„ნინო ბურჯანაძე-დემოკრატიული მოძრაობის“ ერთ-ერთი ლიდერის, დიმიტრი ლორთქიფანიძის განცხადებით, პრეზიდენტი უნდა დათანხმდეს რეფერენდუმის ჩატარებას ქორწინების საკითხზე კონსტიტუციაში ახალი ჩანაწერის გაკეთებასთან დაკავშირებით.
„პრეზიდენტი უნდა დათანხმდეს რეფერენდუმის გამართვას. რა უფლება აქვს მას არ გაითვალისწინოს საქართველოს 224 000 მოქალაქის ნება?! საინიციატივო ჯგუფმა ძალიან ბევრი გააკეთა იმისათვის, რომ საჭირო რაოდენობის ხელმოწერები შეგროვებულიყო და რაც ყველაზე მთავარია, უნდა აღინიშნოს, რომ ანტიდისკრიმინაციული კანონის მოქმედების მავნე ზეგავლენისაგან პრევენციას ემსახურებოდა სწორედ თავის დროზე „ქართული ოცნების“ პოლიტიკური ხელმძღვანელობის და პრემიერმინისტრის განცხადება, რომ ისინი თავად იყვნენ თანახმა კონსტიტუციაში ასახულიყო ეს ცვლილებები, მაგრამ ეს მაშინ არ განხორციელდა პოლიტიკური ნების რეალური არ არსებობის გამო“, _ განაცხადა დიმიტრი ლორთქიფანიძემ.
მისი თქმით, საქართველოს პარლამენტში არ მოიძებნა 113 დეპუტატი, ვინც მხარს დაუჭერდა ასეთი კანონის მიღებას.
„საინიციატივო ჯგუფმა გადაწყვიტა აეგროვებინა ხელმოწერები. 224 000 ხელმოწერა აგროვებულია და რამდენადაც ჩემთვის ცნობილია, პრეზიდენტი სწორედ დღეს ხვდება ამ საინიციატივო ჯგუფის წევრებს და საინტერესოა, მისი უარის შემთხვევაში, რა იქნება ამის მოტივი და არგუმენტაცია“, _ განაცხადა დიმიტრი ლორთქიფანიძემ.
