"ირაკლი ღარიბაშვილი როცა გადადგა, ვურჩიე, საახალწლო სუფრას მიუჯექი და ბოლომდე ჩარგე თავი საცივში და მერე იფიქრე მომავალზე-მეთქი. ახლა ჩემს თავსაც დაახლოებით, ამას ვუსურვებ“, _ იხუმრა უსუფაშვილმა ჟურნალისტებთან დღეს გამართულ პრესკონფერენციაზე, სადაც 8 ოქტომბრის საპარლამენტო არჩევნების წინასწარი შედეგები შეაჯამა. მისი შეფასებით, საპარლამენტო არჩევნებზე საქართველოს მოქალაქეებს არჩევანის თავისუფლად გაკეთების საშუალება ჰქონდათ, თუმცა, საარჩევნო პროცესში იყო ხარვეზებიც. მიუხედავად ამისა, პარლამენტის თავმჯდომარის აზრით, არჩევნების შედეგების ლეგიტიმურობის ეჭვქვეშ დაყენების საფუძველი არ არსებობს.
დავით უსუფაშვილმა კომენტარი გააკეთა გავრცელებულ ინფორმაციაზე, რომლის თანახმადაც მისი კანდიდატურა უშიშროების მდივნის პოსტზე განიხილება.
„მე ასეთ ვითარებაში უკვე აღარ ვიცი, უნდა მიხაროდეს თუ უნდა ვწუხდე, იმიტომ, რომ აღარ დარჩა თანამდებობა სახელმწიფოში, რომლის თაობაზეც არ არის საუბრები, რომ მე, ალბათ, იქ წავალ. ეს ნიშნავს ალბათ, იმას, რომ შესაძლოა, ბევრი რამ შემიძლია, მაგრამ არანაირი სერიოზული საუბრები ჩემს მომავალთან დაკავშირებით არ მქონია არავისთან. ამის დრო მოვა. მე ახლა მთლიანად ვარ კონცენტრირებული, რომ პირნათლად და ბოლომდე შევასრულო ის მოვალეობა, რაც მაკისრია თქვენს წინაშე, ხალხის წინაშე, პარლამენტის წინაშე. უზრუნველვყოთ ის, რომ მომავალი პარლამენტი დაუბრკოლებლად შეუდგეს საქმიანობას, არჩევნები დასრულდეს ბოლომდე. დანარჩენ ამბებზე მერე ვისუაბროთ. მე მახსოვს, ორი წლის წინ, როდესაც ირაკლი ღარიბაშვილი გადადგა და იყო საუბრები, ახლა რას გააკეთებს, მე მაშინ საჯაროდ ვურჩიე, რომ ახლა მოდი, საახალწლო სუფრას მიუჯექი და ბოლომდე ჩარგე თავი საცივში და მერე იფიქრე მომავალზე-თქო. ახლა ჩემ თავსაც დაახლოებით ამას ვუსურვებ, მერე ვნახოთ“, _ განაცხადა უსუფაშვილმა.
