საფეხბურთო კლუბ ლანჩხუთის “გურიას” ვალებთან დაკავშირებით, რომელიც, დაახლოებით, 800 ათას ლარს შეადგენს, ბოლო დროს არა ერთი ბრალდება ისმის და ეს თემა ერთ-ერთ აქტუალურ საგნად იქცა საზოგადოებისთვის.
არაერთხელ გაჟღერდა მმართველი გუნდის მხრიდან საკრებულოს სხდომებზე, რომ “გურიას” ვალები 2011 წლიდან მოჰყვება და ამიტომაცაა კლუბი ამ დღეში. ბრალდებების საპასუხოდ, საკრებულოში მოქმედი ფრაქციის “ლანჩხუთი _ ევროატლანტიკური მომავლისთვის” სხდომაზე, ყოფილმა გამგებელმა გია გოგუაძემ ის დოკუმენტი გაასაჯაროვა, რომლის საფუძველზეც “გურიამ” 2012 წელს, სს “პროგრეს ბანკისგან” სესხად 250 ათასი ლარი აიღო. ფრაქციის სხდომაზე კლუბის ხელმძღვანელობაც იყო მიწვეული, მაგრამ იქ არავინ მისულა.
“უკვე საკრებულოსა თუ გამგეობაში ყბადაღებულ თემად იქცა, რომ თითქოს ვალები, რომელიც “გურიას” აქვს, 2011 წლიდან მოჰყვება, თითქოს ჩვენ დავაქციეთ ყველაფერი. სამართალდამცავი ორგანოები სწავლობენ “გურიას” საკითხს და იმედია, ყველაფერი გაირკვევა”, _ თქვა გია გოგუაძემ.
გოგუაძის მიერ წარმოდგენილ დოკუმენტში კი, რომელსაც ხელს გამგებლის მოვალეობის მაშინდელი შემსრულებელი კახა ასკურავა აწერს და 2012 წლის ექვსი ნოემბრითაა დათარიღებული, წერია, რომ “ლანჩხუთის მუნიციპალიტეტის გამგეობა თანხმობას აძლევს ა(ა)იპ ლანჩხუთის მუნიციპალიტეტის გამგეობის საფეხბურთო კლუბის დირექტორს, ირაკლი ფაცურიას სს “პროგრეს ბანკთან” ხელი მოაწეროს საკრედიტო ხელშეკრულებას, რომლის მაქსიმალური თანხა განისაზღვროს 250 ათასი ლარით, წლიური საპროცენტო სარგებელი _ არა უმეტეს, 20%-ისა, ხოლო საკრედიტო ხელშეკრულებით განსაზღვრული კრედიტით სარგებლობის ვადა _ 2013 წლის მარტის ჩათვლით”.
იმავე საგარანტიო წერილში, რომელიც გამგეობამ სს “პროგრეს ბანკს” გაუგზავნა, მითითებულია, რომ 2013 წლის განმავლობაში ლანჩხუთის მუნიციპალიტეტის ბიუჯეტიდან ა(ა)იპ ლანჩხუთის მუნიციპალიტეტის გამგეობის საფეხბურთო კლუბ “გურიას” გამოეყოფა 400 ათასი ლარი “პროგრეს ბანკში” გახსნილ ანგარიშზე თანხის ჩარიცხვის გზით, საიდანაც არაუგვიანეს 2013 წლის მარტისა, პირველ რიგში, მოხდება ა(ა)იპ საფეხბურთო კლუბ ლანჩხუთის “გურიას” მიერ ნაკისრი საკრედიტო ვალდებულებების სრულად შესრულება სს “პროგრეს ბანკის” მიმართ”.
როგორც გოგუაძე ამბობს, იმ პერიოდში “გურია” მართლაც უფულოდ იყო: “ეს ის პერიოდი იყო, როცა კლუბმა პირველად მიიღო სპონსორისგან 148 ათასი ლარი. გადაწყვეტილი იყო, რომ, როგორც კი არჩევნები ჩაივლიდა, გუნდში სპონსორი მოვიდოდა. პირადად მე, საჭირო ფინანსების არქონის გამო, ყოველთვის უარს ვამბობდი უმაღლეს ლიგაზე. მხოლოდ იმიტომ დავთანხმდი სტადიონის მშენებლობასა და გუნდის უმაღლეს ლიგაში გადასვლას, რომ სპონსორი აპირებდა მოსვლას. თუმცა, წავიდა ჩვენი ხელისუფლება და ყველაფერი რადიკალურად შეიცვალა”, _ ამბობს ყოფილი გამგებელი, რომელსაც ოპონენტები ხშირად ბრალად სწორედ სტადიონის თემას უყენებენ.
“მაშინ, საპარლამენტო არჩევნებში გამარჯვებული თემურ ჩხაიძე გახდა იმის გარანტი, რომ “პროგრეს ბანკი” სესხად “გურიას” მისცემდა 250 ათას ლარს. ამ სესხის უზრუნველყოფა იყო გამგებლის ოფიციალური წერილი, სადაც აღნიშნულია, რომ 2013 წლის ბიუჯეტში ლანჩხუთის “გურიას” აძლევს 400 ათას ლარს, დამატებით სტადიონს 70 ათას ლარს და 2013 წლის მარტის ბოლოსთვის გამგეობა უზრუნველყოფს ამ ვალების დაფარვას.
ეს ვალი ჩვენ არ დაგვიტოვებია, როგორც ამას გვაბრალებენ. ეს ვალი ახალი ხელისუფლების პერიოდში აიღო კლუბმა დეპუტატის მოთხოვნით, რომელმაც იმთავითვე თქვა, რომ ის პასუხისმგებელი იყო მხოლოდ ვალის აღებაზე და არა გასტუმრებაზე. როცა ასკურავა წავიდა გამგებლის პოსტიდან, მან ბიუჯეტში დატოვა ამ ვალის უზრუნველყოფა”, _ აღნიშნა გოგუაძემ.
საკითხთან დაკავშირებით კომენტარი კახა ასკურავამაც გააკეთა, რომელიც იმ პერიოდისთვის გამგებლის მოვალეობის შემსრულებელი იყო:
“მაშინ მოქმედი თვითმმართველობის კოდექსით მე არ ვიყავი უფლებამოსილი პირი. საკრებულოს თავმჯდომარე იყო რეზო ჩიტიძე, რომელმაც მითხრა, რომ მე ამაზე პასუხისმგებლობას ვერ ავიღებ, ხელები დამიბანია ამ საქმიდანო. იმის გამო, რომ ჩემს პერიოდში გუნდი არ დაშლილიყო, წავედი ამაზე”, _ თქვა კახა ასკურავამ.
რატომ არ შესრულდა “გურიას” მიერ “პროგრეს ბანკის” მიმართ ნაკისრი ვალდებულების სრულად შესრულება დათქმულ დროში, ამ საკითხზე კომენტარისთვის დაკავშირება ასკურავას “მემკვიდრე” ზაზა ურუშაძესთანაც ვცადეთ, თუმცა, მან ჩვენს სატელეფონო ზარს არ უპასუხა.
