"ნახეთ, რა მდგომარეობაა ჩვენს ქუჩაზე და თუ იფიქრებთ, რომ აქ ადამიანები დადიან და ავტომობილები გადაადგილდებიან! წლებია, ამ ქუჩის რეაბილიტაციით არავინ დაინტერესებულა. ქალაქში მცხოვრებლები გვქვია, მაგრამ წვიმაში ტალახში ვიხრჩობით და მზაინ ამინდში _ მტვერში"_ ამ სიტყვებით სთხოვეს დახმარება "გურია ნიუსს" ქალაქ ოზურგეთში ჯორჯიაშვილის ქუჩის მცხოვრებლებმა.
ჯორჯიაშვილის ქუჩის მოსახლეობა ადგილობრივ ხელისუფლებას უკანასკნელ არჩევნებს კიდევ ერთხელ ახსენებს და დაპირების შეუსრულებლობაში ადანაშაულებს: "ორი წლის წინ, ადგილობრივი ხელისუფლების წარმომადგენლები მოვიდნენ _ დაგვეხმარეთ, მოდით არჩევნებზე და გპირდებით, ერთი კვირის შემდეგ დავიწყებთ მუშაობასო, შეგვპირდნენ მაშინ. თუმცა, იმ დღიდან ორი წელი გავიდა და არავინ გამოჩენილა".
"არჩევნებამდე დაგვპირდნენ, რომ მოაწესრიგებდნენ ინფრასტრუქტურას, მაგრამ არაფერი ჩანს. რამდენჯერაც მთავრობა იცვლება, იმდენჯერ გვატყუებენ. უნდა ნახოთ წვიმასა და ცუდ ამინდში ბავშვები ტალახში როგორ ცურავენ. რა დავაშავეთ ასეთი, რომ ყურადღებას საერთოდ არ გვაქცევენ?" _ ამბობენ ჯორჯიაშვილის ქუჩის მაცხოვრებლები.
ნუგზარ გაბედავა: "აქ კომუნისტების შემდეგ ასეთი მდგომარეობაა, ძალიან ბევრჯერ ჩამოვიდა ჩვენთან შესახვედრად ჩვენი ქუჩის დეპუტატი ლავრენტი ბიგვავა და ადგილობრივი ხელისუფლების წარმომადგენლები არჩევნებამდე და დაგვპირდნენ, როგორც კი არჩევნები დამთავრდება, გზაც დავაგებთ; ახლა რომ დავაგოთ, მოქრთამვაში ჩაგვეთვლებაო. დამთავრდა არჩევნები, აწი მაგათაც ვადა დაუმთავრდებათ და ვართ ასე _ ვიხრჩობით მტვერში და ნაგავში. თვენახევრის წინ იყო მოსული ჩვენი დეპუტატი და დაგვპირდა, ცენტრალური ბიუჯეტიდან ველოდებით თანხებს და დავაგებთ გზასო. მაგათი "მალე" არ მთავრდება!"
გულო გაბედავა: "სიცხეში მტვერიაა, წვიმაში გუბეები, ტალახი. ყველა არჩევნებზე გვპირდებიან, ეს 600 მეტრი არის დატოვებული, დანარჩენი გზა ნაციონალების დროს დააგეს, გუბერნატორის მოადგილის სახლამდე მიიყვანეს, ჩვენ დაგტოვეს. ქალაქის ტერიტორიაზე ასეთი ქუჩა არსად არ იქნება. ფეხით ვერ გაივლი წვიმაში. ხმის მიცემ ა, რომ უნდათ მაშინ მოდიან."
ქეთევან გოგეშვილი: "თქვენი თვალითაც ხომ ხედავთ, რა მდგომარეობაა?! ერთს ისე ავფეთქდებით, რომ ვერაფერი ვერ გაგვაჩერებს!"
ეთერი ორაგველიძე: "სადამდეა დაგებული გზა, ხომ ნახეთ?! ასე გააკეთეს ნაციონალებმა. ამათი იმედი გვქონდა და ესენიც არაფერს აკეთებენ. სამარშრუტო ტაქსის მძღოლი გვეხვეწება, მოუყარეთ თავი ხალხს და მე წაგიყვანთ გამგეობაშიო. მანქანები ვერ გადაადგილდებიან, ისეთი მდგომარეობა".
ჯერჯერობით, არ არის გადაწყვეტილი, როდის დაიწყება ჯორჯიაშვილის ქუჩის მოასფალტება, თუმცა, ქალაქ ოზურგეთის მუნიციპალიტეტის საკრებულოს დეპუტატი ლავრენტი ბიგვავა "გურია ნიუსთან" პირობას დებს, რომ აღნიშნული ქუჩის რეაბილიტაცია უახლოეს პერიოდში მოხდება:
"გადაწყვეტილება მიღებულია, შესაბამისი სახსრებიც მოძიებულია და უახლოესი დროის განმავლობაში, ჯორჯიაშვილის ქუჩაზე ინფრასტრუქტურა მალე მოწესრიგდება," _ გვითხრა დეპუტატმა.
