ოზურგეთის ალექსანდრე წუწუნავას სახელობის დრამატულ თეატრში ანსამბლ "რუსთავის" კონცერტი გაიმართა. ანსამბლი "რუსთავი" 1968 წელს შეიქმნა.
"მინდა გითხრათ, რომ "რუსთავი" ოზურგეთის წინაშე განსაკუთრებულ ვალშია. ეს იმიტომ, რომ ანსამბლის ხელმძღვანელი არის წარმოშობით სოფელ მაკვანეთიდან და ეს არის ანზორ ერქომაიშვილი. ასევე მინდა შევეხმიანო ჩვენი ანსამბლის ბერმუხებს, ახლა დარბაზში სხედან – გელა მუჯირს, ამირან გოლიაძეს, ტრისტან სიხარულიძეს. მინდა გავიხსენო აწ გარდაცვლილი სამუელ ვადაჭკორია, რომელიც სოფელ კვირიკეთიდან იყო და კიდევ მინდა პატივი მივაგოთ, ბადრი თოიძეს, რომელიც ორი თვის წინ გარდაიცვალა. ბადრი თოიძე ანსამბლის დირექტორი იყო და სწორედ მას გვინდა მივუძღვნათ დღევანდელი კონცერტი. მადლობა, რომ მოხვედით." – ამ სიტყვებით მიესალმა მაყურებელს ანსამბლ "რუსთავის" სოლისტი და კონცერტი სიმღერით გაიხსნა.
ორსაათიან კონცერტს ემოციების და ოვაციების გარეშე არ ჩაუვლია. კონცერტის დასასრულს ანსამბლის ხელმძღვანელმა ანზორ ერქომაიშვილმა "გურია ნიუსთან" საუბრის დროს თქვა, რომ ოზურგეთში ყველაზე გემოვნებიანი და პრენტეზიული მაყურებელია. "გულწრფელად გეტყვით, რომ ანსამბლ "რუსთავს" 80-ზე მეტ ქვეყანა აქვს მოვლილი და 5 000 კონცერტი აქვს გამართული, მაგრამ ოზურგეთში ყველაზე საპასუხისმგებლო იყო ჩვენი გამოსვლა. აქ არიან ჩემები და ვერავის ვერაფერს გამოაპარებ, თანაც კარგი მაყურებელია. მადლობელი ვარ საზოგადოების, რომ ასე კარგად მიიღეს ჩვენი კონცერტი," – თქვა ჩვენთან საუბრის დროს ანზორ ერქომაიშვილმა. კონცერტი კულტურის სამინისტროს და ქალაქ ოზურგეთის მერიის ორგანიზატორობით და ხელშეწყობით ჩატარდა.
.jpg_18865.jpg)
