“მოგებული ტენდერი წაართვეს სხვა კომპანიას და მისცეს შპს “პირამიდას“

სახელმწიფო უსაფრთხოების სამსახურმა დღეს, ქრთამის აღების ფაქტზე ქალაქ ოზურგეთის მუნიციპალიტეტის საკრებულოს თავმჯდომარე გელაკობალაძე დააკავა.

2015-2016 წლებში, ქალაქ ოზურგეთის მერიამ შპს „პირამიდას“ საქართველოს ფილიალთან გააფორმა ხელშეკრულებები ქალაქ ოზურგეთის დაზიანებული ქუჩების რეაბილიტაციისა და მდინარე ,,ბჟუჟის“ ნაპირსამაგრი სამუშაოების ჩატარებასთან დაკავშირებით. აღნიშნულმა კომპანიამ ვერ შეძლო ხელშეკრულებებით გათვალისწინებულ ვადაში სამუშაოების დასრულება, რის გამოც, დღის წესრიგში დადგა მასთან ხელშეკრულებების შეწყვეტის საკითხი.

ქალაქ ოზურგეთის საკრებულოს თავმჯდომარე გელა კობალაძე შეხვდა შპს „პირამიდას“ საქართველოს ფილიალის ტექნიკურ მენეჯერს და თავისი თანამდებობის გამოყენებით, დაჰპირდა ზემოხსენებული ხელშეკრულებების ვადების გაგრძელებას და უკვე შესრულებულ სამუშაოებზე მისაღები, დაახლოებით, 150 000 ლარის ჩარიცხვას, რის სანაცვლოდაც ქრთამის სახით მოსთხოვა და აიღო ფულადი თანხა 50 000 ლარის ოდენობით, რა დროსაც იგი სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დააკავეს. გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს (საქართველოს სისხლის სამართლის კოდექსის 338-ე მუხლის მე-3 ნაწილით, რაც სასჯელის სახით ითვალისწინებს თავისუფლების აღკვეთას ვადით 11-დან 15-წლამდე).

ამ ფაქტთან დაკავშირებით კომენტარს აკეთებს ქალაქ ოზურგეთის მუნიციპალიტეტის საკრებულოს დეპუტატი თამარ ნადირიძე.

“ტერიტორიაზე, სადაც სრულდებოდა შპს “პირამიდას“ მიერ სამუშაოები, ნათლად ჩანს უკვე, რომ, ფაქტობრივად, მიტოვებულია სამუშაოები. უკვე წელიწადზე მეტია, ამ კომპანიასთან დაკავშირებით მაქვს ჩემიდა საბუთებული შეხედულებები. აღნიშნულის შეასახებ  მივმართე ქალაქ ოზურგეთის მერიას, როგორც სიტყვიერად, ასევე, წერილობით. შესაბამის ორგანოებს ვთხოვდი, მოეხდინათ რეაგირება. მიმაჩნია, რომ ეს დანაშაული არ არის ცალმხრივი და ამ საქმეში ფიგურირებს არა მარტო საკრებულოს თავმჯდომარე, არამედ ქალაქის მერი და კომპანია “პირამიდა“, რომლის საქმიანობაც შესასწავლია.

თანხის გადარიცხვა, რომლის შემდეგაც სამუშაოს გადავადებას სთხოვდა კობალაძე კომპანიას, არის მერის პრეროგატივა. აქედან გამომდინარე, საკრებულოს თავმჯდომარე მერის გარეშე ვერ განახორციელებდა აღნიშნულს. ტენდერი, რომელიც მოიგო სხვა ორგანიზაციამ აღმოჩნდა  შპს “პირამიდას“ ხელში. ეს ტენდერი 3 მილიონ ლარად არის შეფასებული და, ფაქტობრივად, მილიონ ლარზე მეტი სამუშაოა შესასრულებელი“, _ აღნიშნავს ნადირიძე.   

აღნიშნულ ფაქტთან დაკავშირებით,  ქალაქ ოზურგეთის მერი კომენტარს არ აკეთებს.