საქართველოს მთელი მოსახლეობის 2.1%, პენსიონერთა 1.7% და ბავშვების 2.5% უკიდურეს სიღარიბეში ცხოვრობს, _ ამის შესახებ "იუნისეფის" ახალ კვლევაშია აღნიშნული.
კვლევის თანახმად, ფარდობითი სიღარიბის გარდა, ყველა სხვა კატეგორიის სიღარიბის ზღვრებთან მიმართებაში კლების ტენდენცია აღინიშნება. რაც შეეხება უკიდურესი სიღარიბის ზღვარს (1.25 აშშ დოლარი დღეში, ანუ თვეში 77.6 ლარი ერთ ეკვივალენტურ ზრდასრულ პირზე გაანგარიშებით), საქართველოს შინამეურნეობების 1.7%, მთელი მოსახლეობის 2.1%, პენსიონერთა 1.7% და ბავშვების 2.5% უკიდურეს სიღარიბეში ცხოვრობს.
"ფარდობითი სიღარიბის ზღვარს (მედიანური მოხმარების 60%, რაც ერთ ეკვივალენტურ ზრდასრულ პირზე გაანგარიშებით 171.8 ლარს შეესაბამება) ქვემოთ მცხოვრები ოჯახების რაოდენობა გაიზარდა 20.1%-დან 20.7%-მდე, ხოლო მთლიანი მოსახლეობისა – 22.9%-დან 23.1%-მდე. ღარიბ შინამეურნეობებში მცხოვრები ბავშვების წილმა ოდნავ დაიწია 27.1%-დან 26.8%-მდე. ფარდობითი სიღარიბის ზღვარს ქვემოთ მცხოვრები პენსიონერების წილი 18.7%-დან 19.3%-მდე გაიზარდა. ამასთანავე, საქართველოში ოჯახების 16.4 %, მთელი მოსახლეობის 18.4%, პენსიონერების 15% და ბავშვების 21.7% ზოგადი სიღარიბის ზღვარს ქვემოთ ცხოვრობს (ზოგადი სიღარიბის ზღვარია დღეში 2.5 აშშ დოლარი, ანუ თვეში 155.1 ლარი ერთ ეკვივალენტურ ზრდასრულ პირზე გაანგარიშებით)", _ აღნიშნულია კვლევაში.
რაც შეეხება საარსებო მინიმუმს, "იუნისეფის" კვლევის თანახმად, თვეში 139.8 ლარი ერთ ეკვივალენტურ ზრდასრულ პირზე გაანგარიშებით, 2015 წელს ოჯახების 11.9%, მთელი მოსახლეობის 13.3%, პენსიონერების 10.5% და ბავშვების 15.6% ამ ზღვარს ქვემოთ ცხოვრობდა.
"იმის მიუხედავად, რომ საარსებო მინიმუმის ზღვარს ქვემოთ მცხოვრები ბავშვების წილი მნიშვნელოვნად შემცირდა, ყოველი მეექვსე ბავშვი ისეთ შინამეურნეობაში ცხოვრობს, სადაც შინამეურნეობის წევრთა მინიმალური საჭიროებები დაუკმაყოფილებელია.
2015 წელს შინამეურნეობების 38.5%-ში მინიმუმ ერთი ბავშვი ცხოვრობდა. კვლევის ოთხივე რაუნდმა აჩვენა, რომ ბავშვიან შინამეურნეობებს შორის სიღარიბის მაჩვენებლები უფრო მაღალი იყო. შინამეურნეობებში ბავშვთა რაოდენობის ზრდასთან ერთად მნიშვნელოვნად იზრდება ფარდობითი და ზოგადი სიღარიბის მაჩვენებლებიც. ფარდობითი სიღარიბის ზღვრით თუ ვიმსჯელებთ, ერთ ან ორბავშვიანი ოჯახების 24.5% სიღარიბეში ცხოვრობს. ეს ციფრი თითქმის 32%-მდე იზრდება, როცა საქმე სამ ან მეტ ბავშვიან შინამეურნეობებს ეხება. კვლევის შედეგად კიდევ ორი საინტერესო გარემოება გამოვლინდა: სიღარიბის ყველა დონეზე, ღარიბ ოჯახებში მცხოვრები ბავშვების პროცენტული მაჩვენებელი კვლავაც უფრო მაღალია, ვიდრე მთელი მოსახლეობის ან პენსიონერთა პროცენტული მაჩვენებელი. ამასთან ერთად, შინამეურნეობებში, მთლიან მოსახლეობასა თუ ბავშვებში სიღარიბის დაბალი მაჩვენებელი, როგორც წესი, პირდაპირ კავშირშია ოჯახებში ზრდასრულთა განათლების უფრო მაღალ დონესთან და შინამეურნეობაში რეგულარულად დასაქმებული წევრის ყოლა ორჯერ და მეტად ამცირებს ბავშვთა ფარდობითი სიღარიბის რისკს", _ ნათქვამია კვლევაში.
"იუნისეფის" მოსახლეობის კეთილდღეობის კვლევა ყოველ ორ წელიწადში ერთხელ ტარდება და სწავლობს ოჯახებს საქართველოს ხელისუფლების მიერ კონტროლირებულ ტერიტორიებზე. 2015 წლის კვლევამ შეისწავლა სამომხმარებლო სიღარიბის,მატერიალური დეპრივაციის, სუბიექტური სიღარიბისა და სოციალური უთანასწორობის მაჩვენებლები.
მოსახლეობის კეთილდღეობის კვლევის პრეზენტაცია გაეროს ბავშვთა ფონდის 70 წლისთავისადმი მიძღვნილი ღონისძიებების ნაწილია.
ამავე თემაზე:
ყოველი მეხუთე ბავშვი სიღარიბის ზღვარს მიღმა ცხოვრობს _"იუნისეფი"
