თითქმის, ერთი თვეა, რაც წინასაარჩევნო კამპანია ძალაში შევიდა, თუმცა, ლანჩხუთში პარტიული აქტივობა ნაკლებად თვალშისაცემია. ამ ეტაპზე, ზოგი პარტიის ოფისი გამოკეტილია, ზოგიც კი ჯერ კიდევ საოფისე ფართის ძიებაშია.
სხვებთან შედარებით აქტიურობა შეიმჩნევა "ქართული ოცნებისა" და "ერთიანი ნაციონალური მოძრაობის" პარტიის ადგილობრივ ოფისებთან.
"ბურჯანაძე _ გაერთიანებული დემოკრატების" ლანჩხუთის ორგანიზაციის წარმომადგენლის, საკრებულოს წევრის, ნონა მურვანიძის თქმით, პარტია საარჩევნოდ გააქტიურებას პირველი ივლისიდან შეუდგება. ამ დღეს ლანჩხუთში პარტიის ოფისის ოფიციალური პრეზენტაციაც იგეგმება. რაც შეეხება ლანჩხუთი-ჩოხატაურის ოლქში მაჟორიტარობის კანდიდატს, ნონა მურვანიძის ინფორმაციით, ამ საკითხზე პარტიაში ჯერ კიდევ მიმდინარეობს შიდა კონსულტაციები.
მიუხედავად აქტიურობისა, წინასაარჩევნო რეჟიმზე არც ლანჩხუთელი "ნაციონალები" გადასულან: "პარტია, ჩვეულებისამებრ, ყოველდღიურად აქტიურ სამუშაო რეჟიმში აგრძელებს მუშაობას, თუმცა, წინასაარჩევნო რიტმში მეტად მას შემდეგ ჩავერთვებით, რაც პარტიის მაჟორიტარობის კანდიდატზე მოხდება შეჯერება", _ ამბობს ლანჩხუთელი "ნაციონალების" თავკაცი კახა ასკურავა.
წინასაარჩევნო შტაბი მუშაობას არც მმართველი გუნდის ლანჩხუთის ორგანიზაციაში შედგომია. ჩვენი ინფორმაციით, ამ ეტაპზე პარტიაში საარჩევნო შტაბის ხელმძღვანელის კანდიდატზე მიმდინარეობს შეჯერება. კულუარული ინფორმაციით, მმართველი გუნდის საარჩევნო შტაბის ლიდერობის სურვილი მუნიციპალიტეტის პირველ პირს, ზაზა ურუშაძესაც ამოძრავებს. ამ ინფორმაციას ჩვენთან საუბარში "ოცნების" ადგილობრივი ორგანიზაციის თავმჯდომარე გოგი ხელაძე არც ადასტურებს და არც უარყოფს:
"მსურველი ძალიან ბევრია. ამ ორ დღეში გადაწყდება, ვინ ჩაუდგება სათავეში საარჩევნო შტაბს ლანჩხუთში. ერთი, რაც ამ ეტაპზე გადაჭრით შემიძლია გითხრათ, ისაა, რომ აქტიურად მიმდინარეობს პარტიის რიგების განახლება _ 26 ახალი წევრი შემოგვიერთდა", _ გვითხრა პარტიაში ახალი წევრების მიღებით კმაყოფილმა გოგი ხელაძემ.
საარჩევნო შტაბის ხელმძღვანელის არჩევას უახლოეს დღეებში პარტიულ შეკრებაზე გეგმავს "პატრიოტთა ალიანსის" ლანჩხუთის ორგანიზაციაც, სადაც ჯერ კიდევ არ არიან ჩამოყალიბებულები, თუ ვის წარადგენს პარტია ოლქში მაჟორიტარობის კანდიდატად.
ამ ეტაპზე საარჩევნო კამპანიაში ჩართვას არ ადასტურებს 2014 წლის თვითმართველობის არჩევნებისას გამგებლის პოსტის კანდიდატი და "პატრიოტთა ალიანსის" ადგილობრივი ორგანიზაციის ყოფილი თავმჯდომარე ბორის ჭყონია. გავრცელებული ინფორმაციით, "პატრიოტთა ალიანსის" ლანჩხუთის ორგანიზაციის ყოფილი თავმჯდომარე, 2016 წლის საპარლამენტო არჩევნებისას დამოუკიდებელი კანდიდატის აკაკი ჩხაიძის შტაბის ხელმძღვანელადაა დანიშნული. თუმცა, ჩვენთან სატელეფონო საუბარში, ჭყონია ამ ფაქტს არ ადასტურებს და ამბობს, რომ მასთან ამის შესახებ არავის უსაუბრია:
"ბატონ აკაკისთან ადრე მქონდა გარკვეული სახის საუბარი, თუმცა, დანამდვილებით შემიძლია გითხრათ, რომ ეს არ შეეხებოდა შტაბის უფროსობას _ ამ პოსტზე არანაირი შემოთავაზება არ მიმიღია, პირველად მესმის", _ გვითხრა ბორის ჭყონიამ.
წელს არჩევნებში პირველად იღებს მონაწილეობას და სავარაუდოდ, ოლქში საკუთარ მაჟორიტარობის კანდიდატსაც წარადგენს პაატა ბურჭულაძის პარტია "სახელმწიფო ხალხისათვის":
"ამ ეტაპზე საარჩევნო შტაბის ჩამოყალიბების პროცესში ვიმყოფებით. რაც შეეხება მაჟორიტარობის კანდიდატს ლანჩხუთი-ჩოხატაურის საარჩევნო ოლქში, ამ საკითხზე კონსულტაციები მიმდინარეობს პარტიის ცენტრალურ ოფისთან", _ გვითხრეს "სახელმწიფო ხალხისთვის" ლანჩხუთის ორგანიზაციაში.
