ფონდ "ღია საზოგადოება – საქართველოს" ევროინტეგრაციის მიმართულების მენეჯერი ივანე ჩხიკვაძე აცხადებს, რომ თუ საქართველომ უვიზოდ მიმოსვლა ივნისის ბოლომდე ვერ მიიღო, მაშინ საკითხის განხილვა ოქტომბერში დანიშნული საპარლამენტო არჩევნების შემდეგ განახლდება. ამის შესახებ ჩხიკვაძე სოციალურ ქსელში წერს და ვიზალიბერალიზაციის საკითხის განხილვის პროცედურებს განმარტავს:
"საქმე არის ასე – 9-10 ივნისს იმართება იუსტიციის და შინაგან საქმეთა მინისტრების საბჭო, რომელმაც უნდა მიიღოს პოლიტიკური გადაწყვეტილება. მანამდე ჩანიშნულია ევროკავშირის მუდმივი წარმომადგენლობების ხელმძღვანელების/ელჩების (COREPER II) ორი შეხვედრა (არსებობს COREPER I ელჩების მოადგილეების დონეზე, მაგრამ ის შინაგან საქმეთა და იუსტიციის საკითხებს არ განიხილავს).
პირველი შეხვედრა გაიმართება 7 ივნისს ბრიუსელში და დაიწყება თბილისის დროით 12:00 საათზე. იმავე ორგანოს მეორე შეხვედრა გაიმართება 8 ივნისს და დაიწყება თბილისის დროით 12:00 საათზე.
COREPER II იმსჯელებს საქართველოსთან უვიზო მიმოსვლის შესახებ გადაწყვეტილების მიღებაზე. თუ მიღწეული იქნა კონსენსუსი, მაშინ საკითხს მიენიჭება ე.წ. "A სტატუსი", რაც ნიშნავს იმას, რომ 10 ივნისს შინაგან საქმეთა მინისტრების საბჭო დამატებით დებატებს აღარ გამართავს ამ საკითხზე და მას დაამტკიცებს იმ ფორმით, რა ფორმითაც მიიღებს COREPER II-დან.
იმ შემთხვევაში, თუ COREPER II-ზე კონსენსუსი არ შედგა ნებისმიერ ქვეყანას, ვინც მონაწილეობს საკითხის განხილვაში შეუძლია მოითხოვოს დამატებითი დებატები საბჭოში. ასეთ დროს საკითხს ენიჭება ე.წ. "B სტატუსი" შეიძლება დაუბრუნდეს უკან "ვიზის სამუშაო ჯგუფს" ან დისკუსიისთვის გავიდეს იუსტიციის და შინაგან საქმეთა მინისტრების საბჭოზე. ანუ საბოლოო გადაწყვეტილება მიიღონ მინისტრებმა დებატების შემდეგ. გამომდინარე იქიდან, რომ მინისტრთა საბჭოს დღის წესრიგში უკვე არის შეტანილი საკითხი ეს ნიშნავს, რომ თემა ე.წ. "ვიზის ჯგუფში" აღარ დაბრუნდება და გავა შეხვედრაზე ან "A" ან "B" სტატუსით.
ცნობისთვის, COREPER II-ის შემდეგი სხდომა დაგეგმილია 15 ივნისს. ანუ მას შემდეგ რაც ჩატარდება 9-10 ივნისს დაგეგმილი შსს და იუსტიციის მინისტრთა საბჭო. ხოლო მომდევნო შინაგან საქმეთა და იუსტიციის საბჭოს შეხვედრა კი დაგეგმილია 13-14 ოქტომბერს.
საქართველოს საპარლამენტო არჩევნები დაგეგმილია 8 ოქტომბერს.
იმედი დავიტოვოთ, რომ COREPER II-ის შეხვედრაზე რომელიმე ელჩი არ დააგვიანებს, ავად არ გახდება ან ნასვამი არ გამოცხადდება.
პ.ს. ევროპარლამენტს (რომელმაც საბოლოო სიტყვა უნდა თქვას ამ პროცესში) საზაფხულო არდადეგებზე გასვლამდე დაგეგმილი აქვს ორი პლენარული სხდომა 22-23 ივნისს და 4-7 ივლისს.
OREPER II-ის სხდომას გაუძღვება ნიდერლანდების სამეფოს მუდმივი წარმომადგენელი Pieter de Gooijer და მის მარიფათზე ბევრი რამ იქნება დამოკიდებული კონსენსუსის მოძიების კუთხით“, _ წერს ჩხიკვაძე სოციალურ ქსელში.
