სტამბოლის ათათურქის საერთაშორისო აეროპორტმა მუშაობა განაახლა. უცხოური მედიის ინფორმაციით, ამის შესახებ თურქეთის პრემიერ-მინისტრმა ბინალი ილდირიმმა აეროპორტში განაცხადა.
"საგამოძიებო მოქმედებები ისევ გრძელდება, თუმცა აეროპორტი გახსნილია და საჰაერო მიმოსვლა აღდგა", _ აღნიშნა ილდირიმმა.
ცნობისთვის, წუხელ მომხდარი აფეთქებებს სულ მცირე 50-მდე ადამიანი ემსხვერპლა. დაშავებულია 150 ადამიანი, აქედან ექვსის მდგომარეობა კვლავ მძიმეა.
რაც შეეხება ათათურქის აეროპორტში მყოფ საქართველოს მოქალაქეებს, ისინი სასტუმროში არიან გადაყვანილები.
თურქეთში საქართველოს გენერალური კონსულმის ირაკლი ასაშვილის განცხადებით, თურქეთის მხარისა და საქართველოს მთავრობის დახმარებით, დაახლოებით საქართველოს 100-მდე მოქალაქის დაბინავება მოხდა.
"საქართველოს მოქალაქეები ვნახეთ და ყველა დავაბინავეთ. მათი ნაწილი საკონსულოში გახსნილ ცხელ ხაზზე დაგვიკავშირდა, მაგრამ უფრო შედეგიანი იყო ათათურქის აეროპორტში მათი ნახვა. მგზავრთა ერთი ნაწილი თურქეთის მთავრობის მიერ გამოყოფილი ავტობუსით გადავიყვანეთ სასტუმროებში, ნაწილი კი საკონსულოს მანქანებით", _ განაცხადა გენერალურმა კონსულმა.
ამასთან, ასოშვილის ინფორმაციით, საქართველოს იმ მოქალაქეებისთვის, რომლებსაც თანხა არ ჰქონდათ, სასტუმროში დაბინავების მიზნით შესაბამისი რესურსი საქართველოს მთავრობამ გამოყო.
"მოქალაქეების იმ ნაწილს, ვისაც თანხა არ გააჩნდა, საქართველოს პრემიერ-მინისტრის გადაწყვეტილებით გამოეყო ფინანსური სახსრები, რის შესაბამისადაც ისინიც სასტუმროებში გადავიყვანეთ. ასეთი კატეგორიის პირი 60-65 იყო, საერთო ჯამში კი, სასტუმროებში დაახლოებით საქართველოს 100-მდე მოქალაქე გადავიყვანეთ", _ განაცხადა ირაკლი ასაშვილმა "ინტერპრესნიუსთან" საუბრისას.
ცნობისთვის, წუხელ თურქეთსი მომხრდარ ტერაქტებზე პასუხისმგებლობა ჯერჯერობით არც ერთ დაჯგუფებას არ აუღია, თუმცა, როგორც დასავლური მედია აღნიშნავს, ბოლო პერიოდში თურქეთში მომხდარი ძალადობრივი აქტები "ქურთისტანის მუშათა პარტიის" ან დაჯგუფება "ისლამური სახელმწიფოს" მიერ იყო ორგანიზებული.
