ცენტრალურ საარჩევნო კომისიას 8 ოქტომბრის საპარლამენტო არჩევნების შედეგები ოფიციალურად ჯერ არ გამოუცხადებია, თუმცა წინასწარი მონაცემები უკვე ცნობილია. ცესკო-ს 9 უბნის მონაცემები აქვს დასათვლელი და ამ უბნებში ჩოხატაური არ შედის.
ჩოხატაურის საოლქო საარჩევნო კომისიაში ყველა პარტიის შედეგები უკვე იციან. საუბნო საარჩევნო კომისიების ოქმებიდან ცნობილი ხდება იმ ოპოზიციური პარტიების ადილობრივი წარმომადგენლების ვინაობაც, რომლებმაც პარტიისთვის იმუშავეს და იმათიც, რომლებმაც საკუთარ პარტიას თავადაც არ მისცეს ხმა.
მაგალითად, ჩოხატაურის საკრებულოს ფრაქცია „ეროვნული ფორუმის“ თავმჯდომარემ ქეთევან სიხარულიძემ, რომელიც ხელფასს სწორედ ოპოზიციური ფრაქციის თავმჯდომარეობაში იღებს, როგორც ირკვევა საკუთარ პარტიას ხმა არ მისცა _ სოფელ ბუკისციხის საარჩევნო უბნის ოქმში, ეროვნული ფორუმის“ გასწვრივ 0 ხმა წერია.
_ მე ვესაუბრე პარტიის ხელმძღვანელობას და მალე დავტოვებ „ეროვნულ ფორუმს“. ამჟამად შვებულებაში ვარ, _ გვითხრა სიხარულიძემ.
_ ქალბატონო ქეთევან, 8 ოქტომბერს ხომ „ეროვნული ფორუმის“ წევრი იყავით. საკამოდ მაღალ ანაზღაურებას ხომ ამ პარტიის საშუალებით იღებთ… არ გეუხერხულებათ რომ ხმაც არ მიეცით?
_ ეს ჩემი გადაწყვეტილებაა. ასე მოხდა, _ თქვა „გურია ნიუსთან“ საუბრისას სიხარულიძემ.
კიდევ ერთი ოპოზიციური ფრაქცია ჩოხატაურის საკრებულოში „თოფაძე _ მრეწველებია“. მისი თავმჯდომარე შალვა ჩანტლაძე სოფელ ჩაისუბნის მკვიდრია და როგორც ჩაისუბნის საუბნო კომისიის ოქმიდან ირკვევა, მან საკუთარი პარტიისთვის 6 ხმის მოპოვება შეძლო.
უკეთესი მონაცემები აქვს ფრაქცია „რესპუბლიკელების“ თავმჯდომარეს გოჩა ჯიქიას. ჯიქიამ, სოფელ დაბლაციხეში „რესპუბლიკური პარტიისთვის“ 68 ხმა მოაგროვა.
აღსანიშნავია, რომ ჩოხატაურის საკრებულოში, სოფელ ფარცხმის მაჟორიტარი დეპუტატი მალხაზ ჩხიკვაძეც „რესპუბლიკელია“. ფარცხმაში ორი საარჩევნო უბანი იყო და ჯამში, ამ ორივე უბნიდან „რესპუბლიკელებს“ ხმა 10-მა ადამიანმა მისცა.
ამავე თემაზე: ოპოზიციური ფრაქციის თავმჯდომარე "ოცნების" მხარდამჭერ კამპანიაში _ "ეს ხელისუფლება მომწონს"
