ლანჩხუთის სპორტული ცენტრის თავისუფალი სტილით ნორჩ მოჭიდავეებს ბოლო დღეებში საკუთარი შესაძლებლობების დემონსტრირება ორ ტურნირზე მოუწიათ.
ჯერ ბაღდადის კომპლექსური სპორტული სკოლის დარბაზში გაიმართა წარსულში აღიარებული მოჭიდავის, საერთაშორისო კლასის სპორტის ოსტატის, ლევან ებანოიძის სახელობის საერთაშორისო ტურნირი, სადაც ერთმანეთს დაუპირისპირდნენ საქართველოს, სომხეთის და აზერბაიჯანის 1999-2001 წლებში დაბადებული ჭაბუკი ფალავნები, სულ _ 200 მონაწილე.
ბაღდადურ ტურნირზე ლანჩხუთის სპორტული ცენტრი ექვსი სპორტსმენით იყო წარმოდგენილი, აქედან რეზო ქამადაძემ (29 კგ.) და დემეტრე მახარაძემ (42 კგ.) შესძლეს და მესამე საპრიზო ადგილზე გავიდნენ, შესაბამისად, ბრინჯაოს პრიზიორები გახდნენ.
ლანჩხუთელთა მწვრთნელის, კახა აფხაზავას თქმით, ეს ტურნირი წელს პირველად ჩატარდა და იგი ოფიციალური კალენდარული ტურნირია, სადაც საასპარეზოდ უძლიერესმა გუნდებმა მოიყარეს თავი. რაც შეეხება ჩვენი ბიჭების გამოსვლას, მწვრთნელის შეფასებით, მათ არც თუ ცუდი შედეგი აჩვენეს, მაგრამ უფრო მეტის შესაძლებლობაც გააჩნდათ.
"გიორგი გემაზაშვილს ჰქონდა შესაძლებლობა, ბრინჯაო აეღო, მაგრამ მან ორი ქულით დათმო შეხვედრა ქობულეთელ სპორტსმენთან. დემეტრე მახარაძემ შეუძლებელი შეძლო, იგი 2002 წელშია დაბადებული და მიუხედავად მცირე ასაკისა, მედგარი წინააღმდეგობა გაუწია ყვარელის წარმომადგენელს, ჩემპიონს(1999 წელს დაბ.), 4/4-ზე დათმო, პირველ პერიოდს იგებდა, მაგრამ სპორტული გამოცდილება არ ეყო. ამ ბიჭს ნამდვილად ეკუთვნის შექება’’, _ ამბობს აფხაზავა.
ლანჩხუთელი თავისუფალი სტილით მოჭიდავეები, ასევე, გამოდიოდნენ ბათუმში, ევროპის ვიცე-ჩემპიონისა და საერთაშორისო ტურნირების მრავალგზის ჩემპიონის კობა კაკალაძის სახელობის საერთაშორისო ტურნირზე, სადაც მონაწილეობა მიიღო საქართველოს ყველა რეგიონის მოჭიდავეთა გუნდებმა და სომხეთის წარმომადგენლებმაც. ტურნირი ჩატარდა 2002-2002 წლებში დაბადებულ ჭაბუკ სპორტსმენთა შორის, დაახლოებით, 250-მდე ფალავანი მონაწილეობდა. ორგანიზატორი გახლდათ აჭარისა და საქართველოს ჭიდაობის ფედერაცია.
ლანჩხუთის სპორტული ცენტრიდან ბათუმში საასპარეზოდ რვა სპორტსმენი გაემგზავრა, თუმცა, ჩვენებურთა მონაგარი ამ ტურნირზე მწირი აღმოჩნდა: ერთი ვერცხლი და ერთი ბრინჯაო. ვერცხლის მედალი ჯურუყვეთელმა გიორგი გემაზაშვილმა (35 კგ.) მოიპოვა, ბრინჯაოს კი _ ლანჩხუთელმა გიორგი აფხაზავამ (54 კგ) . "აღნიშნული ტურნირი მაღალი დონის ტურნირად კვალიფიცირდება, რადგან ამ ტურნირში მონაწილეობენ საქართველოს ნაკრები გუნდის წევრები ჭაბუკებში, სომხეთიდანაც თავისი წონითი კატეგორიების მიხედვით პირველი და მეორე ნომრები იღებენ მონაწილეობას. შედეგი ნამდვილად არადამაკმაყოფილებელია. მე არ ვარ კმაყოფილი ჩვენი ბიჭების გამოსვლით. აღნიშნულზე შესაბამისი ანალიზი გაკეთდება. უფრო მეტი შრომა გვჭირდება, რომ შედეგი გვქონდეს. ვიმედოვნებ, საყვედურს გაითვალსწინებს ის ბიჭები, რომლებსაც ეკუთვნით და მომავლში თავიანათი თავდადებული შრომით გამოასწორებენ", _ ამბობს კახა აფხაზავა ბათუმის ტურნირთან დაკავშირებით.
