ჩვენს ქვეყანაში ცხოველთა საკმაო პრობლემატიკის შემცველი დაავადებები არსებობს.
თემაზე, თუ რა პრაქტიკულ ინფორმაციას უნდა ვფლობდეთ, განსაკუთრებით ფერმერები, სოფლის მეურნეობაში დასაქმებული ადამიანები, სოფლის მეურნეობის სამინისტროს ლაბორატორიის ინიციატივით, ოზურგეთში მოეწყო საინტერესო შეხვედრა.
სოფლის მეურნეობის სამინისტროს ლაბორატორიის წარმომადგენლები ადგილობრივებს ლაბორატორიაში დანერგილი ახალ მეთოდების არსზე ესაუბრნენ, ასევე, მიაწოდეს პრაქტიკული ინფორმაცია მცირე მეწარმეებისთვის, სასოფლო-სამეურნეო კოოპერატივებისთვის, ადგილობრივი მიწათმოქმედებისთვის და მიზნობრივი ჯგუფებისთვის. სლაიდების მეშვეობით გააცნეს მათ თუ რას წარმოადგენს აღნიშნული ლაბორატორია, რომელიც თავიდან ვეტერინარული მიმართულებით მუშაობდა, მერე კი მცენარეთა და სურსათის მიმართულებაც დაემატა.
_ ვეტერინარული მიმართულების შემდეგ მოხდა გაფართოება, დაემატა სურსათის და მცენარეთა დაავადებების კვლევა. როცა ვატარებთ ასეთ კვლევებს, ის აუცილებლად საერთაშორისო სტანდარტს უნდა ექვემდებარებოდეს. ძირითადად კი ცხოველთა დაავადებების დიაგნოსტირებას ეთმობა უდიდესი ყურადღება, _ თქვა სურსათის მიკრობიოლოგიური კვლევის ლაბორატორიის უფროსმა თამარ მოდებაძემ.
მან ისაუბრა რიგ საკითხებზე, ასევე განმარტა, რომ სურსათის უვნებლობაში პარამეტრები კი დაინერგა, თუმცა, ძვირადღირებული აპარატურა მხოლოდ თბილისის ლაბორატორიაშია. ამიტომ ვისაც ფუტკრის, თევზის, პირუტყვის ხორცის ხარისხის გამოკვლევა სურს, შეუძლიათ ადგილზე მიმართონ ლაბორატორიას, რომელიც შემდეგ თბილისში გადააგზავნის სინჯებს და ასე მოხდება ზუსტი პასუხის მიღება.
შეხვედრაზე მწვავედ დაისვა საკითხი ახალი საშიში მავნებლის _ აზიური ფარიანას (იგივე მარმარა ბაღლინჯოს) შესახებ, რომელიც უკვე შემოიჭრა ჩვენს ტერიტორიაზე და ფლორას განადგურებას უქადის.
სოფლის მეურნეობის სხვადასხვა დარგების, განსაკუთრებით მეფუტკრეობით და მეთხილეობით დაინტერესებულმა ფერმერებმა ჯაბა ჭეიშვილმა და ომარ ბაკურაძემ კონკრეტულად დასვეს საკითხი, როდის და როგორ უნდა ვუწამლოთ თხილს, რომელსაც საშიში ტკიპა მოედო. ასევე, აინტერესებდათ აზიური ფარიანას წინააღმდეგ მომავალში ჩასატარებელი სამუშაოები, ხომ არ გაანადგურებს ფუტკარს და თაფლის ხარისხზე უარყოფითად ხომ არ იმოქმედებს.
მიუხედავად აზრთა სხვადასხვაობისა, ბიომეთოდით შეწამვლა სჯობს თუ ქიმიური მეთოდებით დამუშავება, შეხვედრის მონაწილეები ვერ შეთანხმდნენ, რადგან ჯერ ზუსტი პასუხი არავინ იცის თხილის გადასარჩენად, კონკრეტულად კი აზიური ფარიანას წინააღმდეგ გამოყენებული პრეპარატი გამოიწვევს თუ არა ფუტკრის განადგურებას ან თაფლის ხარისხის გაუარესებას.
ფიტოფატოლოგმა მადონა ჩიტაიშვილმა გაიხსენა საშიში მავნებლის, ამერიკული პეპელას წინააღმდეგ წლობით გაწეული ბრძოლა, რაც, საბოლოოდ, წარმატებით დასრულდა და გამოთქვა იმედი, ამჯერადაც გამოინახება ხსნის გზა.
შეხვედრის მონაწილეებმა ისაუბრეს აზიური ფარიანას განსაკუთრებულ მავნებლობაზე, რომელიც 300-მდე სახეობის ფოთლოვანს და ბაღჩეულს განადგურებით ემუქრება. თითქმის, არ ინდობს მწვანე საფარის ფენას, გარდა წიწვოვნებისა.
ფაროსანა, ჯერჯერობით დიაპაუზაშია, ხოლო გამოსვლას და კვერცხის დადებას დაიწყებს გაზაფხულზე.
როგორც მადონა ჩიტაიშვილმა აღნიშნა, ამ საშიში მავნებლის წინააღმდეგ პირველი ღონისძიება იქნება, სურსათის უვნებლობის სააგენტოს რეგიონული სამსახურის მიერ, თითოეულ სოფელში მავნებლის 20 საჭერის დადგმა. შემდეგ კი საჭერების დახმარებით გაირკვევა, სად უფრო მეტი რაოდენობითაა გავრცელებული აზიური ფაროსანა. შეწამვლაც სწორედ აქედან დაიწყება.
ფერმერების კითხვაზე, თავისი მავნებლობით უტოლდება თუ არა მარმარა ბაღლინჯო ამერიკულ პეპელას, მადონა ჩიტაიშვილმა განმარტა, რომ 300-მდე სახეობის ფოთლოვანს ანადგურებს და მავნებლობით არათუ ჩამორჩება, შესაძლოა, გაუსწროს ამერიკულ პეპელას.
მისივე ინფორმაციით, სოფლებში მავნებლის საჭერები აპრილის დასაწყისიდან უნდა დაიდგას.
შეხვედრის მონაწილეებმა, ასევე, ისაუბრეს ოზურგეთის ლაბორატორიაში დანერგილი ცხოველთა დაავადებების დიაგნოსტირების შესახებ, რაც შესაძლებლობას იძლევა, მოსახლეობისთვის საერთაშორისო დონის კვლევები ადგილზევე ჩატარდეს ნაკლები ძალისხმევით.
შეხვედრის დასასრულს, როგორც სურსათის მიკრობიოლოგიური კვლევის ლაბორატორიის უფროსმა თამარ მოდებაძემ თქვა, დღეს წამოჭრილი არა ერთი ძალზე მწვავე პრობლემის გაცნობის გარდა, მათი მიზანია სოფლის მეურნეობაში ჩართული და ამ საქმიანობით დაინტერესებული პირებისთვის ლაბორატორიული კომპონენტის ნაწილში ცოდნის გაღრმავება.
