საქართველოს შინაგან საქმეთა სამინისტროს ინფორმაციით, რამდენიმე დღის წინ გაუჩინარებული მოქალაქე ვეფხია ღვალაძე ნაპოვნია.
როგორც „გურია ნიუსს“ შსს-ს პრესსამსახურში განუცხადეს, ვეფხია ღვალაძის სამძებრო ღონისძიებები უწყებამ სოციალურ ქსელში გავრცელებული ინფორმაციის შედეგად დაიწყო.
„შსს-ში არ შემოსულა არანაირი განცხადება მის გაუჩინარებასთან დაკავშირებით. შინაგან საქმეთა სამინისტრომ სამძებრო ღონისძიებები სოციალურ ქსელში გავრცელებული ინფორმაციის შედეგად დაიწყო და აღნიშნული პირი დღეს, გამთენიისას, კახეთის ტერიტორიაზეა ნაპოვნი, ჯანმრთელი, საღსალამათი. უკვე შედგენილია გამოკითხვის ოქმი“, _ უთხრეს „გურია ნიუსს“ შსს-ში.
შეგახსენებთ, რომ წუხელ, გვიან ღამით, “უფლებადამცველთა ასოციაციის” ხელმძღვანელმა ნიკა მემანიშვილმა სოციალურ ქსელში გაავრცელა ინფორმაცია, რომ ვეფხია ღვალაძეს ოჯახი 5 დღეა ეძებს.
„უგზო უკვლოდ გაუჩინარდა აფხაზეთის ომის ვეტერანი, ათი შვილის მამა ვეფხია ღვალაძე. იგი ხუთი დღის წინ იყო დაბარებული გურჯაანის პოლიციის სამმართველოში. 2014 წელს მომხდარ ფაქტთან დაკავშირებით.
ღვალაძე აცხადებდა, რომ 2014 წელს ზვიად ჯანყარაშვილმა, თანმხლებ პირებთან ერთად მას ფიზიკური შეურაცხყოფა მიაყენეს, რომლის შემდეგაც იგი რამდენიმე დღის მანძილზე მკურნალობდა სამედიცინო დაწესებულებაში.
გურჯაანის პოლიციის განყოფილებაში გამოცხადების შემდეგ იკარგება ვეფხია ღვალაძის კვალი, უკვე ხუთი დღეა ოჯახი ამაოდ ცდილობს ღვალაძის ადგილსამყოფელის მიგნებას და დახმარებას ითხოვს…
დაუყოვნებლივ შესაბამისმა ორგანოებმა მოახდინონ რეაგირება და ყველაფერი გააკეთონ ვეფხია ღვალაძის ადგილსამყოფელის დასადგენად.
დღისით, მზისით, ადამიანი გაქრა პოლიციის შენობიდან გამოსვლის შემდეგ… უამრავი კითხვის ნიშანია… ველოდებით შინაგან საქმეთა სამინისტროსგან მყისიერ რეაგირებას!!!“, _ წერდა მემანიშვილი.
რაც შეეხება 2014 წელს მომხდარ ფაქტს, როგორც „გურია ნიუსს“ შინაგან საქმეთა სამინისტროში უთხრეს, ინფორმაციას მოგვიანებით შეგვატყობინებენ.
