მის საბანკო ანგარიშებზე 19 829 დოლარი და 486 ლარი ირიცხებოდა. მის მეუღლეს კი, 100 ლარი ჰქონდა.
დეკლარაციის მიხედვით, ურთმელიძის სახელზე 4 საბანკო სესხია, რომელთა ჯამური ოდენობა 97 300 ლარი და 30140.00 დოლარია.
სესხების პროცენტების დასაფარად წლის განმავლობაში თამაზ ურთმელიძეს 14 965 ლარი აქვს გადახდილი.
ბოლო სესხი ურთმელიძეს თანამდებობის დატოვებამდე ცოტა ხნით ადრე, 2016 წლის 7 აპრილს აუღია და ვადა 2023 წელს ეწურება. სესხის რაოდენობა – 30140.00 დოლარია.
ქონებრივი დეკლარაციის მიხედვით, თამაზ ურთმელიძე არ ფლობს ფასიან ქაღალდებსა და ძვირადღირებულ ნივთებს.
რაც შეეხება წინა წლების შემოსავლებს, 2014 წელს მისი შემოსავალი 74 385 ლარი იყო; 2013 წელს – 48100 ლარი; 2012 წელს – 41965 ლარი; 2011 წელს – 46034 ლარი; 2010 წელს – 47 102 ლარი.
ცნობისთვის, თამაზ ურთმელიძემ მოსამართლის თანამდებობ,ა დაახლოებით, 2 თვის წინ, სამოსამართლო ვადის ამოწურვის გამო დატოვა.
იუსტიციის უმაღლეს საბჭოში აღნიშნულთან დაკავშირებით "გურია ნიუსს" განუცხადეს, რომ მას, სურვილის შემთხვევაში, მოსამართლის თანამდებობაზე კონკურსში მონაწილეობის უფლება აქვს.
"თამაზ ურთმელიძემ თანამდებობა ვადის ამოწურვის გამო დატოვა. მაგრამ კონკურსში მონაწილეობის უფლება სურვილის შემთხვევაში ისევ აქვს", _ აღნიშნავენ იუსტიციის უმაღლეს საბჭოში.
ურთმელიძის განაცხადთან დაკავშირებით ცნობილი ორშაბათს, 6 მაისს გახდება.
თბილისის საქალაქო სასამართლოს ვებ-გვერდზე განთავსებული ინფორმაციის თანახმად, თამაზ ურთმელიძეს მოსამართლის პოსტი 2006 წლიდან ეკავა.
2006 წელს მან მუშაობა ცაგერის რაიონული სასამართლოს მოსამართლედ დაიწყო.
ამასთანავე, 2006-2009 წლებში მოსამართლის უფლებამოსილებას ახორციელებდა თბილისის სააპელაციო სასამართლოში.
2009 წლიდან მოსამართლის უფლებამოსილებას ახორციელებდა ბოლნისის რაიონულ სასამართლოში.
2009 წლის დეკემბრიდან ასევე დაკისრებული ჰქონდა მარნეულის მაგისტრატი მოსამართლის უფლებამოსილება.
2010 წლის 1 ნოემბრიდან მივლინებულ იქნა თბილისის საქალაქო სასამართლოს სამოქალაქო საქმეთა კოლეგიაში.
შეგახსენებთ, რომ თამაზ ურთმელიძის სახელი ყველაზე ხმაურიანად ტელეკომპანია "რუსთავი 2"-ის საქმის განხილვისას გაჟღერდა. მის მიერ გამოტანილი გადაწყვეტილებით, ტელეკომპანია ყოფილ მფლობელს, ქიბარ ხალვაშს დაუბრუნდა.
