ორგანიზაცია „ახალგაზრდა ადვოკატები” სასამართლო სისტემაში მიმდინარე მოვლენებთან დაკავშირებით სპეციალურ განცხადებას ავრცელებს და ადამიანის უფლებების დაცვის მაღალი ინტერესიდან გამომდინარე, სასამართლო ხელისუფლების დისკრედიტაციის ნებისმიერ მცდელობას დაუშვებლად მიიჩნევს, თუმცა, მათივე აზრით, სასამართლომ არ უნდა შეზღუდოს კრიტიკაც.
„ახალგაზრდა ადვოკატების“ ხელმძღვანელის, არჩილ კაიკაციშვილის განცხადებით, საქართველოს იუსტიციის უმაღლესი საბჭოს წარმომადგენელთა პოზიციები არ იყო თანხვედრი, ერთიანი და მომზადებული, რომელიც სასამართლოს და მოსამართლის შეურაცხყოფის ფაქტებთან დაკავშირებით, კონკრეტული სამართლებრივი პასუხისმგებლობის საკითხზე მსჯელობას შეეხებოდა, რამაც საზოგადოებაში მოსალოდნელი გაურკვევლობა და საწინააღმდეგო შეფასებები გამოიწვია.
„მოცემულ შემთხვევაში, სასამართლო სისტემა საზოგადოებას სთავაზობს სტრატეგიას, რომლის მიზანია, შეიქმნას ცხადი ხედვა, თუ რა მიმართულებით სურს სისტემას განვითარდეს მომდევნო 5 წლის განმავლობაში და რა ტაქტიკური ნაბიჯები უნდა გადაიდგას დამოუკიდებლობის, მიუკერძოებლობის, ანგარიშვალდებულების, გამჭვირვალობისა და სანდოობის მიმართულებით. შესაბამისად, ნებისმიერი მსჯელობა, რომელიც სასამართლოს საჯარო კრიტიკის შეზღუდვის მიზანს მოემსახურება, სასამართლო სისტემის მნიშვნელოვანი რეფორმის განხორციელებას შეაფერხებს და სასამართლო სათანადო ავტორიტეტიც ვერ იქნება საზოგადოებაში წარმოდგენილი, რაც დაუშვებელია“, _ აცხადებს კაიკაციშვილი.
„ახალგაზრდა ადვოკატების“ შეფასებით, დაუშვებელია მოსამართლის შეურაცხყოფა და ამ თვალსაზრისით, ჩვენ გულგრილად არ უნდა დავტოვოთ დოკუმენტში წარმოდგენილი გამონათქვამების ხარისხი და მიზანი, ვინაიდან ბევრი მათგანი, ნამდვილად შეურაცხმყოფელია.
ორგანიზაციისთვის მიუღებელია ნებისმიერი პროფესიის ადამიანის ან ინსტიტუციის შეურაცხყოფა, ლანძღვა და დაუმსახურებელი კრიტიკაც კი.
„საზოგადოება უნდა ჩამოყალიბდეს და შეთანხმდეს სამოქალაქო კულტურის სტანდარტზე. ამ თვალსაზრისით, კატეგორიულად მიუღებელია სასამართლოს სისტემის ან ადვოკატთა კორპუსის ან რომელიმე ინსტიტუციის შეურაცხყოფის დაშვება. დემორალიზებულ სისტემაში შეუძლებელია ყველაზე მაღალი მიზნის – ადამიანის უფლებების დაცვის უზრუნველყოფა. ამდენად, მისაღებია სასამართლო სისტემის წარმომადგენელთა პრეტენზიები პროფესიული ღირსების დაცვისთვის, თუმცა ორგანიზაცია არ ეთანხმება მიდგომას – პროცესის მონაწილე მხარის ზღვარგადასული გამონათქვამები განზოგადდეს და აღნიშნული საფუძველი გახდეს დაწესდეს სანქციები, რითაც პირდაპირ შეიზღუდება ყველაზე მაღალი კონსტიტუციური პრინციპი და საზოგადოებრივი სიკეთე – გამოხატვის თავისუფლება“, _ აღნიშნავენ ორგანიზაციაში.
„ახალგაზრდა ადვოკატების“ განცხადებით, კატეგორიულად მიუღებელია სასამართლოს კრიტიკის ფარგლებში, მისი ხარისხის მიუხედავად, სამართლებრივი პასუხისმგებლობა გახდეს კრიმინალიზირებული ან საკანონმდებლო დონეზე შემოღებულ იქნეს ადმინისტრაციული სანქციები.
„მოსამართლეების მიმართ კრიტიკა არ უნდა შეიზღუდოს, ეს კი მათი შეურაცხყოფის გზითაც არ უნდა ხდებოდეს. ამდენადც, იუსტიციის უმაღლესი საბჭოს წინადადება უნდა დაზუსტდეს. საჭიროა საზოგადოება გაეცნოს ინიციატივას დოკუმენტის სახით და არსებობდეს დისკუსიის და მსჯელობის საშუალება, მათ შორის ჟურნალისტური კორპუსის მონაწილეობით. საკითხის განხილვაში მონაწილეობა უნდა მიიღონ სფეროს საერთაშორისო ექსპერტება და ადვოკატთა კორპუსმა“, _ აღნიშნავენ ორგანიზაციაში.
„ახალგაზრდა ადვოკატები“ მიიჩნევს, რომ მედიას აკისრა მნიშვნელოვანი საზოგადოებრივი ფუნქცია, თუ როგორ გახდეს სასამართლო უკეთესი. ორგანიზაციის აზრით, იუსტიციის უმაღლესმა საბჭომ იჩქარა, როდესაც არ მოახდინა შემუშავებული დოკუმენტის მედიის წარმომადგენლებთან გაცნობა და სამუშაო შეხვედრის დაგეგმვა ამ მიმართულებით.
„კარგი იქნება, თუკი დოკუმენტი, რომელიც გამოხატვის თავისუფლების ფარგლებში სასამართლოს შეურაცხყოფის ფაქტების დადგენას ითვალისწინებს, ჟურნალისტური კორპუსის მონაწილეობით, ერთობლივად შეიქმნება“, _ აღნიშნულია „ახალგაზრდა ადვოკატების“ განცხადებაში.
