ოზურგეთის მუნიციპალიტეტის საკრებულოს რიგგარეშე სხდომაზე ოზურგეთის მუნიციპალიტეტის მერიის თანამდებობის პირთა და სხვა მოსამსახურეთა თანამდებობრივი სარგოების განსაზღვრისა და საშტატო ნუსხის საკითხი განიხილეს და ადმინისტრაციულ წარმოებას საკრებულოს დეპუტატებმა მხარი დაუჭირეს.
მერიის მიერ წარმოდგენილი საშტატო ნუსხის მიხედვით, მეოთხე რანგის პირველი კატეგორიის თანამშრომლები შემცირდებიან. საშტატო ნუსხა ვერ ითვალისწინებს მეოთხე რანგის კატეგორიას, შესაბამისად, მობილობის წესი აღნიშნულ პიროვნებებზე არ იმოქმედებს.
„გურია ნიუსის“ მიერ მოპოვებული ინფორმაციის მიხედვით, აღნიშნული ფაქტი შეეხება: _ საქმის წარმოების, საზოგადოებასთან ურთიერთობის, ადამიანური რესურსების, სოციალური დაცვის, ინფასტრუქტურის, ზედამხედველობის, სამხედრო გაწვევის სამსახურის, სპორტის და ტურიზმის განყოფილებების უმცროსს სპეციალისტებს.
კონსტანტინე შარაშენიძის მრჩეველი კოკა კიღურაძის თქმით, ოზურგეთის მერიაში მიღებული იქნა გადაწყვეტილება, რომ საშტატო ნუსხა განისაზღვროს პირველი, მეორე და მესამე რანგის თანამდებობების გათვალისწინებით:
_ მეოთხე რანგი გათვალისწინებულია მხოლოდ მერის წარმომადგენელების თანაშემწეებისთვის. აღნიშნული გადაწყვეტილების მოტივაცია შემდეგია _ მუნციპალიტეტის მერიაში შტატით გათვალისწინებულ თანამდებობებზე მუშაობდეს მაღალკვალიფიციური და შესაბამისად, შედარებით უფრო მაღალი ანაზღაურების მქონე მოხელეები. საშტატო ნუსხა ორიენტირებულია სწორედ ამ მიმართულებით და შესაბამისად, ვერ გაითვალისწინებდა ქალაქ ოზურგეთის და ოზურგეთის სათემო მუნიციპალიტეტის საჯარო მოხელეების კონკრეტულ სპეციფიკას. თუმცა, როგორც აღმოჩნდა, ქალაქ ოზურგეთის მუნიციპალიტეტში 15 საჯარო მოხელე მუშაობდა სწორედ საჯარო სამსახურის მეოთხე რანგით გათვალიწინებულ თანამდებობებზე. საჯარო სამსახურში მობილობის წესი ითვალისწინებს ლიკვიდირებული საჯარო დაწესებულებების თანამშრომლებისთვის იმავე ან უფრო დაბალი თანამდებობის შეთავაზებას. აღნიშნული წესის მიხედვით, ფაქტობრივად, მათ აღარ ექნებათ მობილობის პროცესში მონაწილოების მიღების შესაძლებლობა. თუმცა, ეძლევად შესძლებლობა, მონაწილოება მიიღონ ღია კონკურსში და იმუშაონ უფრო მაღალანაზღაურებად თანამდებობებზე.
საკითხის მიმართ მაღალი საზოგადოებრივი და ამ ადამიანების ინტერესებიდან გამომდინარე, მუნიციპალიტეტი ვალდებულია, მობილობის პროცესში მოხელეებს შეუქმნას თანაბარი პირობები და როგორც მაქვს ინფორმაცია, მიმდინარეობს მუშაობა, რათა გამოიძებნოს გზები მათი მობილობის პროცესში მონაწილოებისთვის.
ვფიქრობ, რომ ოზურგეთის მუნიციპალიტეტი მაქსიმალურად შეეცდება, დაიცვას ლიკვიდაციის შედეგად გათავისუფლებული საჯარო მოხელეთა ინტერესები და მობილობის პროცესში შეუქმნას მათ თანაბარი პირობები, _ ამბობს „გურია ნიუსთან საუბრისას კოკა კიღურაძე.
