ოზურგეთის რაიონულ სასამართლოში, ოზურგეთელი ახალგაზრდების, ვაჟა სტურუას, გიორგი თოიძისა და თორნიკე ბურჭულაძის მორიგი სასამართლო სხდომა ჩატარდა.
სასამართლო პროცესი 3 საათზე იყო ჩანიშნული, თუმცა ის ორი საათის შემდეგ დაიწყო.
დარბაზში შესულ პირებს, როგორც ბრალდებულებს, ასევე ადვოკატებს, ბრალდებულების ოჯახის წევრებს მოულოდნელად დარბაზი დაატოვებინეს. როგორც შემდეგ გავარკვიეთ, პროკურორს მამუკა ნადირაძეს სამსახურში ერთერთი ბრალდებულის შუამდგომლობა დარჩა.
სასამართლო პროცესი ნადირაძის დაბრუნებისთანავე განახლდა და რამდენიმე საათის განმავლობაში გაგრძელდა.
ახალგაზრდებს ბრალი ედებოდათ სსკ. #353 მუხლის მეორე ნაწილით გათვალისწინებული ქმედებების გახორციელებაში, რაც განმარტებულია არის, როგორც პოლიციელების მიმართ წინააღმდეგობის გაწევა, საზოგადოებრივი წესრიგის დაცვისათვის ხელისშეშლა და მათი საქმიანობის შეწყვეტის მიზნით ჩადენილი დანაშაული ძალადობრივი ჯგუფის მიერ“.
ქმედება კი ისჯება თავისუფლების ვადის აღკვეთით 4-დან 7 წლამდე.
აღნიშნულ ბრალდებას არ ეთანხმებოდნენ ბრალდებულები.
უფლებების დამცველი დავით მამალაძე სასამართლო პროცესებზე არაერთხელ განმარტავდა, რომ მისი დაცვის ქვეშ მყოფი პირებს ვაჟა სტურუას და თორნიკე ბურჭულაძეს რომ სცოდნოდათ, საბილიარდოში მყოფი პიროვნებები პოლიციელები იყვნენ, მათ წინაშე ფიზიკურ ძალადობას არ ექნებოდა ადგილი და არც წინააღმდეგობას გაუწევდნენ. მამალაძის თქმით, თავდაპირველად პოლიციელები წამოვიდნენ მუქარაზე, ჩხუბსა და ძალადობაზე, ახალგაზრდები კი, თავის დაცვის მიზნით, წამიერად ეცადნენ მათ მოგერიებას, რაც იმას ნიშნავს, რომ პოლიციელების მიმართ ძალადობა წინასწარ განზრახული არ ყოფილა“.დავით მამალაძე მისი დაცვის ქვეშ მყოფ ვაჟა სტურუასთან დაკავშირებით ერთ დეტალზე ამახვილებდა ყურადღებას:
“თვითონ პოლიციის მიერ გამოკითხული მოწმეებისგანაც კი ირკვევა, რომ ვაჟა სტურუას საბილიარდოს ინციდენტში მონაწილეობა არ მიუღია, პირიქით, ის აშველებდა მხარეებს, ჩვენ გვყავს უამრავი მოწმე დაკითხული, რომ ვაჟა სტურუა დააკავეს მას შემდეგ, რაც საბილიარდოდან გამოვიდა და თხოვდა გარეთ მყოფ ადამიანებს, რომ ბიჭები იყვნენ უდანაშაულო და პროვოკაცია მოაწყვეს პოლიციელებმა.“
შეგახსენებთ, რომ ქალაქ ოზურგეთში ცენტრალურ უბანში, სადაც შსს გურიის პოლიციის დეპარტამენტი მდებარეობს, პოლიციელებსა და ახალგაზრდებს შორის ფიზიკური დაპირისპირება მოხდა. ინციდენტი 4 მაისს, საღამოს 10 საათზე, საბილიარდოში მოხდა. _ ახალგაზრდები, ლუდის ბარ “ნატახტარში“ იმყოფებოდნენ, რის შემდეგაც მათ საბილიარდოში თამაში გადაწყვიტეს. იქ შესულებს სამოქალაქო ტანსაცმელში ჩაცმული ორი პირი დახვდათ, რომლებიც ბილიარდს თამაშობდნენ. ახალგაზრდებსა და აღნიშნულ პირებს შორის რამდენიმე წუთში სიტყვიერი დაპირისპირება ფიზიკურ დაპირისპირებაში გადაიზარდა. ნაცემი ოყვნენ ახალგაზრდები, რომლებიც “ოზურგეთის სამედიცინო ცენტრში“ გადაიყვანეს. მათ სახეზე მრავლობითი დაზიანებები აღენიშნებოდათ. ასევე, ნაცემი იყვნენ ის პირებიც, რომლებიც, როგორც შემდეგ გაირკვა, პოლიციის მაღალჩინოსნები _ სოსო სულაბერიძე და მალხაზ შაშიაშვილი იყვნენ.
დღეს, აღნიშნულ საქმეზე პროკურატურასა და ბრალდებულებს შორის საპროცესო შეთანხმების შესახებ ხელშეკრულებები გაფორმდა:
ვაჟა სტურუა_ 1 წლით თავისუფლების აღკვეთა, 2000 ლარი და 4 წელი პირობითი მსჯავრი; თორნიკე ბურჭულაძე_ 1 წელი და 6 თვე თავისუფლების აღკვეთა, ასევე 5000 ლარი ჯარიმა და 3 წელი და 6 თვე პირობითი მსჯავრი; გიორგი თოიძეს _ 2 წელი თავისუფლების აღკვეთა,5000 ლარი ჯარიმა და 3 წელი პირობითი მსჯავრი;
მოსამართლემ გაითვალისწინა პროკურორის შუამდგომლობა და ამით სასამართლო პროცესი დასრულდა.
