საპარლამენტო უმრავლესობის წევრმა დავით ჭიჭინაძემ დღეს განაცხადა, რომ “სწავლა რომ უყვარდეს, ის გლეხი არ იქნებოდა” და “სხვა ადგილს მიაგნებდა ამ ცხოვრებაში”.
როგორც აღმოჩნდა, სხვის უსწავლელობაზე მოსაუბრე ჭიჭინაძეს პარლამენტარობისას დიპლომიც არ ჰქონია.
პარლამენტის ოფიციალურ ვებგვერდზე გამოქვეყნებული ინფორმაციით, ირკვევა, რომ მან “გეპეიც” ვერ დაამთავრა.
მისი ბიოგრაფიის განათლების გრაფაში წერია: საქართველოს პოლიტექნიკური ინსტიტუტი, დაუმთავრებელი.
ამ დროს ჭიჭინაძე პარლამენტში ბლოკ “საქართველოს აღორძინებას” წარმოდგენდა.
ახლა ჭიჭინაძე “ქართულ ოცნებას” წარმოადგენს და ამჯერად განათლების გრაფაში უწერია: საგანმანათლებლო დაწესებულება _ საქართველოს ტექნიკური უნივერსიტეტი; სპეციალობა სამდინარო ნაგებობების ჰიდროტექნიკური მშენებლობა. თუმცა, როდის დაიწყო და დაასრულა სწავლა მითითებული არაა.
შეგახსენებთ, რომ ჭიჭინაძემ სიტყვებით: “სწავლა რომ უყვარდეს, ის გლეხი არ იქნებოდა რა, დამიჯერეთ, სხვა ადგილს მიაგნებდა ამ ცხოვრებაში” აგრარულ საკითხთა კომიტეტის სამუშაო შეხვედრაზე, გარემოს დაცვისა და სოფლის მეურნეობის მინისტრის მოადგილეს, გელა ხანიშვილს მიმართა.
გელა ხანიშვილმა აზიური ფაროსანას წინააღმდეგ ბრძოლის სახელმწიფო პროგრამის განხილვისას განაცხადა, რომ მთელ დასავლეთ საქართველოში ერთი ფერმერიც არ აღმოჩნდა, რომელიც მათი ინსტრუქციის შესაბამისად გაასუფთავებდა ნაკვეთს და თხილს სათანადოდ დაამუშავებდა.
“სწავლა რომ უყვარდეს, ის გლეხი არ იქნებოდა რა, დამიჯერეთ, სხვა ადგილს მიაგნებდა ამ ცხოვრებაში. 230 ათასი ნაკვეთი თუ არის, ხომ შეიძლება სამობილიზაციო სამსახურივით გავაკეთოთ. პრინციპში თითო წევრზე 100 ლარი რომ გამოვყოთ, სულ 25 მილიონ ლარში ჩავეტევით. მე ვიცი, რომ ბევრი პროგრამაა ისეთი, რომელშიც გაცილებით მეტ ფულს ვიხდით და შემდეგ დრო რომ გადის არაეფექტური აღმოჩნდა. ამიტომ რაღაც სამუშაო ადგილებიც შეიქმნება”, – განაცხადა დავით ჭიჭინაძემ.
“ქართული ოცნების” დეპუტატის თქმით, სახელმწიფო უფრო აქტიურად უნდა ჩაერთოს მოსავლის მოყვანაში.
„ადამიანები თავის თხილს თუ არ უვლიან ,70 %-ს თუ კარგავენ, ისინი იმ ფაროსანას 22 თხილს გაუფრთხილდებიან? გამოდის, რომ მასშტაბურად სხვა პრობლემა გამოიკვეთა თხილთან მიმართებაში და თუ გავყვებით სხვა კულტურის მიხედვით, იქაც სხვა პრობლემები გამოჩნდება. ნუ გვრცხვენია, რომ სახელმწიფო უფრო აქტიურად იყოს ჩარეული მოსავლის მოყვანაში. რაღაცნაირად მივენდეთ საბაზრო ეკონომიკას, გავიწიეთ ბოლომდე და ვთვლით, რომ ადამიანმა თავისი თავი თვითონ უნდა გადაარჩინოს. მე მგონია, არ არის სწორი”, – განაცხადა დავით ჭიჭინაძემ, რომლის კომენტარი საზოგადოებრივმა მაუწყებელმა გაავრცელა.
