ნანი პაკელიანი ოზურგეთის მუნიციპალიტეტის სოფელ ძიმითის საჯარო სკოლის მე-12 კლასის მოსწავლეა და ახლახან ის საქართველოს მორაგბე გოგონათა ეროვნული ნაკრების წევრი გახდა.
როგორ მივიდა მოსწავლეობის ასაკში სერიოზულ წარმატებამდე, ათლეტური აღნაგობის გოგონა თვითონვე გვიამბობს:
"ჩემი ფიზიკური მონაცემების წყალობით, პატარაობიდანვე ძალოსნობა მიტაცებდა. სპორტით ვცოცხლობ. სულ ვვარჯიშობდი სხვადასხვა სახეობებში. ბადროს ტყორცნა 12 წლის ასაკიდან დავიწყე და 2012 წელს გამართულ ეროვნულ ჩემპიონატში, უკვე მოვიპოვე საქართველოს პირველობა სპორტის ამ სახეობაში. მეტი გასაქანი და ვარჯიშისთვის უკეთესი პირობები რომ მქონოდა, მალევე თბილისში გადავედი, სადაც განვაგრძე სწავლა და ვარჯიში. თუმცა, ოჯახური პირობების გამო, მალე უკან დავბრუნდი და სწავლა ისევ მშობლიურ სკოლაში გავაგრძელე. რა თქმა უნდა, სპორტისთვის თავი არ დამინებებია. ამჯერად რაგბში ვარჯიში დავიწყე. შედეგიც დადგა _ ახლა ეროვნული ნაკრების წევრი ვარ და ბრძოლის ჟინით ვარ შეპყრობილი, ყველგან რაგბი მელანდება, აუცილებლად უნდა ვიყო ძალიან წარმატებული", _ ამბობს პაკელიანი
ქალაქ ოზურგეთის რაგბის განვითარების კავშირის გუნდის უფროსი გელა გობრონიძე ნანი პაკელიანის სწრაფად მზარდ წარმატებებზე და მის გამორჩეულ სპორტულ ფენომენზე საუბრობს:
"ეს არის განსაკუთრებული სპორტული მონაცემების მქონე გოგონა, ფიზიკურად ძლიერი და უკომპრომისო ბუნების ადამიანი. ჩვენ მუდმივი კავშირი გვაქვს საქართველოს რაგბის ეროვნულ ნაკრების მწვრთლნელთან და შტაბთან. ერთ-ერთი გასვლის დროს, სკოლებში, რომლის მიზანიც იყო პერსპექტიული მოსწავლეების აღმოჩენა, ძიმითის საჯარო სკოლაში შევხვდით ნანი პაკელიანს, რომელიც ყველა "ნანუკას" ეძახის. აღსანიშნავია, სკოლის დირექტორის მალხაზ სამსონიას და სპორტის მასწავლებლის ბესო ანდღულაძის ძალისხმევა პერსპექტიული გოგონას აღმოსაჩენად და მის დასახმარებლად.
ისინი დღემდე განსაკუთრებული მზრუნველობით უდგანან გვერდით ნანი პაკელიანს. შერჩევის შემდეგ, ოზურგეთში, ზვანის სპორტულ სტადიონზე დაინიშნა ვარჯიშები. ნანი პაკელიანი, ასე ვთქვათ, პირველივე სვლაზე, წარმატებული შედეგით გახდა თვალშისაცემი. ითამაშა ორ ტურნირში, რომელიც ქუთაისსა და ფოთში გაიმართა _ ჯერ ქუთაისში და შემდეგ ფოთში ხუთი გუნდის წინააღმდეგ გამოვიდა და ღიად გამოჩნდა მისი სპორტული ფენომენი. ეროვნული ეგიდით მოწყობილი ამ ტურნირის შემდეგ, განაცხადის მიხედვით, ეროვნული ნაკრებისთვის 12 გოგონა უნდა შერჩეულიყო. ერთ-ერთი მათგანი ნანუკა პაკელიანი აღმოჩნდა. ასე მოხვდა ამ სიაში და დაიწყო მზადება ევროპის ჩემპიონატისთვის. ივლისის ბოლოს საქართველოს მორაგბე გოგონათა ეროვნული ნაკრები ბოსნიაში, სარაევოში გაემგზავრა, სადაც 25-26 ივლისს, საქართველოს ნაკრები ლუქსემბურგს, ბალკანეთის და სლოვენიის გუნდებს ეთამაშა. სამივე შეხვედრა მოიგეს. მომდევნო ორი შეხვედრა წააგეს, შემდეგ ერთი ისევ მოიგეს და საბოლოოდ მეექვსე ადგილზე გავიდნენ, რაც ცუდი შედეგი ნამდვილად არ არის. დარწმუნებული ვარ, ნანი პაკელიანის სპორტული აღმავლობა პიკს მიაღწევს, რადგან ის ჯერ კიდევ სკოლის მოსწავლეა და სერიოზულ თამაშს ახლა იწყებს", _ აღნიშნავს გელა გობრონიძე.
თვითონ ნანი პაკელიანი საკუთარ წარმატებას, გარდა თავისი ფიზიკური მონაცემებისა და სპორტული ჟინისა, საკუთარ სკოლასა და იქ გატარებულ დღეებს უმადლის და, რა თქმა უნდა, ოზურგეთის სარაგბო კავშირს, თითოეულ მწვრთნელს.
"მათ ჩემი ცხოვრება სპორტული აღმავლობისკენ მიმართეს. წარმატებებს რაც შეეხება, დღემდე მიღწეულს განსაკუთრებულ შედეგად არ მივიჩნევ და დიდ გამარჯვებებს ახლო მომავალში გპირდებით", _ ამბობს პაკელიანი.
