გუშინ, ცნობილი გახდა, რომ ქართველმა ფეხბურთელმა, 25 წლის ნიკა ძალამიძემ პოლონური კლუბი გურნიკის „ლეჩნას“ რიგები დატოვა. სავარაუდოდ, ქართველი შემტევი აღმოსავლეთ ევროპის რომელიმე ქვეყანაში გააგრძელებს კარიერას. ძალამიძემ გასულ სეზონში “ლეჩნას” რიგებში 11 მატჩში მიიღო მონაწილეობა,
გუშინ ფრანგულმა გამოცემამ „ეკიპმა“ გაავრცელა ცნობა, რომ ბრაზილიის ეროვნული გუნდისა და კატალონიური „ბარსელონას“ თავდამსხმელი ნეიმარი ახალი სეზონიდან კარიერას მაინც „პარი სენ ჟერმენში“ გააგრძელებს.
ფრანგი ჟურნალისტების ინფორმაციით ბრაზილიელმა პარიზულ გუნდთან პირადი კონტრაქტი უკვე შეათანხმა. ნეიმარი ახალ გუნდთან ხუთწლიან ხელშეკრულებას გააფორმებს და წელიწადში 30 მილიონ ევროს მიიღებს. ფეხბურთელის „ბარსელონადან“ გამოსასყიდი თანხა 222 მილიონ ევროს შეადგენს. „პარი სენ ჟერმენის“ არაბი მფლობელები ამ თანხის გადახდაზე თანახმანი არიან.
ნეიმარი ამ დღეებში აშშ-ში იმყოფება, სადაც „ბარსელონა“ საერთაშორისო ჩემპიონთა თასის შეხვედრებს ატარებს. ხვალ კატალონიური გუნდი მადრიდის „რეალს“ დაუპირისპირდება. ფრანგული „ეკიპის“ ჟურნალისტების მტკიცებით, ამ თამაშის შემდეგ ნეიმარი „ბარსელონას“ ოფიციალურად დაემშვიდობება.
გუშინ ნეიმარი ყურადღების ცენტრში კიდევ ერთხელ აღმოჩნდა. „ბარსას“ ერთ-ერთ ჩვეულებრივ ვარჯიშზე ბრაზილიელი თანაგუნდელს, პორტუგალიელ ნელსინ სემედუს ეჩხუბა. დაპირისპირება სათამაშო ეპიზოდს მოჰყვა. კონფლიქტური სიტუაციის შექმნის შემდეგ, “ბარსელონას” ახალწვეულმა გარიდება სცადა, ბრაზილიელი კი თანაგუნდელების დასაწყნარებელი გახდა.
გუშინ ცნობილი გახდა რომ ტურინის „იუვენტუსის“ მოთამაშე სტეფან ლიხტშტაინერი კარიერას ფრანგულ „ნიცაში“ გააგრძელებს.
გუშინვე იტალიურმა „რომამ“ ბელგიელ რაჯა ნაინგოლანს ხელშეკრულება გაუგრძელა. ბელგიის ეროვნული გუნდის წევრი დედაქალაქურ კლუბში 2021 წლის 30 ივნისამდე დარჩება. 29 წლის ფეხბურთელი “რომაში” 2014 წლის იანვარში გადავიდა და მას შემდგომ გუნდის ერთ-ერთი ლიდერია.
