“სხვისთვის შეიძლება და ჩვენთვის არა?” _ მძღოლების პროტესტი

ბოლო ერთი წელია,  მერია-ნატანები-ურეკის დამაკავშირებელი ცენტრალურ გზაზე აქციებს ინტენსიური ხასიათი მიეცა. რამდენიმე თვის წინ აღნიშნულ მონაკვეთზე ადგილობრივმა მოსახლეობამ ცენტრალური გზაც არაერთხელ გადაკეტა იმ მოთხოვნით, რომ მძიმეწონიანი მანქანების ინტენსიურმა მოძრაობამ მოსახლეობა დააზარალა, გზა კი საშინლად დაზიანდა. მოსახლეობის მაშინდელ პროტესტს ხელისუფლების მხრიდან რეაგირება მოჰყვა_ ცენტრალური გზა მოასფალტდა, ხოლო მძიმეწონიან ავტომანქანებს გზის აღნიშნულ მონაკვეთზე მოძრაობა აეკრძალათ, ისინი თვეების განმავლობაში ალტერნატიული, შემოვლითი  მერია-ლაითურის გზით სარგებლობდნენ.

მერიაში ორი დღეა, იმ კომპანიის მძღოლები მართავენ აქციას, რომლებიც სუფსაში ავტობანის მშენებლობისთვის ეზიდებიან ქვიაშა-ხრეშს.

80 მძღოლი პროტესტს გამოთქვამს შემოვლითი გზის სარგებლობაზე, რადგან, მათი თქმით, ახლა ის გზა ისე დაზიანდა, რომ მოძრაობა შეუძლებელი გახდა. დღეს აქ ავტომობილებს თავისუფლად გადაადგილება უჭირთ და მდგომარეობა მძიმეა, მძღოლების თქმით, მერია-ლაითურის გზაზე ავტოსაგზაო შემთხვევებს უკვე ინტენსიური ხასიათი მიეცა.

ლევან ხოსრევანიძე, რომან ებრალიძე, ზაზა ტაკიძე: _ არაერთხელ ვცადეთ გზის გაკეთება, მაგრამ არ კეთდება, რამდენჯერ გადავარდა თხრილში დატვირთული მანქანა, ვეღარც ვითვლით, მძიმე სიტუაციაა. ეს მხოლოდ ჩვენთვის ხდება, რადგან ჩვენ ვემსახურებით ჩინურ კომპანიას.   მერია-ურეკის ცენტრალური გზით სხვა სატვირთო მანქანები ჩვეულებრივად გადაადგილდებიან. დადგან სასწორი და ყველა ჩააყენონ თანაბარ მდგომარეობაში. სხვისთვის შეიძლება და ჩვენთვის არა? ჩვენ სახელმწიფოს არ ვემსახურებით? ჩვენც ავტობანზე მიგვაქვს ეს ხრეში, ან ის გზა, რომელსაც ჩვენ გავდივართ დაბა ლათურის შემდეგ, არ დაზიანდება? უნდა გავიაროთ ქობულეთის ცენტრალური გზა, ისიც გაფუჭდება. ჩვენ ეს ხრეში სუფსის ავტობანზე მიგვაქვს. ყველას ბანკის ვალები გვაქვს. სამი თვეა გვირეკავენ ბანკებიდან, ათასობით ლარი გვაქვს გადასახდელი. ზოგს ეს მანქანები საკუთრებაში გვყავს, ზოგს _ ნაქირავები, ვწვალობთ, ვშრომობთ, ქუჩაში ვართ დღე და ღამე. კომპანია, ვისაც ვემსახურებით, ფულს იმაში გვიხდის, რაც უფრო მოკლე დროში მივიტანთ მასალას და რაც შეიძლება მეტს. ჩვენ ვერ ვახერხებთ ამას, რადგან დაზიანებული გზის გამო, ერთი საათის ნაცვლად, ადგილზე მისასვლელად 5 და 6 საათი გვაგვიანდება და ისიც საეჭვოა, მივიტანთ თუ არა დანიშნულების ადგილას, რადგან, შესაძლოა, იმხელა თხრილში ჩავარდე ან მსხვერპლი მოჰყვეს ან ჩავარდნილი მანქანის ამოყვანას დააგვიანდეს დიდი დრო.  შემდეგ უნდა გამოიძახო ტრაქტორი ამწეთი და ასე შემდეგ. ეს ყველაფერი კი ხარჯებთან არის დაკავშირებული, ჩავარდნილი დაზიანებული მანქანის გაკეთებას ჩვენი ერთი თვის ხელფასი სჭირდება, საწვავი კი იცით, რაც ღირს და როგორ გაძვირებულია.

რატომ გვაჯარიმებენ ჩვენ? ყველასთვის იყოს სამართალი. ეს მანქანები უნდა აიკრძალოსო, ახლა რომ ამბობენ, სახელმწიფო გზას ვაკეთებთ, ან მარტო 8-კილომეტრიან გზაზე რატომ არის აკრძალული, _ამბობენ ისინი და განმარტავენ თუ რატომ არ იმყოფებიან  მათთან ერთად კომპანიის წარმომადგენლები:

_ კომპანიის წარმომადგენლები რომ მოვიდნენ აქციაზე, ისეთ რაიმეს „გაუჩალიჩებენ“, რომ  არაფერი ეყოფათ ჯარიმის გადასახდელად ან ლიცენზიას ჩამოართმევენ.

ოზურგეთის მუნიციპალიტეტის მერიაში აღნიშნულთან დაკავშირებით განმარტავენ, რომ ოზურგეთი-ნატანები-ურეკის გზის მერიის მონაკვეთზე გადადგილების უფლება მხოლოდ სახელმწიფო მნიშვნელობის გზის მშენებლობაზე დასაქმებულებს აქვთ:

_ ოზურგეთი-ნატანები-ურეკის გზის მერიის მონაკვეთზე აქციის მონაწილეებს ოზურგეთის მუნიციპალიტეტის მერის მოადგილე ოსიკო თოთიბაძე შეხვდა. აღნიშნულ ტერიტორიაზე მხოლოდ ის მძიმეწონიანი მანქანები გადაადგილდებიან, რომლებიც ოზურგეთი-ნატანები-ურეკის სახელმწიფო მნიშვნელობის გზის მშენებლობას ემსახურებიან. დანარჩენ მანქანებს არ აქვთ გადაადგილების ნებართვა. გასულ წელს აღნიშნული საგზაო მონაკვეთი სწორედ მაღალი გამავლობის, მძიმეწონიანი თვითმცლელი მანქანების ინტენსიური მოძრაობის შედეგად დაზიანდა და ამის გამო ადგილობრივმა მოსახლეობამ გზა არაერთხელ გადაკეტა. დაახლოებით, 1 თვეში  აღნიშნულ გზაზე დამონტაჟდება ე.წ. სასწორი და მაღალი გამავლობის მანქანები მხოლოდ ტვირთის დასაშვები რაოდენობით იმოძრავებენ.