"აგორებენ ათასგვარ ჭორებს და გარწმუნებთ, რომ ამ ჭორების გამავრცელებლები არ არიან საზოგადოებრივი მაუწყებლის ბედით დაიტერესებულნი, _ ამბობს"გურია ნიუსთან" საუბრისას მაუწყებლის გენერალური დირექტორი ვასილ მაღლაფერიძე და მედიაკოალიციის მიერ დღეს გავრცელებულ ინფორმაციაზე, რომლის თანახმად საზოგადოებრივ მაუწყებელზე გადაცემა "რეალური სივრცე" იხურება პირველ კომენტარს "გურია ნიუსთან" აკეთებს:
_ დღეს გავრცელებული ინფორმაცია ჭორია. სინამდვილეში, ორშაბათს, 12 საათზე აღმასრულებელ საბჭოსთან ერთaდ წარმოვადგენ ხედვას. ჭორებს აგორებენ ისინი, ვისაც უნდა, რომ დააქციოს საზოგადოებრივი მაუწყებელი, როგორც აქცევდა აქამდე. ამიტომ, ასე აგორებენ ათასგვარ ჭორებს და გარწმუნებთ, რომ ამ ჭორების გამავრცელებლები არ არიან საზოგადოებრივი მაუწყებლის ბედით დაინტერესებულნი, _ ამბობს მაღლაფერიძე.
კითხვაზე _ იხურება თუ არა გადაცემა "რეალური სივრცე", გვპასუხობს, რომ ეს მისი კომპეტენცია არ არის:
_ მე არ ვიცი. რაიმეს დახურვა და არ დახურვა საერთოდ არ არის ჩემი კომპეტენცია. ჩემი კომპენტენცია ხედვის წამოდგენაა, რომელსაც აღმასრულებელ საბჭოსთან ერთად წარმოვადგენ ორშაბათს.
რას ლაპარაკობოს მედიაკოალიცია და როგორ იქცა ის საზოგადოებრივი მაუწყებლის არამკითხე პრესცენტრად, მე არ ვიცი. კოალიციამ საიდანღაც მიიღო ეს ინფორმაცია და მე მეგონა მათი ფუნქცია ექსპერტული იყო და ახლა გახდა საგენტო, _ ამბობს მაღლაფერიძე.
საზოგადოებრივი მაუწყებლის დირექტორი ამბობს, რომ ორშაბათიდან თეორული მსჯელობა იწყება:
_ აღმასრულებელ საბჭოსთან ერთად ხედვას წარმოვადგენ და ვისაც აინტერესებს ის უნდა მოვიდეს ორშაბათს, 12 საათზე. ეს არის თეორიული მსჯელობის დასაწყისი. ვისაც ეს აინტერესებს მოვა და იმსჯელებს და ვისაც არ აინტერესებს, ვინ გაიტაცა აქტიურმა ჟურნალისტიკამ, მათ შორის მედიაკოალიციამ, გააგრძელოს თავისი ამბები. ამას ხელს ვერ შევუშლი, _ აღნიშნა გურია ნიუსთან" საუბრისას ვასილ მაღლაფერიძემ.
ცნობისთვის, კოალიცია "მედიის ადვოკატირებისთვის" განცხადებით, საზოგადოებრივი მაუწყებლის მენეჯმენტმა მიიღო გადაწყვეტილება გადაცემა "რეალური სივრცის" დახურვის შესახებ. ასევე იგეგმება მაუწყებლის სხვა საზოგადოებრივ-პოლიტიკური გადაცემების დახურვა და თანამშრომლების მასობრივი დათხოვნა.
"რეალური სივრცე" თავისი არსით არის ჭეშმარიტად საზოგადოებრივი პლატფორმა, ქართულ მედია სივრცეში ერთ-ერთი წარმატებული თოქ-შოუ, რომელიც სიღრმისეულად, სხვადასხვა კუთხით განიხილავს აქტუალურ და მწვავე თემებს. ამისათვის პროექტს არა ერთი პროფესიული ჯილდო და აღიარება ერგო,
კოალიცია მიიჩნევს, რომ საზოგადოებრივი მაუწყებლის არც ერთი გადაცემა არ უნდა დაიხუროს მანამ, სანამ გადაწყვეტილების მიმღები პირები არ დაასაბუთებენ გადაცემების დახურვის გადაწყვეტილებას და არ წარმოადგენენ კონკრეტულ სამაუწყებლო ბადეს თუ რას სთავაზობენ მაყურებელს სანაცვლოდ. 2017 წელს ქვეყანაში ტარდება თვითმმართველოვის არჩვნები, მიმდინარეობს საკონსტიტუციო რეფორმა. საზოგადოებრივი მაუწყებელი ამ მნიშვნელოვან პროცესებს უნდა აშუქებდეს ინტენსიურად, უწყვეტ რეჟიმში.
კოალიცია კატეგორიულად ეწინააღმდეგება პროცესების ამგვარ განვითარებას და მოუწოდებს საზოგადოებრივი მაუწყებლის სამეურვეო საბჭოს საჯარო გახადოს დაგეგმილი შეხვედრა გენერალურ დირექტორთან და სხდომის ვიდეო განათავსოს მაუწყებლის ვებგვერდზე, რომ დაინტერესებულ საზოგადოებას ჰქონდეს საშუალება გაეცნოს გენერალური დირექტორის გეგმებს", _ აღნიშნულია კოალიციის განცხადებაში რომელსაც ხელს აწერენ მასში შემავალი ორგანიზაციები: საქართველოს ახალგაზრდა იურისტთა ასოციაცია , მედიაკლუბი, საქართველოს ჟურნალისტური ეთიკის ქარტია, ინფორმაციის თავისუფლების განვითარების ინსტიტუტი, ფონდი "ღია საზოგადოება – საქართველო", საქართველოს რეგიონულ მაუწყებელთა ასოციაცია, არასამთავრობო ორგანიზაცია "სამოქალაქო საზოგადოებისათვის", ლევან მიქელაძის სახელობის ფონდი, საქართველოს რეგიონული მედიის ასოციაცია, სატელევიზიო ქსელი, საქართველოს მცირე და საშუალო სატელეკომუნიკაციო ოპერატორების ასოციაცია, მედიის მხარდაჭერის ფონდი
