უფლებამოსილებები, რომლებიც მანდატურს 2013 წელს განესაზღვრა _ ახლად გასაღებული კანონპროექტი

2013 წელს ,,ზოგადი განათლების შესახებ“ საქართველოს კანონში ცვლილებები შევიდა,  რომელიც სკოლის მანდატურებთან დაკავშირებულ უფლება-მოვალეობებს განსაზღვრავდა.  2013 წელს გახორციელებული საკანონმდებლო ცვლილებებიდან ვიგებთ, რომ ის უფლებამოსილებები, რომლებიც დღეს მანდატურს ,,უფართოვდება“ ამა წელს მიღებულ კანონში უკვე არსებობდა.

კერძოდ, პროექტში, რომელზეც ახლა შინაგან საქმეთა სამინისტრო და განათლებისა და მეცნიერების  სამინისტრო ერთად მუშაობს, ნახსენებია, რომ მანდატურს, სამართალდარღვევის არარსებობის შემთხვევაში _ მოზარდის შეყოვნებისა და მშობლისთვის დაუყოვნებლივ შეტყობინების, სამართალდარღვევის შემთხვევაში კი, პოლიციისთვის დაუყოვნებლივ შეტყობინების ვალდებულება ექნება.

2013 წელს მიღებულ ,,ზოგადი განათლების შესახებ“ საქართველოს კანონში მიღებული ცვლილებები კი გვეუბნება, რომ მანდატურს ვალდებულება აქვს დაწესებულებაში ან/და მის მიმდებარე ტერიტორიაზე მომხდარი სამართალდარღვევის შემთხვევაში სამართალდამცავ ორგანოები საქმის კურსში ჩააყენოს.

2013 წ. ,,ზოგადი განათლების შესახებ“ საქართველოს კანონი, მუხლი 483.

ბ) საგანმანათლებლო დაწესებულებაში ან/და მის მიმდებარე ტერიტორიაზე მომხდარი და გამოვლენილი სამართალდარღვევის აღკვეთა და შესაბამისი სამართალდამცავი ორგანოების ინფორმირება;

განათლებისა და შინაგან საქმეთა სამინისტროს კიდევ ერთი სიახლე ვიდეოკონტროლს შეეხება. კერძოდ,  სკოლებში უსაფრთხოების უზრუნველყოფის მიზნით, შიდა და გარე პერიმეტრზე ვიდეოკამერების არსებობა სავალდებულო ხდება.

მიუხედავად იმისა, რომ დღეს, ვიდეოკამერებით სკოლების უმრავლესობა აღჭურვილია, პრობლემა მაინც რჩება. ფაქტია, რომ გასაძლიერებელია კონტროლის მექანიზმი, რომელიც 2013 წელს მიღებულ კანონში მანდატურს უფლებამოსილებად განესაზღვრა.

2013 წ. მუხლი 483.

ა) მანდატურის უფლებამოსილებაში შედის საგანმანათლებლო დაწესებულების და მისი მიმდებარე ტერიტორიის კონტროლი;

ერთადერთი ცვლილება, რომელიც შინაგან საქმეთა სამინისტრომ და განათლების მეცნიერების სამინისტრომ ერთობლივად შეიმუშავეს მანდატურის პროფესიულ განათლებას ეხება. კერძოდ, ცვლილების შემდეგ მანდატურად დაინიშნება მხოლოდ უმაღლესი განათლების მქონე პირი, მანდატურის სამსახურში მიღების ასაკი 21 წლამდე აიწევს. იცვლება მანდატურის პროფესიული მომზადების წესი, რომელიც თეორიულ მომზადებასთან ერთად პრაქტიკულ კომპონენტსაც გაითვალისწინებს.

სრულად გთავაზობთ  2013  წელს ,,ზოგადი განათლების შესახებ“ საქართველოს კანონში  გახორციელებულ ცვლილებებს, რომელიც მანდატურს უფლებამოვალეობებს განუსაზღვრავდა და მის შესრულებას ავალდებულებდა.

მუხლი 483.  საგანმანათლებლო დაწესებულების მანდატურის უფლება-მოვალეობებია:

ა) საგანმანათლებლო დაწესებულების და მისი მიმდებარე ტერიტორიის კონტროლი;

ბ) საგანმანათლებლო დაწესებულებაში ან/და მის მიმდებარე ტერიტორიაზე მომხდარი და გამოვლენილი სამართალდარღვევების აღკვეთა და შესაბამისი სამართალდამცავი ორგანოების ინფორმირება;

გ) საგანმანათლებლო დაწესებულების სამეურვეო საბჭოს, პედაგოგიური საბჭოს, დირექციის, მასწავლებლის, რექტორის და აკადემიური პერსონალის თხოვნით, სოციალური ქცევის პრობლემების მქონე მოსწავლეებთან/სტუდენტებთან ურთიერთობა, მათთან ინდივიდუალური გასაუბრება, მათ ქცევაზე დაკვირვება;

დ) მოსწავლეებისათვის/სტუდენტებისათვის სამოქალაქო თავდაცვასთან, საგზაო მოძრაობის უსაფრთხოებასთან, ადმინისტრაციულ სამართალდარღვევებთან და სისხლის სამართლის დანაშაულებთან და მათ შედეგებთან დაკავშირებულ საკითხებზე ინფორმაციის მიწოდება;

ე) მოსწავლეთა/სტუდენტთა მშობლებისა და საგანმანათლებლო დაწესებულების შესაბამისი უფლებამოსილი პირის ინფორმირება სოციალური ქცევის პრობლემების მქონე მოსწავლეთა/სტუდენტთა ქცევის შესახებ;

ვ) საგანგებო სიტუაციებში (ხანძარი, წყალდიდობა, მიწისძვრა და სხვა) მოსწავლეთა/სტუდენტთა, საგანმანათლებლო დაწესებულებაში მომუშავე და იქ მყოფი სხვა პირების დაცვა და მათი ევაკუაციისათვის ხელის შეწყობა;

ზ) დაპირისპირებულ მოსწავლეებს/სტუდენტებს შორის მედიატორის როლის შესრულება, კონფლიქტური სიტუაციის გამოვლენა და კონფლიქტის მოგვარება;

თ) სოციალური ქცევის პრობლემების მქონე მოსწავლეთა/სტუდენტთა მშობლებთან შეხვედრებში მონაწილეობა;

ი) დამოუკიდებლად ან საგანმანათლებლო დაწესებულების ადმინისტრაციასთან ერთად საგანმანათლებლო დაწესებულების ტერიტორიაზე წესრიგისა და დისციპლინის დაცვა;

კ) საგანმანათლებლო დაწესებულებაში გამოვლენილი დარღვევის შესახებ საქართველოს განათლებისა და მეცნიერების სამინისტროს მიერ დამტკიცებული ფორმის შესაბამისი საგანმანათლებლო დაწესებულებაში დარღვევის აღრიცხვის ფურცლის შედგენა და საგანმანათლებლო დაწესებულების შესაბამისი უფლებამოსილი პირისათვის და საგანმანათლებლო დაწესებულების მანდატურის სამსახურის უფროსისათვის წარდგენა;

ლ) საგანმანათლებლო დაწესებულებაში გამოვლენილი დარღვევების ელექტრონული საინფორმაციო ბაზის შექმნა;

მ) დისციპლინური გადაცდომის იარაღის, იმ საგნის, რომელსაც დისციპლინური გადაცდომის კვალი ატყვია, დისციპლინური გადაცდომით მოპოვებული ნივთის და ფასეულობის, აგრეთვე იმ საგნის და დოკუმენტის, რომლებიც საჭიროა დისციპლინური გადაცდომის გარემოებათა გასარკვევად, აღმოჩენისა და ამოღების მიზნით პირადი გასინჯვის ჩატარება;

ნ) საქართველოს კანონმდებლობით პირდაპირ განსაზღვრულ შემთხვევებში სპეციალური საშუალებების გამოყენება.

2. საგანმანათლებლო დაწესებულების მანდატური მიწვევის საფუძველზე ესწრება საგანმანათლებლო დაწესებულების სტრუქტურული ერთეულების სხდომებს და გამოთქვამს მოსაზრებებს მისი უფლებამოსილებისთვის მიკუთვნებულ საკითხებზე.”