თბილისის საქალაქო სასამართლომ გამამტყუნებელი განაჩენი დაადგინა სისხლის სამართლის საქმეზე ბრალდებულ – რომან შამათავას მიმართ დათო ც.-სა და პაატა ქ.-ს უმწეო მდგომარეობაში, განზრახ მკვლელობის მცდელობის საქმეზე დამამძიმებელ გარემოებებში და მას სასჯელის სახედ და ზომად 16 წლით თავისუფლების აღკვეთა მიუსაჯა.
სასამართლოს ინფორმაციით, 2012 წლის 28 დეკემბრის ”ამნისტიის შესახებ” საქართველოს კანონისა და შთანთქმის პრინციპის გამოყენებით, საბოლოოდ სასჯელის სახედ და ზომად რომან შამათავას 8 წლით თავისუფლების აღკვეთა განესაზღვრა.
წარდგენილი ბრალის თანახმად, რომან შამათავას ბრალად ედებოდა უმწეო მდგომარეობაში მყოფის განზრახ მკვლელობა (2 ეპიზოდი) და თავისუფლების უკანონო აღიკვეთა სხვა დანაშაულის გაადვილების მიზნით, ასევე პაატა ქ.-ს მიმართ ჩადენილი ორგანიზებული ჯგუფის მიერ.
საქმის მასალების თანახმად, რომან შამათავა 2007 წელს დაინიშნა საქართველოს შსს კ.უ.დ-ის აფხაზეთის ა.რ. მთავარი სამმართველოს უფროსის თანამდებობაზე. 2008 წლის ზაფხულში, მან შურისძიების მოტივით, მართლმსაჯულების გვერდის ავლის გზით განიზრახა სიკვდილით დაესაჯა სამეგრელო – ზემო სვანეთის სატყეო სამმართველოს რეინჯერი დათო ც. და საქართველოს თავდაცვის სამინისტროს დაზვერვის თანამშრომელი პაატა ქ., რომლებიც შამათავას ინფორმაციით თანამშრომლობდნენ აფხაზეთის სეპარატისტული მთავრობის სპეცსამსახურებთან. შამათავას დავალებით კ.უ.დ.-ის თანამშრომლებმა, 10 დღის ინტერვალით, დათო ც. და პაატა ქ. ჩაიყვანეს ბათუმში, ყოფილი გემთმშენებელი ქარხნის ტერიტორიაზე, მოათავსეს კატარღის ბორტზე და გაიყვანეს ზღვაში, რითაც უკანონოდ აღუკვეთეს თავისუფლება. რომან შამათავამ, უმწეო მდგომარეობაში მყოფ პირებს, რომლებსაც ახვეული ჰქონდათ თვალები, თანნაქონი ცეცხლსასროლი იარაღიდან თავში ერთჯერადი გასროლით სასიკვდილო ჭრილობები მიაყენა, ხოლო დანაშაულის კვალის მოსპობის მიზნით, გვამები ჩააგდო ზღვაში.
თბილისის საქალაქო სასამართლომ იმ გარემოებათა გათვალისწინებით, რომ საქმეში ვერ იქნა წარმოდგენილი დაზარალებულთა გვამები, შესაბამისად, სიკვდილის გამომწვევი მიზეზის დამდგენი სასამართლო-სამედიცინო ექსპერტიზის დასკვნა, ასევე ვერ იქნა ამოღებული და შესწავლილი დანაშაულის ჩადენის იარაღი, მასრები და გულა, რითაც შესაძლოა გამოწვეული იყო გარდაცვალება, წარდგენილი ბრალი გადააკვალიფიცირა და პირის მსჯავრდება მოხდა დამამძიმებელ გარემოებებში, განზრახ მკვლელობის მცდელობის მუხლით გათვალისწინებული დანაშაულისათვის.
ამასთან, სასამართლომ კვალიფიკაცია შეუცვალა ორგანიზებული ჯგუფის მიერ ჩადენილი თავისუფლების უკანონო აღკვეთისათვის პაატა ქ.-ს ეპიზოდში წარდგენილ ბრალდებას, ვინაიდან მიიჩნია, რომ საქმეში წარმოდგენილი მტკიცებულებებით ვერ დადასტურდა თავდაპირველად წარდგენილი ბრალის შემადგენლობა, შესაბამისად შამათავას მსჯავრი დაედო თავისუფლების უკანონო აღკვეთის ბრალდებისათვის, ჩადენილი სხვა დანაშაულის გაადვილების მიზნით.
განაჩენი შეიძლება გასაჩივრდეს სარეზოლუციო ნაწილის გამოცხადებიდან ერთი თვის ვადაში.
