საჯარო სამსახურის ბიურომ 2017 წლის დეკლარაციების მონიტორინგის ანგარიში გამოაქვეყნა. საჯარო სამსახურის ბიუროს ინფორმაციით, ქონებრივ დეკლარაციებში აღმოჩენილი დარღვევების გამო ჯარიმა საპარლამენტო უმრავლესობის წარმომადგენლებსაც დაეკისრათ, რომელთა შორის არიან: არჩილ თალაკვაძე, აკაკი ზოიძე, გუგული მაღრაძე, მიხეილ ყაველაშვილი, ოთარ ჩრდილელი, ირაკლი აბუსერიძე, ზვიად კვაჭანტირაძე, თამაზ ნავერიანი და პაატა მხეიძე.
,,გურია ნიუსი“ დაინტერესდა, დეკლარაციებში აღმოჩენილ რა სახის დარღვევბზეა საუბარი _ საკითხზე სასაუბროდ მმართველი გუნდის წევრს, ჯანმრთელობისა და სოციალურ საკითხთა კომიტეტის თავმჯდომარეს აკაკი ზოიძეს დავუკავშირდით.
როგორც საპარლამენტო უმრავლესობის წევრი ჩვენთან საუბრისას აცხადებს, საჯარო სამსახურის მიერ მის დეკლარაციაში აღმოჩენილი დარღვები, ძირითადად, ტექნიკური ხასიათის ხარვეზებს შეიცავს.
,,მე დამაჯარიმეს 2016 წელს. ჯარიმა, ძირითადად, ტექნიკური ხარვეზის გამო დამეკისრა. სამწუხაროა, რომ ყველა ტიპის დარღვევაზე, უხეშსა თუ შედარებით რბილზე სანქცია ერთნაირია. საჯარო სამსახურის მიერ ჩემი დაჯარიმება არანაირ კავშირში არაა ქონების არაკანონიერი გზით შოვნასთან. მინდა გითხრათ, რომ ეს მონაცემები ასახავს წინა წლის დეკლარაციას“, – გვითხრა აკაკი ზოიძემ.
დეკლარაციაში არსებულ ხარვეზებზე “გურია ნიუსთან” კომენტარი გააკეთა რუსთავის მაჟორიტარმა დეპუტატმა პაატა მხეიძემ.
როგორც პაატა მხეიძე ჩვენთან საუბრისას აცხადებს, მონიტორინგის შედეგებში მის მიერ შევსებული 2015- 2016 წლის მონაცემები აისახა. მმართველი გუნდის წევრი ამბობს, რომ დეკლარაციის შევსების დროს გარკვეული უზუსტობა გაიპარა, თუმცა აღნიშნავს, რომ ქონების დამალვის მცდელობა არასდეროს ჰქონია.
,,საქმე ეხება 2015 -2016 წლის ქონებრივ მონაცემებს, რომელიც შევსებული მაქვს 2016 წელში. ვადასტურებ, რომ ჩემს ქონებრივ დეკლარაციაში გარკვეული უზუსტობები გაიპარა. კერძოდ, დეკლარაციაში არასწორად მივუთითე გადახდილი თანხა. ის, რაც უნდა მიმეთითებინა დოლარში მივუთითე ლარში. გარდა ამისა, გეტყვით, რომ 2016 წელს მეუღლეს ჰქონდა ექვსი კვადრატული მეტრი ფართის სარდაფი სოლოლაკში, სადაც ვცხოვრობდით, დაახლოებით, ერთი 25 წელის განმავლობაში. სახლს გვიან გაუკეთდა პრივატიზაცია. ასე რომ, რამე სახის ქონების გამიზნულად დამალვის მცდელობა არასდროს მქონია. შთამბეჭდავი ქონების პატრონი არ გახლავართ, საქართველოს ბანკიდან გამოტანილი კრედიტის საშუალებით სიბერეში ავაშენე სახლი. ინფორმაცია საჯაროა და ყველას შეუძლია გაეცნოს მას“, _ განაცხადა პაატა მხეიძემ.
