ოზურგეთის მუნიციპალიტეტის სოფელ ჭანიეთში, ასევე ამავე თემის სოფელ ქაქუთში არაერთ ოჯახში ღორი მოკვდა.
როლანდი ქიმუცაძეს, ლოვა ამირიანს, სვეტა ბოიაჯანს და სხვებს, ვის ოჯახებშიც ღორები დაიხოცა, მიაჩნიათ, რომ ეს არის იგივე დაავადება, რაც რამდენიმე წლის წინ იყო გავრცელებული.
კითხვაზე – მიმართეს თუ არა შესაბამის სამსახურს ან ვეტერინარს? – ამბობენ, რომ ეს საჭიროდ აღარ ჩაუთვლიათ.
"გურია ნიუსი" სურსათის ეროვნული სააგენტოს გურიის რეგიონული სამმართველოს უფროსს, ნინო შეწირულს დაუკავშირდა, რომელიც აცხადებს, რომ მსგავსი ფაქტის არსებობის შემთხვევაში, მოსახლეობა სურსათის ეროვნული სააგენტოს წარმომადგენლობას უნდა დაუკავშირდეს.
"თუ ღორის სიკვდილიანობას აქვს ადგილი, მოსახლეობამ აუცილებლად უნდა მოგვმართოს. ჩვენ დღემდე არცერთი ასეთი ფაქტის შესახებ არ ვიცით, რადგან არავის მოუმართავს. ღორის სიკვდილის შემთხვევაში, უნდა შეგვატყობინონ, რომ მივიდეთ, ანალიზი ავიღოთ და შემდეგ ლაბორატორიაში წავიღოთ, რომ დადგინდეს, რა სახის დაავადებაა. როცა ცოფის შემთხვევაა, უცებ მოდიან, გვირეკავენ და ეს ძალიან კარგია, მაგრამ რატომ არ გვატყობინებენ ახლა?!", – ამბობს შეწირული.
არის თუ არა ეს რამდენიმე წლის წინ გავრცელებული დაავადების მსგავსი დაავადება, რამაც მაშინ პირუტყვის მასობრივი განადგურება გამოიწვია, შეწირულს კომენტარის გაკეთება მოკვლევის გარეშე უჭირს.
"ვინ რა იცის, რა დაავადებაა? იქნებ ჭირია ან სხვა რამ. აუცილებლად უნდა მოგვმართონ. ჩვენ ოპერატიულად მივალთ ადგილზე. ვიმეორებ, ერთი მომართვაც არ მაქვს, რომ ვიცოდე, რა მოხდა. ეს იქნებ ჭირია და არა წითელი ქარი. თუ თვითონ ვერ ახერხებენ პრევენციას, მივალთ ადგილზე, დავეხმარებით, რომ ლოკალიზება მოხდეს. ხოლო თუ მასშტაბური ხასიათი ექნება, სახელმწიფო პროგრამა შემუშავდება და მოხდება ვაქცინაცია, ჩვენ გვაქვს ასეთი დავალება", _ გვითხრა ნინო შეწირულმა.
