"მექმნება შთაბეჭდილება, რომ ხელისუფლება ჩვენ ვართ და ჩვენს ოპოზიციაშია ბიძინა ივანიშვილი", _ ასე დაიწყო საუბარი დღეს გამართულ ბრიფინგეზე ტელეკომპანია "რუსთავი 2"-ის გენერალურმა დირექტორმა ნიკა გვარამიამ.
გვარამიას განცხადებით, საქალაქო სასამართლოს ყოფილ თავმჯდომარე მამუკა ახვლედიანთან გამართული საუბრის ჩანაწერი მისი გაკეთებულია. თუმცა ეს მას არ გაუვრცელებია და საქმე გვაქვს კიბერდანაშაულთან.
"ფარული ჩანაწერები პირველი არ არის ჩემთვის, მინდა განვაცხადო, რომ ეს არ არის სატელეფონო ჩანაწერი. ეს გადაღებულია ჩემ მიერ ფარულად, ეს ჩანაწერი გაკეთებულია, დაახლოებით, ერთი წლის წინ, როცა ჩვენი საქმის განხილვის პიკი იყო და კომუნიკაციის სურვილი გამოხატა საქალაქო სასამართლოს თავმჯდომარემ. მე ჩემს ორ მოადგილესთან მქონდა საუბარი ამის შესახებ და მივიღე რჩევა, რომ შეხვედრაზე მქონოდა შესაბამისი ჩამწერი აღჭურვილობა, რომ შემდეგ რაიმე პროვოკაციას არ ჰქონოდა ადგილი.
ან თუ რაიმე იქნებოდა მნიშვნელოვანი თქმული, გამოგვეყენებინა მტკიცებულად. პრობლემა არის იმდენად, რომ ეს ჩანაწერი მაშინვე განადგურდა, რადგან ჩვენთვის საინტერესო მასალას არ შეიცავდა, თუმცა რაღაც პერიოდში ჩემს კომპიუტერსა და ჩვენს ქსელში იყო დაცული. როგორც ჩანს, საქმე გვაქვს ახალ დანაშაულთან, კომპიუტერულ ქსელში შეღწევასთან”, _ განაცხადა გვარამიამ.
გვარამიამ მომხდარ ფაქტში ხელისუფლება დაადანაშაულა და ორ სავარაუდო ვერსიაზე ისაუბრა.
”ძალიან პრობლემატურია ჩვენი შიდა ამბების გატანა გარეთ. როგორც ჩანს, ორი ვარიანტია – შეღწევა ხდება გარედან ან შიგნით ჰყავს სუს-ს წარმომადგენელი, რომელსაც გააქვს მასალები. რამდენიმე კვირის წინ ჩემი პირადი ელექტრონული ფოსტაც გატეხეს და გამოაქვეყნეს”, _ აღნიშნა გვარამიამ.
შეგახსენებთ, რომ რამდენიმე საათის წინ ინტერნეტში კიდევ ერთი, სავარაუდოდ, ნიკა გვარამიასა და თბილისის საქალაქო სასამართლოს ყოფილი თავმჯდომარის მამუკა ახვლედიანის ფარული აუდიო ჩანაწერი გავრცელდა. აუდიოჩანაწერის მიხედვით, გვარამია და ახვლედიანი საქალაქო სასამართლოში შექმნილ ვითარებაზე საუბრობენ. მამუკა ახვლედიანი სისტემაში საქმეების რაოდენობის კუთხით შექმნილ ვითარებას „კატასტროფას“ უწოდებს.
