“გურია ნიუსის“ წყაროს ინფორმაციით, ოზურგეთის მუნიციპალიტეტის სოფელ გურიანთაში მცხოვრებმა ი.ტ. ცივი იარაღით ამავე სოფელში მცხოვრები ს.მ. დაჭრა. ი.ტ-მ რამდენიმე ჭრილობა მიაყენა დაზარალებულს მუცლის არეში. აღნიშნული ფაქტი გურიანთაში ინციდენტის მონაწილე ერთ-ერთი პირის საკარმიდამო ნაკვეთში მოხდა. დავა აღნიშნულ პირებს შორის დიდი ხანია მიმდინარეობს, რაც საკარმიდამო ნაკვეთებს ეხება. ი. ტ. არაერთი მიწის ნაკვეთის მფლობელია, ს.მ. ინდმეწარმეა, მცირე ბიზნესებით არის დაკავებული და რამდენიმე პროექტს ახორციელებს. მათ მფლობელობაში არსებული მიწის ნაკვეთები ერთმანეთის მოსაზღვრედ მდებარეობს, რაც არის კონფლიქტის კონკრეტული მიზეზია. ს.მ. ამჟამად ოზურგეთის სამედიცინო ცენტრშია მოთავსებული და მას პოლიცია მეთვალყურეობს.
“გურია ნიუსის“ წყაროს ინფორმაციით, აღნიშნულ ინციდენტს ჰყავს არაერთი თვითმხილველი, ასევე, როგორც წყარო ამბობს, პროცესებში ჩართული იყვნენ ე.წ. “ძველი ბიჭები“ დ.კ. და ა.კ. აქედან ერთ-ერთს დაზარალებულთან საერთო ბიზნესი აქვს. აღნიშნული ფაქტთან დაკავშირებით, დაზარალებული ს.მ-ს ოჯახის ახლობლები “გურია ნიუსთან“ ამბობენ, რომ ს.მ. ინციდენტის დღეს მანქანით სამუშაოზე მიდიოდა. ამ დღეს შეხვდა ი.ტ. და მათ შორის ხმამაღალი საუბარი და წაკამათება მომხდარა.
“ი.ტ-ს თვითნებურად ჰქონდა შეღობილი მდინარისპირა თითქმის მთლიანი ზოლი, რაც ხელს უშლიდა საქონლებს წყლის დასალევად მდინარეზე ჩასვლაში. ს.მ. მას სთხოვდა, რომ ღობე გადაეწია და პატარა გზა დაეტოვებინა, რაზეც ი.ტ. წინააღმდეგი ყოფილა და არ ითვალისწინებდა ს.მ. თხოვნას. ი.ტ სასიკვდილოდ გაიმეტა ს.მ. მან რამდენიმე ჭრილობა მიაყენა მუცლის არეში, გადაჭრილი ჰქონად სისხლძარღვები, იქ რომ სხვები არ ყოფილიყვნენ, შეიძლებოდა, მოეკლა კიდეც. შემდეგ ბარძაყში მოხდა სისხლისჩაღვრა, 10 ნაკერი ადევს“, _ ამბობენ ახლობლები “გურია ნიუსთან“. მათივე თქმით, პოლიციას დანმაშავე პირი არ დაუკავებია, პირიქით, “მკურნალიძეების თავდებობით გარეთ არის” (მკურნალაძე კუდ-ის ყოფელი თანამშრომელია).
“საინტერესოა, რა შტატი აქვთ პოლიციაში მკურნალიძეებს, როგორც ვიცით, არანაირი. თუ “ნასედკობას“ არ გამოვრიცხავთ”, _ ამბობენ დაზარალებული ოჯახის ახლობლები.
“გურია ნიუსი“ შეეცადა აღნიშნულ ფაქტთან დაკავშირებით კომენტარი მოეპოვებინა ი.ტ-სგან, თუმცა, მან ჩვენს სატელეფონო ზარებს არ უპასუხა. ოზურგეთის მუნიციპალიტეტის გამგებლის წარმომადგენელი სოფელ გურიანთაში კოტე ჩიკაშუა აღნიშნულ ფაქტს ადასტურებს და ამბობს, რომ მან სხვა დეტალები არ იცის:
“მე ვნახე დაჭრილი საავადმყოფოში, სხვა დეტალები ნამდვილად არ ვიცი“.
შსს პრესსამსახურში აცხადებენ, რომ დაჭრის ფაქტთან დაკავშირებით მიმდინარეობს ინტენსიური საგამოძიებო მოქმედებები. გამოძიება დაწყებულია სსკ 117 მუხლით, რაც ჯანმრთელობის განზრახ მძიმე დაზიანებას გულისხმობს.
