ჩოხატაურის მუნიციპალიტეტის საკრებულოს ფრაქცია „ეროვნული ფორუმის“ თავმჯდომარე ქეთევან სიხარულიძე ბოლო რამდენიმე დღეა „ქართული ოცნების“ კანდიდატის ჩოხატაურისა და ლანჩხუთის საარჩევნო ოლქში, ნინო წილოსანის საარჩვენო კამპანიაში აქტიურად არის ჩართული. სიხარულიძე წილოსანს შეხვედრებზეც დაყვება და მმართველი ძალის სასარგებლოდ აგიტაციასაც ეწევა.
ეს იმ ფონზე, როცა „ეროვნული ფორუმი“ ოპოზიციური ძალაა და ხელისუფლების წინააღმდეგ საკმაოდ მკვეთრი განცხადებებითაც გამოირჩევა.
თუმცა, განსხვავებული მოსაზრებები აქვს სიხარულიძეს, რომელიც „გურია ნიუსთან“ საუბრისას „ოცნების“ სასარგებლოდ მუშაობას ადასტურებს და აღნიშნავს, რომ ეს ხელისუფლება ძალიან მოსწონს:
_ ქალბატონო ქეთევან, ოპოზიციაში მყოფი პარტიის თავმჯდომარე როგორ ახერხებთ, რომ „ქართული ოცნების“ შეხვედრებზე მმართველის პარტიის აგიტაციას ეწევით?
_ მე „ქართული ოცნების“ მაჟორიტარობის კანდიდატის შეხვედრებზე დავდივარ.
_ ის ხომ „ქართული ოცნების“ წარმომადგენელია… თქვენმა პარტიამ იცის, რომ მმართველი პარტიის კანდიდატის პიარით ხართ დაკავებული?
_ იცის. ჩვენ არ გვყავს კანდიდატი და ამ შემთხვევაში მე მაქვს საშუალება, ვისაც მე ავირჩევ იმას დავუჭირო მხარი.
_ ანუ, „ეროვნული ფორუმის“ ხელმძღვანელებთან შეთანხმებულია?
_ არა, შეთანხმებული რას ჰქვია?! ჩვენ არ გვყავს კანდიდატი.
_ შეთანხმება იმას ნიშნავს, რომ პარტიის ხელმძღვანელობიდან, რომლებსაც აქვთ პრეტენზია ოპოზიციონერობაზე გაქვთ თანხმობა „ქართული ოცნების“ კანდიდატი აპიროთ და მის მხარდასაჭერად აქტიურად იმუშაოთ?
_ არა. პარტიასთან ეს ნამდვილად არ შემითანხმებია.
_ ამ შემთხვევაში ოპოზიციაში ხართ თუ ხელისუფლებას წარმოადგენთ?
_ რას ქვია, ოპოზიციაში ვარ?! რა თქმა უნდა, „ეროვნული ფორუმის“ ფრაქციის თავჯდომარე ვარ საკრებულოში.
_ და ხელფასს იღებთ როგორც ოპოზიციური ფრაქციის თავმჯდომარე. ქალბატონო ქეთევან, ეს ხელისუფლება მოგწონთ?
_ რა თქმა უნდა, მომწონს.
_ კიდევ ერთხელ რომ დავაზუსტოთ, ხართ ოპოზიციონერი, ოპოზიციური ფრაქციის თავმჯდომარე და ხელისუფლებასთან არანაირი პრეტენზია არ გაქვთ?
_ არა, არანაირი, _ აღნიშნა სიხარულიძემ.
ჩვენ დეტალების გარკვევას „ეროვნულ ფორუმშიც“ შევეცადეთ, თუმცა პარტიის ლიდერებთან დაკავშირება ვერ მოვახერხეთ. შესაბამისად, პარტიის პოზიციას ამ საკითხთან დაკავშირებით მოგვიანებით გაგაცნობთ.
