ოზურგეთის მუნიციპალიტეტის სოფელ თხინვალის მოსახლეობის ნაწილი დახმარებას და თოვლისგან სოფლის გზის გაწმენდას ითხოვს. მოსახლეობის პრეტენზიებს გამგებლის წარმომადგენელი და მაჟორიტარი დეპუტატი არ იზიარებს. მათი ინფორმაციით, გზები ყველა უბანში გაწმენდილია.
"გზები საერთოდ არ გაწმენდილა თხინვალში, ბავშვები სკოლაში ვერ მიდიან. მანქანა ეზოდან ვერ გადადის და კაცი ვერ მოძრაობს. იქნებ დაგვეხმაროთ. მე-4 ბრიგადაში ერთ ოჯახში ორი მოხუცია 80 წლის. მეორე ოჯახში ერთი მარტოხელა მოხუცი ცხოვრობს და სანამ რამე დაემართებათ, იქნებ მოგვაქციონ ყურადღება. უბანში კაციც კი არ არის გზა, ჩვენით რომ გავწმინდოთ. ამხელა უბანი უპატრონოდ დატოვეს. ცოცხლები ვართ ჩვენ ჯერ, ცოცხლები, გვჭირდება მოხედვა, პატრონი უნდა სოფელს.
რამდენიმე დღის წინ სოფელში მიცვალებული გყავდათ. ოჯახმა ტრაქტორი დაიქირავა და გზა ისე გაწმინდა. 80 წლის კაცი გავიდა და გამგებლის წარმომადგენელს სთხოვა დახმარება, ომარი დოლიძემ უთხრა, დიდი თოვლი რომ იქნება, 1 მეტრს გადაცილდება, მერე გავთოვლავთო; მაშინ გამოვიძახებთ ტრაქტორსო. ეს არის სამართალი? სასწრაფო და წამალი რომ დაგვჭირდეს, ამის საშუალება არ არის დღეს. 4 ოჯახი ვართ ასე მოწყვეტილი სოფელს", _ უთხრა "გურია ნიუსს" თხინვალის მცხოვრებმა ნაილი ბაჯელიძემ.
"გურია ნიუსი" ინფორმაციის გადასამოწმებლად, სოფელ თხინვალში ოზურგეთის მუნიციპალიტეტის გამგებლის წარმომადგენლის თანაშემწეს ომარ დოლიძეს დაუკავშირდა, რომელიც ჩვენთან საუბრისას ამბობს, რომ სოფელში შიდა საუბნო გზების ნაწილის გაწმენდა ამ დრომდე ვერ მოხერხდა.
"არ არის ზოგი უბანი გაწმენდილი, მაგრამ დღეს უნდა მოვიდეს ტრაქტორი და გავწმენდთ. მე-5, მე-6 უბნები არ არის გაწმენდილი. მე-4 ნაწილობრივ გაწმენდილია, ნაწილი გასაწმენდია ისევ. გამგებელი დაპირებულია ტრაქტორს, თუ მოვიდა, 1 საათის სამუშაოა მარტო და ამასაც დავამთავრებთ", _ აცხადებს დოლიძე.
რაც შეეხება სოფელ თხინვალის მკვიდრის, ნაილი ბაჯელიძის მიერ მოწოდებულ ინფორმაციას, რომ ომარ დოლიძემ მათ შეუსაბამო პასუხი გასცა _ "დიდი თოვლი რომ იქნება, 1 მეტრს გადაცილდება, მერე გავთოვლავთო; მაშინ გამოვიძახებთ ტრაქტორსო", _ დოლიძე აღნიშნულს "ჭორს" უწოდებს.
"მე მსგავსი არაფერი მითქვამს მოსახლეობისთვის. გამგებელი მე არ ვარ. გამგებლის წარმომადგენლის თანაშემწე ვარ. მე რა უფლება მქონდა ეგ მეთქვა? ტყუილს ამბობს ხალხი, ნუ უჯერებთ ჭორებს", _ აცხადებს დოლიძე.
სოფელ თხინვალის მაჟორიტარი დეპუტატი მუნიციპალიტეტის საკრებულოში, ბიძინა გობრონიძე, "გურია ნიუსთან" საუბრისას ამბობს, რომ თხინვალში როგორც ცენტრალური, ასევე შიდა საუბნო გზები გაწმენდილია.
"ახლა მოვდივარ სოფლიდან, მეც მივიღე ინფორმაცია, რომ მასეთ ინტრიგებს ჰქონდა ადგილი. ვიღაცეებიდან წამოვიდა ხმები, რომ არ არის გაწმენდილი გზა. გაღიზიანებული ვარ მაგ თემასთან დაკავშირებით. ყველაზე პირველად ეს სოფელი გავწმინდეთ, რადგან სოფელში მიცვალებული იყო. დასაფლავების დღეს გავწმინდეთ როგორც ოჯახამდე მისასვლელი, ასევე სასაფლაოს გზა. პირველი ჩვენს სოფელში ჩამოვიდა ტექნიკა. ყველა უბანში მიისვლება მანქანით. არის ადგილები, სადაც "ჟიგულის" მარკის ავტომობილები დადიან. ყველგან არის მისასვლელი გზა, მაგრამ არ მიკვირს, არიან სოფელში მოსახლეობის ნაწილი, რომლებსაც არ უხარიათ რომ რაღაც კეთდება და ინტრიგებს ხლართავენ.
არ ვადასტურებ სოფლის მოსახლეობის მიერ მოწოდებულ ინფორმაციას, რომ გზა გაწმენდილი არ არის. არ არსებობს მანქანა, რომელიც სოფლის ცენტრში ვერ გაივლის. შიდა საუბრნო გზებზე ყველგან შესაძლებელია გადაადგილება. არის ცოტა შეღმართიანი ადგილები, სადაც მაღალი გამავლობის მანქანების გავლაა შესაძლებელი, მაგრამ ისე, რომ მოსახლეობის ნაწილი მოწყვეტილი იყოს სოფელს, არ არის არსად. 24-საათიან რეჟიმში ვმუშაობთ გამგებელთან ერთად, თუ ვინმეს დახმარება დასჭირდება, ვეხმარებით", _ აცხადებს გობრობიძე.
რაც შეეხება ომარ დოლიძის მიერ "გურია ნიუსისთვის" მოწოდებულ ინფორმაციას, გობრონიძე აცხადებს, რომ ეს სიმართლეს არ შეესაბამება.
"არ ვიცი რა გითხრათ დოლიძემ, ან რატომ გააკეთა ასეთი კომენტარი, რომ გზა გაწმენდილი არ არის, მაგრამ ნამდვილად ვერ დავეთანხმები. მაგას ეგ ინფორმაცია არ უნდა მოეცა. გზა ყველგან გაწმენდილია, როგორც უკვე გითხარით. შესაძლოა ყველა ჩიხში ვერ შევიდეს ტრაქტორი, ამას ვერ მოგატყუებთ, მაგრამ უბნები რომ გაწმენდილია, ფაქტია", _ აცხადებს გობრონიძე.
