"ქართული ოცნება-დემოკრატიული საქართველოს" აწ უკვე ყოფილი მაჟორიტარი დეპუტატობის კანდიდატის ლანჩხუთისა და ჩოხატაურის საარჩევნო ოქლში თემურ ჭკუასელის სარეკლამო ბანერი, რომელიც ლანჩხუთში გუშინ დილით გააკრეს, ჯერ არ ჩამოუხსნიათ.
როგორც გვითხრეს, შტაბი ცენტრიდან ბანერის ჩამოხსნის თაობაზე მითითებას ელოდება.
აღსანიშნავია, რომ ჭკუასელის კანდიდატურის მოხსნის შესახებ ინფორმაცია შტაბებმა "გურია ნიუსის" მიერ გამოქვეყნებული ექსკლუზიურად მოპოვებული ინფორმაციიდან გაიგეს. შტაბის წევრებმა შემცვლელი კანდიდატის _ ნინო წილოსანის ვინაობაც ჩვენგან გაიგეს.
"ქართულ ოცნებაში" ამ დრომდე არ გაუკეთებიათ კომენტარი თუ რატომ მოხსნეს ჭკუასელის კანდიდატურა, როცა ერთი თვეა აქტიური საარჩევნო კამპანია მიმდინარეობდა, ბანერებიც დაუბეჭდეს, ბუკლეტებიც და სარეკლამო სტატიებიც იბეჭდებოდა.
თავად ჭკუასელი ამბობს, რომ კანდიდატურის მოხსნა პრემიერმა სთხოვა:
_ სანამ პრემიერი კანდიდატად დამასახელებდა, მანამდე იყო საუბარი, რომ მე ვიქნებოდი სიაში და კანდიდატი იქნებოდა წილოსანი. მაგრამ, მაშინ რაღაცეები შეიცვალა და როგორც ვიცი წილოსანი ოჯახური სიტუაციის გამო ვერ დააყენეს.
