საფინანსო-საბიუჯეტო კომიტეტის თავმჯდომარის ირაკლი კოვზანაძის განცხადებით, საქართველოს ეკონომიკამ და სახელმწიფო ბიუჯეტმა 2017 წლის დასაწყისშივე კარგი სტარტი აიღო.ამის შესახებ კოვზანაძემ გერმანიის ბუნდესტაგის საფინანსო კომიტეტის თავმჯდომარე ინგრიდ არნდტ-ბრაუერთან შეხვედრისას განაცხადა.
„იანვარში, გასული წლის ამავე პერიოდთან შედარებით, საქართველოს მთლიანი შიგა პროდუქტის ზრდა 5,2% იყო. მნიშვნელოვანი პროგრესი არის ბიუჯეტში საგადასახადო შემოსავლების ზრდის კუთხით. მიმდინარე წელს დაგეგმილია მშპ-ს 4 %-იანი ზრდა. წელს უკვე ამოქმედდა მოგების გადასახადის ე.წ. ესტონური მოდელი. მნიშვნელოვანია, რომ საქართველოს პრემიერ-მინისტრის გიორგი კვირიკაშვილის მიერ ინიცირებული რეფორმები მოწონებული და მხარდაჭერილია საერთაშორისო საფინანსო ორგანიზაციების მიერ, რისი დასტურიც არის საერთაშორისო სავალუტო ფონდის მიერ საქართველოსთვის პროგრამის აღდგენა”, _ აღნიშნა კოვზანაძემ.
კოვზანაძემ გერმანელ კოლეგას ჩვენს ქვეყანაში მიმდინარე და დაგეგმილი ეკონომიკური რეფორმების დეტალები გააცნო. საუბარი შეეხო საბანკო დეპოზიტეტის დაზღვევის სისტემის შემოღებას, საპენსიო რეფორმას, კაპიტალის ბაზრის რეფორმას და ფასიანი ქაღალდების ბაზარს, საქართველოს საგადასახადო კანონმდებლობის ევროპულ კანონმდებლობასთან ჰარმონიზაციას და სხვა აქტუალურ საკითხებს.
ბუნდესტაგის საფინანსო კომიტეტის თავმჯდომარემ ქართველ კოლეგას საბანკო, საფინანსო სექტორის არასაბანკო მონაწილეების, კერძო საპენსიო ფონდების მუშაობის და მათზე ზედამხედველობის კუთხით გერმანული გამოცდილება გააცნო. ასევე იმ აქტუალურ საკითხებზე ისაუბრა, რამელშიც გერმანიის საფინანსო სექტორს დიდი პრაქტიკული გამოცდილება აქვს დაგროვილი.
შეხვედრაზე, რომელსაც საქართველოს ელჩი გერმანიაში, ლადო ჭანტურია ესწრებოდა, მხარეებმა საქართველოსთვის ვიზალიბერალიზაციის მინიჭების თემაზე ისაუბრეს. ირაკლი კოვზანაძემ მადლობა გადაუხადა გერმანიის ხელისუფლებას იმ მხარდაჭერისთვის, რომელიც მათ საქართველოს ევროკავშირთან უვიზო მიმოსვლის რეჟიმის ამოქმედებისთვის გასწიეს.
შეხვედრის დასასრულს ირაკლი კოვზანაძემ ინგრიდ არნდტ-ბრაუერი საქართველოში მოიწვია.
ვიზიტის ფარგლებში საქართველოს საპარლამენტო დელეგაცია მაღალი დონის შეხვედრებს გამართავს ბუნდესტაგში, ფინანსთა სამინისტროსა და გერმანიის ფედერაციულ აუდიტის სამსახურში, შედგება შეხვედრა აუდიტის სამსახურის პრეზიდენტთან.
