ოზურგეთის მუნიციპალიტეტის საკრებულომ ბიუროს სხდომებზე, გამგეობის სამსახურების უფროსების, ა(ა)იპ-იების ხელმძღვანელების ანგარიშის მოსმენა დაიწყო.
31 მარტს, მუნიციპალიტეტის საკრებულოს ბიუროს სხდომა ხმაურიანი და საქმიანი იყო, თუმცა, მაინც დაისვა და გაჩნდა მრავალი კითხვა არაერთი საკითხის ირგვლივ, რომელიც სერიოზულ მიდგომას საჭიროებს.
შესანარჩუნებელია თუ უკლებლივ გასაუქმებელი ყველა ა(ა)იპ-ი, რომელიც 2014 წლიდან შეიქმნა?
როგორც ოზურგეთის მუნიციპალიტეტის საკრებულოს თავმჯდომარის მოადგილემ დიმიტრი კვერღელიძემ განაცხადა, 2014 წელსაც არ უნდა შეგვექმნა ა(ა)იპ ორგანიზაციები, რადგან ეს ფულის არასწორი ხარჯვააო:
_ არიან ორგანიზაციები და მათი ხელმძღვანელები, რომელთა პროფესიონალიზმში ეჭვი არასოდეს მეპარებოდა და გასაკვირია, რომ დღეს აუდიტის სამსახური ზოგ ორგანიზაციას “საფრთხის შემცველად” აცხადებს. რატომ წერენ ახლა ამას, როცა აუდიტის სამსახურს ჯერ კიდევ 2014-2015 წლებში არ გაჩენია ეჭვი ა(ა)იპ “ოზურგეთის მუნიციპალიტეტის კეთილმოწყობის და არქიტექტურის დაგეგმარების ცენტრის” მუშაობის ირგვლივ? _ იკითხა კვერღელიძემ, როცა აღნიშნული სამსახურის ხელმძღვანელი გია სკამკოჩაიშვილი ანგარიშგებით წარდგა ბიუროს წინაშე.
საკრებულოს თავმჯდომარის მოადგილემ მას მადლობაც გადაუხადა წარსული კვალიფიციური საქმიანობისთვის და გამოთქვა მოსაზრება, რომ ხომ არ აჯობებდა, ა(ა)იპ ორგანიზაციის ნაცვლად შეექმნათ შპს, რომელსაც ექნება განვითარების მეტი პერსპექტივა.
რაში დახარჯა ა(ა)იპ ორგანიზაციამ ნახევარ მილიონამდე ლარი?
ბიუროს სხდომაზე ანგარიშით წარდგა უპირველეს სალიკვიდაციოდ მოაზრებული ა(ა)იპ “ოზურგეთის მუნიციპალიტეტის ფერმერული მეურნეობის განვითარების ცენტრის” დირექტორი შალვა შავიშვილი. მან ისაუბრა ფერმერულ ცენტრში გაწეულ მუშაობაზე, კონკრეტულად, გურული ვაზის ჯიშების აღდგენის ვალდებულებაზე, რისთვისაც დიდი ძალისხმევა გასწიეს და ერთ ჰექტარ ფართობზე მევენახეობის სპეციალისტის, ანდრო ვაშალომიძის მეცადინეობით და მზრუნველობით, უკვე გაშენებულია არა ერთი გურული ჯიშის ვაზი.
_ სამი წელი გავიდა, რაც მუშაობა დაიწყეთ და რა მდგომარეობაა ახლა? ანდრო ვაშალომიძე მართლაც უდიდეს ქართულ საქმეს ემსახურება. შეძლო თუ არა მან მუშაობა სრულყოფილად ან რამ შეუშალა ხელი? ნახევარ მილიონამდე თანხაა დახარჯული ამ ხნის მანძილზე, _ უთხრა დიმიტრი კვერღელიძემ შავიშვილს.
შალვა შავიშვილმა პასუხად თქვა, რომ შეკითხვა, თანხის დახარჯვასა და მიზანმიმართულებაზე უხერხულია.
_ ამ 400 ათასი ლარიდან 300 ათასი ლარი დაიხარჯა მხოლოდ ხელფასებისთვის. საზოგადოება იყო იქ და იღებდა ხელფასებს! ეს არის 70% აღნიშნული თანხისა! დღეისთვის შემცირებულია ათი თანამშრომელი. დარჩა თერთმეტი კაცი, თუმცა, მეოთხე თვე იწყება და სამსახური პარალიზებულია! არც ერთი თეთრი არ დახარჯულა და არ გაცემულა, როცა თვით კონკურენციის სააგენტოსგან, ნოდარ ხადურისგან 37 ათასი ლარის დახარჯვის უფლება გვქონდა! გაუგებარია ჩემთვის _ სამი თვეა, არ გაგვიცია ერთი თეთრი, არადა უნდა გაგვეშენებინა ვენახი! ეს არის სახელმწიფო მეურნეობა, მეგობრებო, როგორ შეიძლება, სამი თვის განმავლობაში ასე პარალიზებული ყოფნა? თუ გასაუქმებელია, უნდა გაუქმდეს, თუ არა და რა ჰქვია ამას? ორი ათასი კაცი მოვიდეს და ნახოს იმ ფართობზე, რა გვაქვს შრომით გაკეთებული! 9 კაცი გათავისუფლდა, არ მიგვიცია ერთი თეთრი ხელფასი. არ გვქონდა თუ რა? ეს არის სისხლის სამართლის დანაშაული! თუ სამსახურში შემოწმებაა, იქ ხელფასს არავინ აჩერებს, შუქს არ უჭრიან და ასე შემდეგ… _ თქვა შავიშვილმა, რომელსაც აშკარად ეტყობოდა, რომ არ აპირებს იმ 400 ათასი ლარის გახარჯვის ბუნდოვნად დატოვებას, საიდანაც 300 ათასი ხელფასებისთვის გაიცა და რატომღაც ეკითხებიან, ამდენი რომ მოგეცით, ფერმერული განვითარების ცენტრში რას მოახმარე, გვაჩვენეო.
_ შუქი მართლა არ გაქვთ? _ ჰკითხა კვერღელიძემ.
_ დიახ, ჩაჭრილია, არც კომპიუტერი მუშაობს და საერთოდ, არაფერი. პარალიზებული ვართ, _ უპასუხა შავიშვილმა.
დიმიტრი კვერღელიძემ თქვა, რომ ახლა დაწყებულია ამ ორგანიზაციის ლიკვიდაციის პროცესი:
_ არ გვინდა არავის ლიკვიდაცია. თუმცა, ჩვენს გადაწყვეტილებაში მართლები რომ ვიყოთ, კონკურენციის სააგენტო ითხოვს, დავუსაბუთოთ 200 ათასლარიანი დაფინანსების აუცილებლობა… რა ბედი ეწია მეღორეობის განვითარების საქმეს ან ვაზის ნერგები თუ გადაეცა ვინმეს? _ იკითხა მან.
შალვა შავიშვილის თქმით, მეღორეობის ფერმისთვის 56 ათასი ლარი დაიხარჯა:
_ მოსახლეობაში ხელშეკრულებით გაიცა 16 გოჭი, რომელშიც თანხა არავის გადაუხდია. არსებობს შეთანხმების პირობები. თუმცა, შემდეგ მეღორეობაზე მუშაობა იმიტომ შევწყვიტეთ, რომ აქ მომუშავე დარგის სპეციალისტი ცალკე სამუშაოდ გავიდა და მისთვის, მოთხოვნის თანახმად, კონკურენტი არ უნდა ვყოფილიყავით, ეს გამგეობასთან შეთანხმებით მოხდა, _ თქვა შავიშვილმა და ისაუბრა 2018 წლის მოსალოდნელ პერსპექტივაზე, რომ ჩამოაყალიბებს იხვის ფერმას, რითაც შესაძლებელი გახდება ყოველწლიურად 200 ათასი ლარის მოგების შემოტანა.
_ არავინ, მამაზეციერიც კი არ დაგიჯერებს მაგას, რომ ამხელა მოგება გვექნება, _ უთხრა საკრებულოს თავმჯდომარემ დავით დარჩიამ შავიშვილს და ურჩია უფრო რეალურ ციფრებსა და შესაძლებლობებზე საუბარი.
დიმიტრი კვერღელიძემ კვლავ შესთავაზა საკუთარი აზრი:
“2018 წელზე რომ საუბრობთ, მაგ დროს ეს ორგანიზაცია უკვე ლიკვიდირებული იქნება. ჯობს, იფიქროთ გამოსავალზე და ხომ არ შეუძლიათ თქვენს თანამშრომლებს, იჯარით ისარგებლონ და ისე განაგრძონ მუშაობა, რაკი საკითხი ლიკვიდაციაზე დგას”.
შავიშვილს, დეპუტატებმაც შესთავაზეს საკუთარი მოსაზრება _ თუ წლის ბოლოსთვის, 200 ათას ლარიანი მოგების შემოტანა შეუძლიათ, გამოისყიდონ ეს ოთხი ჰექტარი ფართობი, აიღონ სახელმწიფოსგან სესხად 300 ათასი ლარი და მერე, გადაიხადონ, მოგებიდან გამომდინარე.
შავიშვილმა ამ შეთავაზებაზე განაცხადა და თქვა, რომ ეს არის არადამაჯერებელი თანხა, რომელსაც არც ერთი ბიზნესმენი არ გადაიხდის, ისევე, როგორც არადამაჯერებელი დარჩა იხვების მოშენებით 200 ათას ლარიანი მოგების ნახვა, რის არასარწმუნოობის დასტურად დავით დარჩიამ მამაზეციერიც კი მოიშველია.
თუ როგორ დასრულდება სალიკვიდაციოდ მომზადებული ამ ა(ა)იპ ორგანიზაციის ბედი, ამაზე საკრებულოს წევრები მორიგ სხდომაზე, განკარგულების პროექტების დამტკიცების დროს იმსჯელებენ.
ბიუროს სხდომაზე, ასევე, მოისმინეს ანგარიში წარმატებული ა(ა)იპ ორგანიზაციის _ “ოზურგეთის მუნიციპალიტეტის საზოგადოებრივი ჯანდაცვის ცენტრის” მიერ 2016 წელში გაწეული მუშაობის შესახებ და მის დირექტორს მაია ქუტიძეს მადლობა გადაუხადეს.
აუცილებელია თუ არა სკოლამდელი დაწესებულების ხელმძღვანელს უმაღლესი განათლება ჰქონდეს?
ბიუროს სხდომაზე ხმაური გამოიწვია “სკოლამდელი აღზრდის და განათლების საჯარო დაწესებულების დირექტორის საკვალიფიკაციო მოთხოვნების დამტკიცების შესახებ”, ოზურგეთის მუნიციპალიტეტის საკრებულოს დადგენილების მიღების თაობაზე”, საკითხმა.
მოთხოვნას განსაკუთრებით შეეწინააღმდეგა დეპუტატი გელა აროშიძე.
_ ცოცხალი თავით არ დავუჭერ მხარს ამ საკითხს. რა ქნას მენეჯერმა, რომელსაც არ აქვს უმაღლესი განათლება, მაგრამ მრავალი წელია ადგილზე მუშაობს და საქმე ესმის? არჩევნებიც მოდის და ამ საკითხის წამოჭრა ახლა არ არის მიზანშეწონილი, _ თქვა მან.
თუმცა დეპუტატების უმეტესი ნაწილის აზრით, სკოლამდელი დაწესებულების ხელმძღვანელს, ისევე, როგორც სკოლის დირექტორს უნდა მოეთხოვებოდეს უმაღლესი განათლება და რომ ეს ცენზი აუცილებელია.
_ 21-ე საუკუნეა და განსაკუთრებით, საგანმანათლებლო დაწესებულებებს სათავეში უმაღლესი განათლების მქონე პირები უნდა ედგნენ, _ ასეთი იყო მათი აზრი.
