ქალაქ ოზურგეთში ყოფილი სასტუმრო “გურიას“ მშენებლობა იწყება. როგორც ქალაქ ოზურგეთის მუნიციპალიტეტის მერიაში აღნიშნავენ, კომპანია „გურია პალასმა“ ოზურგეთის მუნიციპალიტეტის მერიაში შემოიტანა საპროექტო დოკუმენტაცია. ამ ეტაპზე კი პროექტის განხილვა მიმდინარეობს.
იმ შემთხვევაში, თუ საპროექტო დოკუმენტაციაში არ იქნება არქიტექტურული და ტექნიკური ხარვეზები, მუნიციპალიტეტის მერია გასცემს მშენებლობის ნებართვას და აღნიშნული კომპანია გააგრძელებს სასტუმრო „გურიას“ სარეაბილიტაციო სამუშაოებს, _აღნიშნავენ მერიაში.
როგორც პროექტშია აღნიშნული _ სასტუმრო „გურია პალასი“ –თავისი კონფიგურაციით რთულია და რელიეფიდან გამომდინარე სართულიანობა სხვადასხვაა.
რეკონსტრუქცია გულისხმობს ნაწილობრივ პროფილის შენარჩუნებას, რასაც დაემატება სხვადასხვა ფუნქციური სივრცეები.
პროექტის მიხედვით, ახალ სასტუმროში 47 ნომერი იქნება, აქედან 3 ლუქსი, რომელსაც მეორე სართულზე ექნება კვების ბლოკი სამზარეულოთი და დამხმარე სათავსოებით. მესამე სართულზე გარდა ნომრებისა, განთავსდება საკონფერენციო დარბაზი.
სასტუმრო სულ 2 204 კვ.მ.-ს იკავებს.
ასევე, პროექტის მიხედვით, შიდა ეზოში დამატებით განთავსდება კიბის უჯრედი პანორამული ლიფტით, რომლის საშუალებით მოვხვდებით მე-2 სართულის საოფისე ფართებში და მე-4 სართულზე განთავსებულ კაფე-ბარში.
ქალაქ ოზურგეთის ცენტრში, გ. ეპისკოპოსის და ი.პეტრიწის ქუჩების გადაკვეთაზე მდებარე შპს “სასტუმრო გურია” ბიზნესმენმა ზურაბ ჩხაიძემ 2015 წლის 19 აგვისტოს იყიდა.
შპს “სასტუმრო გურიას” ბედი დღემდე გაურკვეველი იყო.
ამ ხნის მანძილზე საზოგადოების მაღალი ინტერესი იყო, თუ რატომ არ იწყებოდა მრავალჯერ გაპიარებული სასტუმრო „გურიას“ მშენებლობა.
ორ წელზე მეტი გავიდა და სასტუმროს რეაბილიტაცია, ხელშეკრულებაში გაწერილი ვადების შესაბამისად, არ გახორციელებულა. რის გამოც, კომპანიას ყოველდღიური ჯარიმებიც დაეკისრა, შემდეგ კი მას შეუწყდა ხელშეკრულებაც და ქონება ოზურგეთის მუნიციპალიტეტს დაუბრუნდა.
“გურია ნიუსი“ აღნიშნულთან დაკავშირებით არაერთხელ წერდა. ამ ორი წლის განმავლობაში, სასტუმროს მფლობელ ზურაბ ჩხაიძესა და ქალაქ ოზურგეთის ყოფილ მერს შორის უთანხმოებაც იყო. გაიმართა არაერთი სასამართლო პროცესიც, რომელიც ზურაბ ჩხაიძის სასარგებლოდ დასრულდა.
ახალი სასტუმროს მშენებლობა ოზურგეთში ტურიზმის განვითარებას ხელს შეუწყობს, _ ამბობენ ოზურგეთელები.
