დაუნის სინდრომის საერთაშორისო დღის აღსანიშნავად, ქალაქ ოზურგეთის მერიის ორგანიზებით, პედაგოგთა კავშირის დარბაზში მოეწყო შეხვედრა ქალაქის ტერიტორიაზე მცხოვრებ დაუნის სინდრომის მქონე ბავშვებთან.
_ სიყვარული არ ითვლის ქრომოსომებს! ამ ადამიანებს სჭირდებათ დიდი სიყვარული, რადგან მათ არ იციან შური, ჩვენ _ ვიცით… მათ არ იციან სიძულვილის ენა, ჩვენ _ ვიცით. ამ ადამიანებისთვის ჩვენ გვაქვს ბევრი სითბო, სიყვარული, საჩუქრები, რომელიც ქალაქის მერმა ბეგლარ სიორიძემ მოუმზადა, _ ასე მიესალმა მათ ქალაქ ოზურგეთის მერიის სოციალური სამსახურის უფროსი თამარ დუმბაძე.
ექიმმა ირინა კოპალეიშვილმა ისაუბრა, თუ როგორ იყვნენ, მრავალი წლის წინ, დაუნის სინდრომის მქონე ადამიანები იგნორირებული და დღეს ეს სტიგმა აღარ არსებობს. ეს არის ბედნიერება, რადგან დაუნის სინდრომის მქონენი დღეს ღირსეულად დგანან საკუთარი მეგობრების გარემოცვაში, საზოგადოების ყურადღების ცენტრში და ხდება მათი ღირსების და უფლებების დაცვა, მათ კეთილდღეობაზე ზრუნავენ. ქალაქის მერიას აქვს სოციალური პროგრამა, რომლითაც ერთჯერად დახმარებას უწევენ ასეთ ოჯახებს და ასევე ერთჯერადად უფინანსდებათ სამედიცინო გამოკვლევა.
ლამაზი მუსიკალური ნომრების შესრულების შემდეგ, დაუნის სინდრომის მქონე ბავშვები სამახსოვრო საჩუქრებით დააჯილდოეს, რომელიც მათ ქალაქ ოზურგეთის ვიცე-მერმა ალეკო ბურჭულაძემ, მერის მოადგილემ კობა დუნდუამ და გურიის გუბერნატორის მოადგილემ სოსო ერქომაიშვილმა გადასცეს.
