ოზურგეთის მუნიციპალიტეტის სოფლებში _ დვაბზუ, ცხემლისხიდი, მაკვანეთი, ლიხაური და ქალაქ ოზურგეთის დასვენებისა და კულტურის პარკში ქართველი მწერლები და პოეტები პროექტ "ცოცხალი წიგნების" ფარგლებში მკითხველებს შეხვდნენ.
დავით ტურაშვილი, გიორგი კეკელიძე, ნინო გუგეშაშვილი, მანანა მენაბდე, მარიამ წიკლაური, ლევან ლორია, დავით შემოქმედელი, ნიკა ჯორჯანელი კატო ჯავახიშვილი ოზურგეთს სტუმრობდნენ.
პროექტის ავტორი ქეთევან დუმბაძეა. მისი თქმით, პროექტი "ცოცხალი წიგნები" საქართველოს სხვადასხვა რეგიონის სოფლებისა და ქალაქების საჯარო სკოლებში, ბიბლიოთეკებში, მუზეუმებში, კულტურის სახლებსა და სხვა საჯარო დაწესებულებებში, თანამედროვე მწერლების სტუმრობას და მკითხველთან შეხვედრას ითვალისწინებს. პროექტის ფარგლებში მოეწყობა პოეზიის საღამოები და გაიმართება დისკუსიები ადგილობრივ მოსახლეობასთან მათთვის საინტერესო თემებზე.
"ცოცხალი წიგნებისადმი" ინტერესი თანდათან იზრდება. ამას მეტყველებს ის ფაქტი, რომ ჩვენთან შეხვედრებზე ბევრი ხალხი მოდის, არის ძალიან საინტერესო დიალოგი წიგნის ავტორსა და მკითხველს შორის. ვისაც შარშან მოეწონათ მწერლებთან და პოეტებთან შეხვედრა, წელს მოიყვანეს მეგობრები, ახლობლები და მეზობლები.
მსგავსი შეხვედრები ჭირდება, როგორც წიგნის ავტორებს, ასევე მკითხველებს. ყველანაირად ვცდილობთ, რომ ამ პროექტს ჰქონდეს გაგრძელება," _ თქვა "გურია ნიუსთან" საუბრის დროს ქეთევან დუმბაძემ.
მწერალი დათო ტურაშვილი შეხვედრაზე წამყვანად მოგვევლინა.
"ეს არის პროექტი _ "ცოცხალი წიგნები", სადაც მკითხველები ხვდებიან ცოცხალ ავტორებს მთელ საქართველოში. დასავლეთში, როდესაც წიგნი გამოიცემა, მკითხველები ავტორებს ხვდებიან _ კარგი მკითხველები მხოლოდ წიგნის წაკითხვით არ კმაყოფილდებიან და ხვდებიან ავტორებს, თუ რა თქმა უნდა, ავტორი ცოცხალია. ზოგი ცოცხალია, ზოგი _ მკვდარია და ზოგი კიდევ _ ცოცხალ-მკვდარია. ასეთი ავტორებიც არსებობენ.
მარტო კითხვა არ არის ლიტერატურული პროცესი. ეს პროცესი მოიცავს ცოცხალ ურთიერთობებსაც. მაგალითად, მე არ ვარ ფეისბუქის მომხმარებელი ბევრი მიზეზი გამო _ მიყვარს ცოცხალი ურთიერთობა და მსგავსი ღონისძიების ჩატარების მომხრე ვარ," _ თქვა შეხვედრაზე დათო ტურაშვილმა.
