პოლიტიკური პარტიების წინასაარჩევნოდ აქტიური მუშაობა ოზურგეთში არ შეიმჩნევა. წარმომადგენლები ამბობენ, რომ მათი გააქტიურება დაახლოებით 10 ივლისიდან დაიწყება. "გურია ნიუსი" დაინტერესდა, თუ რა მდგომარეობაა პარტიის ოფისებში. ხალხმრავლობა თითქმის ყველა ოფისში დაგვხდა, გარდა "ქართული ოცნებისა".
მაჟორიტარი დეპუტატობის კანდიდატები ოფიციალურად მხოლოდ "ნაციონალურ მოძრაობას" და "გაერთიანებულ დემოკრატიულ მოძრაობას" ჰყავთ დასახელებული.
"ერთიანი ნაციონალური მოძრაობის" მაჟორიტარი დეპუტატობის კანდიდატი დავით მჟავანაძე "გურია ნიუსთან" ამბობს, რომ მის პარტიას წინასაარჩევნოდ აქტიური მუშაობა დაწყებული აქვს:
"უკვე მოხდა ჩემი კანდიდატურის ოფიციალურად წარდგენა, დაწყებულია საარჩევნო პროცესი, ვხვდებით ჩვენს მხარდამჭერებს, ვგეგმავთ სხვადასხვა ღონისძიებებს, ჩვენ ვართ ოპოზიური პარტია და შესაბამისად აქტიურად ვართ ჩართული ამ პროცესებში. ყველამ იცის, რომ გვქონდა საარჩევნო შეხვდერა ჩვენი პარტიის ლიდერთან მიხეილ სააკაშვილთან და მივიღეთ კონკრეტული დავალებები არჩევნებთან დაკავშირებით, განვიხილეთ ვრცლად და დეტალურად გურიისა და ოზურგეთის პრობლემები"_ამბობს მჟავანაძე.
პარტია "ქართული ოცნება -დემოკრატიული საქართველოს" ოფისში, აღმასრულებელი მდივანი მარეხი გობრონიძე დაგვხვდა:
"პირველ რიგში ვემზადებით იმისთვის, გავიგოთ ვინ იქნება ჩვენი მაჟორიტარი კანდიდატი, ველოდებით დასახელებას, როცა ოფიციალურად დასახელდება, მაშინ დაიწყება აქტიური მუშაობა, ამ დღეებში ველოდებით უკვე, მოლოდინის რეჟიმში ვართ."
"გურია ნიუსის"ინფორმაციით, "ქართული ოცნების" ოზურგეთის საარჩევნო შტაბის ხელმძღვანელად ოფიციალურად არ არის დანიშნული ბეგი სიორიძე, რადგან შესაძლოა, საბოლოოდ ისევ მის კანდიდატურაზე შეჩერდეს არჩევანი დეპუტატობის კანდიდატის პოსტზე, თუმცა პარტიაში, აღნიშნულ პოსტზე არც დავით დარჩიას კანდიდატურის დასახელებას გამორიცხავენ.
"თავისუფალი დემოკრატების" შტაბის უფროსის თამაზ ცერცვაძის თქმით, პარტია საარჩევნოდ გააქტიურებას 10 ივლისიდან გეგმავს, მისივე თქმით ოფიციალურად ჯერ არა, თუმცა არ გამორიცხავს დეპუტატობის კანდიდატის პოსტზე თემურ სალქუვაძის კანდიდატურის დასახელებას.
გაერთიანებული დემოკრატიული მოძრაობის გურიის ოფისის ხელმძღვანელი და მაჟორიტარი დეპუტატობის კანდიდატის ავთანდილ ჩხაიძის შტაბის უფროსი კახა ჩავლეშვილი ამბობს, რომ შტაბი და პარტიის სრული შემადგენლობა სერიოზულად მუშაობს უკვე.
"ყველა მიმართულებით გაგვაჩნია გეგმები, ჩვენს მხარდამჭერებთან გვაქვს ინტენსიური შეხვედრები, ჩვენი ამომრჩევლები არ მიგვიტოვებია, ყოველთვის ვახორციელებლდით მათი ინტერესბის დაცვას. ჩვენი კანდიდატურაც დასახელებულია".
ახალი პოლიტიკური ცენტრის "გირჩის" ოზურგეთის ოფისი ხელმზღვანელი კობა ლომაძე "გურია ნიუსთან" ამბობს, რომ პარტია ემზადება არჩევნებისთვის:
"კოორდინატორებს ვაკომპლექტებთ ქალაქში, სოფლებში, პარტიაში გაწევრიანებულია დაახლოებით 500 ადამიანი, თუმცა ორ დღეში ზუსტი ციფრი გვეცოდინება, კანდიდატურა ამ ეტაპზე არავინ არ გვყავს, ვინ იქნება დეპუტატობის კანდიდატი, ესეც ძალიან მალე გახდება ცნობილი ამის შესახებ, დაახლოებით ათ დღეში."-ამბობს ლომაძე.
საქართველოს პატრიოტთა ალიანსის, ახალგაზრდული ფრთის თავმჯდომარე და ოფისის მენეჯერი მირზა ჩხიკვიშვილი:
"ამ ეტაპზე ძირითადად მიმდინარეობს სოფლებში ათ კაციანი სათათბირო ჯგუფების დაკომპლექტება, ესენი გაუწევენ ორგანიზებას სოფლებში ჩვენს მხარადამჭერებს, მათ მობილიზებას. ძირითადად ოფისში ვეწევით ადმინისტრაციულ საქმიანობას."
მისი თქმით, მაჟორიტარი დეპუტატობის კანდიდატის ვინაობა ცნობილი არ არის.
პაატა ბურჭულაძე სახელმწიფო ხალხისთვის, ოზურგეთის ორგანიზაციის ხელმძღვანელი: ლევან მგელაძე:
"ფაქტიურად პარტია დარეგისტრირდა ოფიციალურად 29 ივნისს, აქტივოვები და წინასაარჩევნო კამპანია ერთ კვირაში დაიწყება. დავიწყებთ სტრუქტურების ჩამოყალიბებას, კოორდინატორების აყვანას და ასე შემდეგ. ჯერ გადაწყვეტილი არ არის ვინ იქნება მაჟორიტარი დეპუტატობის პოსტზე ჩვენი კანდიდატურა".
