ოზურგეთში მომხდარ გახმაურებულ, შემზარავ მკვლელობასთან დაკავშირებით, შსს გურიის პოლიციის დეპარტამენტში საგამოძიებო მოქმედებები ინტენსიურად მიმდინარეობს.
“გურია ნიუსის“ წყაროს ინფორმაციით, ამ ეტაპზე გამოძიება ნულის ტოლფასია, ანუ პოლიციას რაიმე ხელჩასაჭიდი დეტალი გამოძიებისთვის საინტერესო არ აქვს.
ჯერ დაიკითხნენ მოკლულის, გურამ ფოცხიშვილის მეზობლები. როგორც ჩვენთვის არის ცნობილი, ასევე, პოლიცია იბარებს ყველა იმ პირს, ვისაც ფოცხიშვილების ოჯახთან რაიმე შეხება აქვს.
დაახლოებით, ერთი საათის წინ პოლიციაში იმყოფებოდა, ყოფილი პოლიცმაისტერი ვიქტორ გობრონიძე. რომელსაც ახლო ურთიერთობა აქვს გურამ ფოცხიშვილის ნათლიასთან, ბიზნესმენ კუსა დოლიძესთან. ჩვენი წყაროს ინფორმაციით, პოლიციაში დაკითხვა კუსა დოლიძესაც მოუწევს.
“გურია ნიუსის“ წყაროს ინფორმაციით, პოლიციაში, ასევე, ოზურგეთში მცხოვრები ე.წ. “ქურდული მენტალობის“ მქონე ყველა პირია დაბარებული.
ჯერჯერობით, სამართალდამცავებმა მხოლოდ ერთი დეტალი აღმოაჩინეს.
საქმეში მოქმედი შავი “პასატი“, ნომრით 907, რომელიც შემდეგ დამწვარი იპოვეს, ეკუთვნოდა ჩაქვში მცხოვრებლებს. მანქანა ოფიციალურად ჩაქვში მცხოვრებ ერთ-ერთი ქალბატონის სახელზე იყო გაფორმებული.
“გურია ნიუსის“ წყაროს ინფორმაციით, ქალბატონს დაუკავშირდა მისთვის უცხო პიროვნებები და მანქანის გაყიდვა შესთავაზეს. როგორც ჩვენი წყარო ამბობს, ეს ყველაფერი კი ტელეფონით მოხდა. ფული მანქანის მყიდველებმა გამყიდველს ერთ-ერთ ადგილზე დაუტოვეს, მანქანის გადაფორმება კი ერთი თვის შემდეგ უნდა მომხდარიყო.
თუმცა, აღნიშნული მკვლელობა მანქანის შეძენიდან რამდენიმე დღეში მოხდა.
“გურია ნიუსის“ წყაროს ინფორმაციით, პოლიციას გურამ ფოცხიშვილის სატელეფონო საუბრები ჯერ კიდევ გაშიფრული არ აქვს. როგორც გვეუბნებიან, ახალი დეტალები რამდენიმე დღეში გაირკვევა.
შსს პრესსამსახურში აღნიშნულთან დაკავშირებით აცხადებენ, რომ საგამოძიებო მოქმედების შესახებ ინფორმაციას არ გასცემენ:
“გამოძიების ინტერესებიდან გამომდინარე, გარდა მუხლისა, ვერანაირ ინფორმაციას ვერ გავცემთ“, _ აცხადებენ შსს-ს პრესსამსახურში.
ამავე თემაზე: ახალგაზრდამ, რომელმაც მანქანაში მოკლულები იპოვა, სახლი დატოვა
