3 ბინა თბილისის ცენტრალურ უბანში, 6 მიწის ნაკვეთი, ორი არასაცხოვრებელი ფართი ავტოფარეხი, ავტომობილი და 3 მილიონ დოლარზე მეტი საბანკო ანგარიშებზე – ეს საგარეო საქმეთა მინისტრის მოადგილის, ხათუნა თოთლაძის ოჯახის ქონებაა, რომლის შესახებაც 2016 წლის 1 დეკემბერს შევსებულ დეკლარაციაშია აღნიშნული.
ქონება
ქონებრივი დეკლარაციის მიხედვით, მინისტრის მოადგილე ხათუნა თოთლაძე თბილისში ი.ჭავჭავაძის გამზირზე, 120.00 კვ.მ-ის ფართობისა და ნაფარეულის ქუჩაზე მდებარე 110.00 კვ.მ-ის ფართობის ბინებს ფლობს.
მისი მეუღლე, დიზაინერი, ავთანდილ ცქვიტინიძე კი, ყიფშიძის ქუჩაზე მდებარე 151.00 კვ.მ-ის ფართობის ბინის მფლობელია.
გარდა ამისა, ოჯახის საკუთრებაშია 6 მიწის ნაკვეთი:
თბილისში, ვ.ივერიელის ქუჩაზე მდებარე 1267.00 კვ.მ-ის ფართობის მიწის ნაკვეთი ხათუნა თოთლაძის საკუთრებაა; ოზურგეთში, სოფელი ბახვში მდებარე 7500.00 კვ.მ-ის ფართობის სასოფლო-სამეურნეო მიწის ნაკვეთი ავთანდილ ცქვიტინიძეს ეკუთვნის; მის საკუთრებაშია ასევე, დაბა ურეკში მდებარე არასასოფლო სამეურნეო მიწის ნაკვეთი, რომლის ფართობიც – 463.00 კვ.მ-ია; ასევე, თბილისში, წყნეთის სატყეო ტერიტორიაზე მდებარე 700.00 კვ.მ-ის ფართობის სასოფლო-სამეურნეო მიწის ნაკვეთი; 700.00 კვ. მი-ის ფართობის მიწის ნაკვეთი წავკისში და თბილისში, აგრარული უნივერსიტეტის დასახლებაში მდებარე , 989.00 კვ.მ-ის ფართობის მიწის ნაკვეთი, რომელიც ავთანდილ ცქვიტინიძემ 2016 წლის თებერვალში 67000.00 დოლარად შეიძინა.
ხათუნა თოთლაძე ასევე ფლობს, თბილისში ი.ჭავჭავაძის გამზირზე მდებარე 120.00 კვ.მ-ის ფართობის არასაცხოვრებელი ფართს. ავთანდილ ცქვიტინიძის საკუთრებაში კი, თბილისში, კოტე აფხაზის ქუჩაზე მდებარე 640.00 კვ.მ-ის არასაცხოვრებელი ფართია.
ასევე, ავთანდილი ცქვიტინიძის საკუთრებაშია ნაფარეულის ქუჩაზე მდებარე 30.00 კვ.მ-ის ფართობის ავტოფარეხი.
გარდა ამისა, დეკლარაციის მიხედვით, ხათუნა თოთლაძე ფლობს 2013 წელს გამოშვებულ მსუბუქ ავტომანქანა Mersedes ML-ს.
ფინანსები
რაც შეეხება ოჯახის შემოსავლებს, როგორც ქონებრივ დეკლარაციაშია აღნიშნული, ხათუნა თოთლაძემ საქართველოს საგარეო საქმეთა სამინისტროდან, სადაც მას მინისტრის მოადგილის თანამდებობა უკავია, 76 160.00 ლარის შემოსავალი აქვს მიღებული, რაც წინა წლის შემოსავალთან შედარებით 22 020 ლარით მეტია.
თბილისის სახელმწიფო უნივერსიტეტიდან (ლექტორი) კი, თოთლაძეს- 1200.00 ლარი მიუღია;
რაც შეეხება ავთანდილ ცქვიტინიძის შემოსავლებს, შ.პ.ს. "ავთანდილის" დირექტორის თანამდებობიდან 11000.00 ლარის შემოსავალი აქვს მიღებული.
გარდა ამისა, ცქვიტინიძე, 2016 წლის 16 იანვრიდან, შპს "ავთანდილ ცქვიტინიძე"-ს (საქართველო, თბილისი, აღმაშენებლის N175) დირექტორ/დამფუძნებელია, თუმცა გასულ წელს ამ შპს-დან შემოსავალი მირებული არ აქვს.
ამასთანავე, ცქვიტინიძე შ.პ.ს. ჯ-მანია-ს( საქართველო, თბილისი, აღმაშენებლის 29/5) – 34% -იანი წილის მფლობელი და პარტნიორია 2007 წლის 17 ივლისიდან. დეკლარაციის თანახმად კი, შემოსავალი არც ამ შპს-დან მიუღია.
აღსანიშნავია, რომ 2016 წლის 12 სექტემბერს, ორგანიზაცია "საერთაშორისო გამჭვირვალობა – საქართველოს" მიერ გამოქვეყნებულ კვლევაში, რომელიც თანამდებობის პირების დეკლარაციებში უზუსტობებს ეხება, ნათქვამია, რომ "საგარეო საქმეთა მინისტრის მოადგილის ხათუნა თოთლაძის მეუღლე, ავთანდილ ცქვიტინიძე აქტიურ სამეწარმეო საქმიანობას ეწევა. ცქვიტინიძის სახელზე მეწარმეთა და არასამეწარმეო იურიდიულ პირთა რეესტრში, აღრიცხულ საწარმოთაგან, ხათუნა თოთლაძის ქონებრივ დეკლარაციაში მხოლოდ შპს ავთანდილ ცქვიტინიძე ფიქსირდება. თუმცა დეკლარირებული არ არის შპს "ავთანდილი” და შპს ჯ–მანია, რომელთა 100% წილის მფლობელიც აგრეთვე ავთანდილ ცქვიტინიძეა". 2016 წელს შევსებულ დეკლარაციაში შპს-ები აღნიშნულია, თუმცა, შპს ჯ-მანია-ში ცქვიტინიძის წილი 34%-ია მითითებული, ორგანიზაციის ცნობით კი, მისი წილობრივი მაჩვენებლი 100%-ია.
გარდა ამისა, ოჯახმა, გასულ წელს, საერთო ჯამში, საპროცენტო სარგებლიდან 240 890,21 დოლარი და 4825.05 ლარი მიიღო.
კერძოდ, ხათუნა თოთლაძის საპროცენტო სარგებელი, გასულ წელს, 235 745.81 დოლარი იყო, ხოლო ავთანდილ ცქვიტინიძის საპროცენტო სარგებელი – 5146,40 დოლარი და 4825,05 ლარი.
რაც შეეხება ოჯახის ფინანსურ მდგომარეობას, დეკლარაციის შევსების მომენტში, თოთლაძის ოჯახს მხოლოდ ანაბრებზე 3 174 847 დოლარი და 3456.31 ლარი აქვს.
კერძოდ, თოთლაძის სახელზე არსებულ სამ ანაბარზე 2 მილიონ 52 000 დოლარია "თი ბი სი" ბანკში. მისი შვილის, ანასტასია ცქვიტინიძის სახელზე არსებულ ანაბარზე კი ამავე ბანკში, 1 108 200 დოლარი ირიცხება. ავთანდილ ცქვიტინიძის ანაბარზე საქართველოს ბანკში – 520 ლარია; ტერაბანკის ანაბარზე 14647 დოლარი, ხოლო "თი ბისი ბანკის" ანაბარზე კი –2936.31 ლარი.
გარდა ამისა, დეკლარაციის შევსების მომენტში, ხათუნა თოთლაძის მიმდინარე ანგარიშებზე ჯამში 969999.88 დოლარი, 87 298 ლარი და 234,54 ევრო იყო.
ავთანდილ ცქვიტინიძის მიმდინარე ანგარიშებზე კი, 594.93 ლარი, 4915,06 ევრო და 24390,30 დოლარია.
ამასთანავე, დეკლარაციის შევსებისას, ხათუნა თოთლაძეს ნაღდი ფულის სახით 12000 ევრო ჰქონდა. თოთლაძე ამასთანავე ფლობს "თი-ბი-სი" ბანკის 100 ცალ ობლიგაციას, თითოს ღირებულება კი, 10000.00 დოლარია.
სესხები
დეკლარაციის მიხედვით, ავთანდილ ცქვიტინიძის სახელზე ორი იპოთეკური სესხია.
50000.00-დოლარიანი იპოთეკური სესხი 2006 წელს აქვს აღებული და ვადა 2016 წლის 15 აგვისტოს ამოეწურა. პროცენტის გადასახდელად კი ერთი წლის განმავლობაში 9089.72 დოლარი აქვს გაცემული;
რაც შეეხება 430 000.00-დოლარიან იპოთეკურ სესხს, ცქვიტინიძეს 2012 წელს აუღია და ვადა 2023 წელს ეწურება. პროცენტის დასაფარად კი, 35859,32 დოლარის გასავალი ჰქონდა.
დეკლარაციაში ასევე აღნიშნულია, რომ ავთანდილ ცქვიტინიძემ 2016 წლის 10 თებერვალს მიწის ნაკვეთის ნასყიდობის ხელშეკრულება გააფორმა, რომლის ღირებულება 67 000 დოლარია.
გასავლები
დეკლარაციის თანახმად, ავთანდილ ცქვიტინიძემ გასულ წელს 4500 ევრო სწავლისთვის გადაიხადა. ხათუნა თოთლაძემ კი, სამოგზაურო ხარჯი – 17 000 ევრო დაფარა.
