გარემოს დაცვითი ზედამხედველობის დეპარტამენტის დასავლეთის რეგიონული სამმართველოს გურიის გარემოსდაცვითი პატრულირებისა და სწრაფი რეაგირების განყოფილების უფროსმა გურამ ასათიანმა სამსახურიდან წასვლის შესახებ განცხადება საკუთარი სურვილით დაწერა და თანამდებობა დღეს დატოვა. ჩვენი წყაროს ინფორმაციით, განცხადება თანამდებობიდან წასვლის შესახებ რამდენიმე დღის წინ აღნიშნული სამსახურის აჭარის სამმართველოს უფროსმა ქემალ ხალვაშმაც დაწერა.
დღეს დილით, გურამ ასათიანი თანამშრომლებს თათბირს უტარებდა, როცა სამსახურის შენობაში შემოვიდნენ სახელმწიფო უსაფრთხოების სამსახურის ანტიკორუფციული სააგენტოს თანამშრომლები და 10 პირი ხელბორკილებით შსს გურიის პოლიციის დეპარტამენტში გადაიყვანეს.
ბოლო თვეებია, სახელმწიფო უსაფრთხოების სამსახურის ანტიკორუფციული სააგენტო ოზურგეთში არსებულ კარიერების თემას სწავლობდა.
ერთ-ერთი დაკავებული პირის მეუღლემ გვითხრა, რომ, როგორც მას გამომძიებელმა აცნობა, მის მეუღლეს სსკ 332-ე მუხლით ედავებიან, რაც სამსახურეობრივი უფლებამოსილების ბოროტად გამოყენაბას გულისხმობს.
ჩვენი წყაროს ინფორმაციით, სუს-ი გარემოსდაცვითი ზედამხედველობის დეპარტამენტის დასავლეთის რეგიონული სამმართველოს გურიის გარემოსდაცვითი პატრულირებისა და სწრაფი რეაგირების განყოფილების საქმიანობას მათი უფლებამოვალეობის შესრულების დროს ჩუმად აკონტროლებდა, რისი ამსახველი ვიდეო და ფოტო მასალებიც გააჩნიათ.
P.S. რამდენიმე წუთის წინ, სახელმწიფო უსაფრთხოების სამსახურმა აღნიშნულ ფაქტზე ოფიციალური განცხადება გაავრცელა:
“საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, გარემოს დაცვისა და სოფლის მეურნეობის სამინისტროსთან თანამშრომლობით, სამსახურებრივი უფლებამოსილების ბოროტად გამოყენებისა და სამსახურებრივი სიყალბის ფაქტებზე, გარემოსდაცვითი ზედამხედველობის დეპარტამენტის დასავლეთის რეგიონალური სამმართველოს გურიის გარემოსდაცვითი პატრულირებისა და სწრაფი რეაგირების განყოფილების თანამშრომლები: გენო ქ., ემზარ ც., მამუკა ა., ირაკლი ხ. და რამაზ კ. დააკავეს.
გამოძიებამ დაადგინა, რომ გურიის გარემოსდაცვითი პატრულირებისა და სწრაფი რეაგირების განყოფილების თანამშრომლებს: გენო ქ-ს, ემზარ ც-ს, მამუკა ა-ს, ირაკლი ხ-ს და რამაზ კ-ს., საჯარო ინტერესის საწინააღმდეგოდ, დანაშაულებრივად დაუკავშირდნენ სხვადასხვა კომპანიების წარმომადგენლები და მათ სამოქმედო ტერიტორიაზე, უკანონო ქმედების ჩადენის შედეგად, მატერიალური გამორჩენის მიღების მიზნით შეუთანხმდნენ, რომ მოახდენდნენ ინერტული მასალის – ქვიშა-ღორღის ლიცენზიის გარეშე მოპოვებას. გენო ქ-მ, ემზარ ც-მ, მამუკა ა-მ, ირაკლი ხ-მ, და რამაზ კ-მ, 2017-2018 წლებში არ განახორციელეს კანონით გათვალისწინებული მათზე დაკისრებული მოვალეობები და აღნიშნული კომპანიების წარმომადგენლების უკანონო ქმედებებში მხილებისა და სადამსჯელო ღონისძიებების ნაცვლად, თავისი უმოქმედობით და ყალბი დოკუმენტების შედგენის შედეგად, საშუალება მისცეს იმავე კომპანიების წარმომდგენლებს, მოეხდინათ დიდი ოდენობით ინერტული მასალის, ქვიშა-ღორღის ლიცენზიის გარეშე მოპოვება, რამაც სახელმწიფოს კანონიერი ინტერესის არსებითი დარღვევა გამოიწვია.
2018 წლის 29 მარტს გენო ქ. ემზარ ც., მამუკა ა., ირაკლი ხ. და რამაზ კ. დაკავებული იქნენ ბრალდებულის სახით.
გამოძიება სამსახურებრივი უფლებამოსილების ბოროტად გამოყენების და სამსახურებრივი სიყალბის ფაქტებზე მიმდინარეობს(საქართველოს სსკ-ის 332-ე მუხლის პირველი ნაწილით და 341 მუხლით), რაც სასჯელის სახით ითვალისწინებს თავისუფლების აღკვეთას ოთხ წლამდე ვადით.
გამოძიებას აწარმოებს სახელმწიფო უსაფრთხოების სამსახურის ანტიკორუფციული სააგენტო”.
ამავე თემაზე:
