9 აპრილს დაღუპული გმირების ხსოვნას პატივი მიაგეს ოზურგეთის მუნიციპალიტეტში.
მუნიციპალიტეტის გამგებელმა მერაბ ჭანუყვაძემ, გამგებლის მოადგილეებმა, საკრებულოს თავმჯდომარემ დავით დარჩიამ, გურიის გუბერნატორმა გია სალუქვაძემ და ქალაქის მერმა ბეგლარ სიორიძემ 9 აპრილის ღამეს ტრაგიკულად გარდაცვლილი ლიხაურელი ნინო თოიძის საფლავი გვირგვინით შეამკეს.
ადგილობრივი ხელისუფლების წარმომადგენლები ლიხაურის ღვთისმშობლის შობის სახელობის ტაძარში 9 აპრილს დაღუპული გმირების სულის მოსახსენიებელ პანაშვიდს დაესწრნენ.
„9 აპრილი საქართველოს დამოუკიდებლობის აღდგენისა და ამავდროულად უდიდესი ტრაგედიის დღეა, რომელსაც თავისი გმირები ჰყავს. 28 წელი გავიდა მას შემდეგ, რაც ქვეყნის დამოუკიდებლობას ათობით მშვიდობიანი მოქალაქე შეეწირა. ჩვენი ვალია, ყოველთვის გვახსოვდეს ადამიანები, ვინც ჩვენი სამშობლოს თავისუფლებისთვის გაწირა თავი, “- განაცხადა ოზურგეთის მუნიციპალიტეტის გამგებელმა.
ლიხაურის კულტურის სახლში ოზურგეთის მუნიციპალიტეტის კულტურის, სპორტისა და ტურიზმის განვითარების სამსახურის , ასევე ა(ა)ი.პ. „ოზურგეთის მუნიციპალიტეტის კულტურის, სპორტისა და ტურიზმის განვითარების ცენტრის“ ორგანიზებით 9 აპრილის დღისადმი მიძღვნილი ტრადიციული ღონისძიება მოეწყო.
დღესვე ადგილობრივი ხელისუფლების ხელმძღვანელმა პირებმა გვირგვინით შეამკეს საქართველოს დამოუკიდებლობისა და ტერიტორიული მთლიანობისათვის დაღუპულთა ხსოვნის მემორიალი. 1989 წელს თბილისში, 9 აპრილს, თბილისში საბჭოთა არმიამ საქართველოს დამოუკიდებლობის მოთხოვნით მოწყობილი მშვიდობიანი დემონსტრაციია დაარბია, რის შედეგადაც 21 ადამიანი დაიღუპა.
