ქობულეთში მდებარე ე.წ. ხასანას სასტუმროს („არმაზის“) ერთ-ერთი მფლობელი გარდაცვლილი იპოვეს. როგორც „გურია ნუსს“ გარდაცვლის ადვოკატმა პაატა შავაძემ განუცხადა, ზაზა ართმელაძემ თავი ნახარნძრალ ადგილზე ჩამოიხრჩო.
შეგახსენებთ, რომ სასტუმრო “არმაზში” 2015 წლის 10 მაისს გაჩენილ ხანძარს რუსთავის ქორეოგრაფიული ანსამბლის “სიხარული 2”-ის სამი მოზარდის სიცოცხლე ემსხვერპლა.
„ეს ის პირია, რომლის მიმართაც პროკურატურას პრეტენზიები ჰქონდა და სისხლის სამართლის პასუხისგებაში იყო მიცემული ამ ხანძრის გამო. დაახლოებით, ერთი წლის წინ ის გირაოს სანაცვლოდ პატიმრობიდან გაათავისუფლეს, თუმცა, რატომ გადაწყვიტა მან ასე დაესრულებინა ცხოვრება არ ვიცი. ვფიქრობ, საპატიმროში ყოფნამ ძალიან დიდი გავლენა იქონია, ძალიან დათრგუნული იყო, სასოწარკვეთილი. მისთვის ეს დიდი დაღი იყო“, _ ამბობს ადვოკატი.
მისივე თქმით, არც იმის გამორიცხვა შეიძლება რომ ზაზა ართმელძეზე ზეწოლა განხორციელდა.
„არც არაფერს გამოვრიცხავ და ვერც დავადასტურებ, რომ რაიმე სახის ზეწოლა განხორციელდა ან ხორციელდებოდა მასზე. გამოძიება მიმდინარეობს და იმედია, დაადგენენ. შესაძლებელია იყო ზეწოლა, შესაძლებელია არ იყო. ვერ გეტყვით. დაახლოებით ნახევარი საათია რაც ეს ამბავი გავიგე. ყველანაირად დარწმუნებული ვარ, რომ ამ საქმეში გამამართლებელი განაჩენი დადგებოდა. არანაირი მტკიცებულებები ზაზა ართმელაძის წინააღმდეგ საქმეში არ იყო. ეგ არ იყო ვალდებული პირი, რომ სახანძრო უსაფრთხოების წესები დაეცვა. გვიხაროდა, რომ ძალიან მალე ვიზეიმებდით გამამართლებელ განაჩენს, მაგრამ...“, _ ამბობს ადვოკატი პაატა შავაძე.
მისივე ინფორმაციით, ამ ეტაპზე სასამართლოში ბრალდების მტკიცებულებების გამოკვლევის ეტაპზე იყო. ამის შემდეგ დაცვის მხარის მტკიცებულებები უნდა გამოკვლეულიყო.
„მივიჩნევთ, რომ ამ საქმეში ზაზა ართმელაძის მიმართ ბრალის წარდგენის საფუძველიც კი არ არსებობდა. გავაგრძელებ მაინც საქმის განხილვას, თუ ამის სურვილი ოჯახს ექნება. პროცესუალურად ამის უფლება გვაქვს. გამამართლებელი განაჩენი დადგება და ზაზას სული ამას აუცილებლად იგრძნობს. თვითონაც ძალიან დაინტერესებული იყო, რომ სიმართლე გარკვეულიყო. შვილთან თბილისში ჩასული სტადიონზე დააკავეს, მერე პატიმრობიდან არ ათავისუფლებდნენ, ყველაფერი გააკეთეს იმისთვის, რომ ზაზა ამ მდგომარეობამდე მისულიყო. 5 თვე პატიმრობაში იყო“, _ ამბობს ადვოკატი პაატა შავაძე.
ცნობისთვის, ზაზა ართმელაძეს გამოძიება სახანძრო და სამშენებლო უსაფრთხოების წესების დარღვევას ედავებოდა, რაც 5-დან 8 წლამდე პატიმრობას ითვალისწინებს. სასტუმრო “არმაზში” (ე.წ. “ხასანას” სასტუმრო) 2015 წლის 10 მაისს გაჩენილ ხანძარს რუსთავის ქორეოგრაფიული ანსამბლის “სიხარული 2”-ის სამი მოზარდის სიცოცხლე ემსხვერპლა.
მოგვიანებით, 2015 წლის 20 ნოემბერს ბათუმის საქალაქო სასამართლომ ართმელაძეს პატიმრობა შეუფარდა. თუმცა, 2016 წლის აპრილში ის 50 000-ლარიანი გირაოს საფუძველზე გათავისუფლდა.
ამავე თემაზე:
ქობულეთში ე.წ.ხასანას სასტუმროში ხანძრის გამო დაკავებული პატიმრობიდან გაათავისუფლეს
